Epanọ Whọ Sae rọ Maneji Ugho
Kọ eware i kie jẹlẹ kẹ owhẹ nọ u bi ru ei bẹbẹ re whọ ruẹ ugho nọ whọ rẹ rọ rẹrote omara? Ikpẹyao nọ i re vo, eware okpẹtu nọ a rọ obọ so ho nọ e rẹ via, ozighi nọ o re no esuo-ohrowo ze, gbe ẹmo i re ru nọ eware e rẹ rọ jọ gaga. Uzẹme riẹ họ, nọ ekọ e tẹ raha idudhe eware e rẹ jọ gaga, rekọ ehrẹ nọ e rrọ Ebaibol na i re fiobọhọ kẹ omai sae maneji ugho.
1. Jẹ uyero nọ whọ rrọ obọnana rehọ.
Ehri-uzi Ebaibol: “Me wuhrẹ . . . epanọ a re ro wo edẹro evaọ oware kpobi gbe evaọ uyero kpobi, te ohwo ọ re eva vọ hayo ohọo u bi kpei, te o wo buobu hayo o wo ho.”—Ahwo Filipai 4:12.
Dede nọ ugho o gbẹ te jọ owhẹ obọ wọhọ epaọ ọsosuọ họ, whọ sai wuhrẹ epanọ whọ sae rọ maneji umutho ugho nọ who bi wo enẹna. Nọ whọ tẹ rọwo nọ eware i nwene no, ẹsiẹe o te mae rọ lọhọ kẹ owhẹ avọ ahwo uviuwou ra re wha thihakọ uyero nọ wha rrọ na.
Kiẹ sọ ahwo egọmeti hayo itu nọ i re fiobọhọ kẹ ahwo a bi fiobọhọ evaọ oria nọ whọ rrọ. Nọ uvẹ utioye o tẹ riẹ, jowọ vẹrẹ vẹrẹ keme oke nọ a re ro fi obe họ u re tulo ho.
2. Whẹ avọ ahwo uviuwou ra wha ru eware kugbe.
Ehri-uzi Ebaibol: “Omaa o rẹ raha nọ a gbẹ nọ mi amọfa ha, rekọ a rẹ sai ru oware, nọ ekohrẹ i te bu.”—Itẹ 15:22.
Lele aye ra gbe emọ ra ta kpahe oghẹrẹ nọ eware e rrọ. Nọ wha tẹ be hae ta ẹme kugbe ziezi, u re fiobọhọ kẹ ahwo uviuwou na kpobi wo otoriẹ oghẹrẹ nọ eware e rrọ enẹna je fiobọhọ kẹ ai ru lele inwene nọ wha ti ru. Nọ ahwo kpobi nọ a rrọ uwou na a tẹ be daoma maneji, o rẹ whae ze nọ wha gbe ro mu ugho raha ha.
3. Wo omaa.
Ehri-uzi Ebaibol: “Keria . . . re [wha] roro araha na.”—Luk 14:28.
Nọ ugho o gbẹ rriẹ tere he, u wuzou gaga re whọ riẹ oware kpobi nọ whọ be raha ugho fihọ. Kere unuigho nọ who bi wo kamara kamara evaọ otọ uyero nọ whọ rrọ na fihotọ. Kẹsena who ve kere araha kamara kamara gbe eware nọ whọ be raha ugho fihọ fihotọ, o tẹ make rọnọ who ti nwene eware nana ẹdẹfa. Evaọ ugho nọ whọ be raha kamara kamara na, daoma fi ugho jọ họ obei fiki ariẹse he hayo eware idudhe nọ e rẹ sae via.
Oware jọ nọ u re fiobọhọ: Nọ who te bi roro unuigho nọ whọ raha, kareghẹhọ roro emeware esese nọ whọ dẹ re. O sae gbe owhẹ unu nọ whọ tẹ riẹ ugho nọ whọ be raha fihọ emeware esese nana. Wọhọ oriruo, nọ ọzae jọ o roro kpahe unuigho nọ ọ be hae raha rọ dẹ eware kukpe kukpe, ọ tẹ ruẹ nọ ugho nọ ọ raha rọ dẹ athethe o bu wo umuo ho!
4. Rọ eware nọ e mai wuzou karo re who je ru inwene.
Ehri-uzi Ebaibol: “Vuhu eware nọ e mae roja.”—Ahwo Filipai 1:10.
Rọ ugho nọ who bi wo wawọ araha ra jẹ daoma riẹ eware nọ whọ gwọlọ họ nọ whọ rẹ sae siọ ugho ba ẹraha fihọ, hayo eware nọ whọ sai bru araha rai kpotọ re ugho nọ who bi wo enẹna o sai te owhẹ maneji. Kiẹ eware nọ e rrọ obotọ na riwi:
Omoto. Otẹrọnọ imoto ivẹ who wo, kọ whọ sae zẹ ọvo jọ no? Otẹrọnọ ọnọ ọ rrọ ghaghae gaga who wo, kọ whọ sae nwene kpohọ ọnọ ọ nwane ghare tere he? Kọ whọ sae hae ruọ omoto-ofa kpohọ oria nọ whọ be nya, dhẹ ebasikoro, hayo tubẹ jọ ababọ omoto dede?
Eware ẹkeriotọ. Kọ whọ sae siọ ugho ba ẹwha fihọ cable TV ra evaọ omoke jọ? Kọ whọ sae gwọlọ oghẹrẹ efa nọ e rẹ rehọ ugho tere he? Wọhọ oriruo, ukpenọ whọ rẹ dẹ ebe whọ sai kpohọ elaebri nyai momo nọ a re jo mi ugho ho, hayo ukpenọ whọ rẹ dẹ ekasẹte whọ sae nyae haya.
Ame gbe ikpẹ. Whẹ avọ ahwo uviuwou ra wha sae ta kpahe epanọ wha gbẹ rọ raha ugho fihọ ikpẹ ẹlẹtriki, epẹtiro, gbe eware itieye na efa gahrọ họ jẹ sae maneji ame. Ikpẹ nọ a re furu no nọ a gbẹ be rehọ ai ru oware ovo ho gbe umutho ame nọ a rẹ rọ họ e rẹ sae jọ wọhọ nọ yọ okpoware ovo ho, rekọ e rẹ sai fiobọhọ nọ wha gbẹ rọ raha ugho gahrọ họ.
Emuore. Ukpenọ wha rẹ dẹ emu re evaọ obọ otafa, wha hai there emu obọrai evaọ obọ uwou. Ma omaa oghẹrẹ emu nọ wha re there. Ukpenọ wha rẹ dẹ ọvuọvo, wha sae dẹ ae buobu nọ o tẹ lọhọ. Yọ wha ku emu nọ wha re kiọkọ kufiẹ hẹ. Taure who te ti kpohọ obọ eki, kere eware nọ whọ gwọlọ dẹ fihotọ re whọ siọ eware nọ whọ gwọlọ dẹ hẹ ba ẹdẹ. Wha dẹ oghẹrẹ emuore nọ a rẹ ruẹ evaọ oria nọ wha rrọ, keme e rẹ jọ kuẹku. Whaha enuarewe nọ a rẹ dẹ re. Whọ sae jẹ kọ ebe nọ a rẹ re fihọ oria jọ evaọ ighẹ ra.
Iwu. Who mu iwu dẹ hẹ fikinọ whẹ gwọlọ kie lele ekpokpọ nọ i kie ze, rekọ otẹrọnọ enọ who wo vẹre ewho no whọ sae dẹ efa ro nwene ai. Whọ sae gwọlọ emamọ iwu ọkreka nọ e rrọ ziezi dẹ. Fọrọ iwu ra re whẹ rehọ ae ta uvo, ukpenọ whọ rẹ rehọ ae kpobọ edraeklina; onana u ti ru nọ whọ tẹ gbẹ rọ raha igho kufiẹ hẹ.
Eware ekpokpọ nọ whọ gwọlọ dẹ. Taure whọ tẹ te dẹ oware jọ, nọ omara nọ: ‘Kọ me wo ugho nọ mẹ sae rọ dẹe? Kọ oware na o gine wo iruo kẹ omẹ?’ Whẹ tẹ gwọlọ nwene etẹlẹvishọno, ifonu, hayo omoto ra, kọ whọ sae hẹrẹ omojọ jẹ maneji enọ who wo na re whẹ rọ ugho na ru oware ọfa? U te no ere no, kọ whọ sae zẹ eware nọ i gbe wo iruo kẹ owhẹ ha no? Onana u ti ru nọ araha ra u ti ro kpotọ, umugho jọ o vẹ jẹ jọ owhẹ obọ.
Oware jọ nọ u re fiobọhọ: Nọ ugho o gbẹ rrọ owhẹ obọ tere he, onana o sae lẹliẹ owhẹ siobọno eware jọ nọ whẹ jẹ raha igho fihọ vẹre wọhọ, ivovavovo, edhọ-ifio, gbe idieda-thomawa. Nọ who te bi ru inwene nana, u ti ru nọ ugho o te hae rọ jọ owhẹ obọ, uzuazọ ra u ve je woma vi epaọ ọsosuọ.
5. Wuhrẹ kpahe oware nọ Ebaibol na ọ ta.
Ehri-uzi Ebaibol: “Eva e were enọ e riẹ nọ u fo re a riẹ Ọghẹnẹ.”—Matiu 5:3.
Emamọ ohrẹ jọ o rrọ Ebaibol na, oye họ: “Areghẹ ọ rẹ thọ ohwo nwane wọhọ epanọ ugho o rẹ thọ ohwo na, rekọ oware nọ eriariẹ o rọ mai woma ona: Areghẹ ọ rẹ sẹro uzuazọ ọnọ o wo rie.” (Ọtausiuwoma Na 7:12) A rẹ jọ Ebaibol na ruẹ areghẹ nana, yọ ahwo buobu nọ a bi fi ẹme Ebaibol nana họ iruo a ta nọ u bi fiobọhọ kẹ ae nọ a gbẹ be rọ ruawa gaga kpahe ugho ho.—Matiu 6:31, 32.