Kọ O Sae Lọhọ re Akpọ O Woma kẹ Ahwo Kpobi?
Evaọ erẹwho buobu, ahwo a bi luje fiki epanọ eware e rrọ gaga kẹ ae yọ eware i bi woma kẹ amọfa. Ẹyao COVID-19 na u tube ru ẹbẹbẹ nana yoma thesiwa. Wọhọ oriruo, okpẹyao na u ru nọ ahwo a bi ro ru ozighi, nọ a ro fi izi họ re ahwo a keria uwou, nọ eki o bi ro kiekpe ahwo, u te je ru nọ ahwo buobu a gbẹ be sae rọ ruẹ ugho kpohọ ọspito ho. Eware nana i ru nọ ahwo a rọ ruẹ ohẹriẹ nọ o rrọ udevie ahwo nọ a fe gbe ahwo nọ a yogbe vi epaọ anwẹdẹ no.
Fikinọ eware e rrọ gaga, ahwo a be ruẹ uye. Kọ ẹgaga nana o ti notọ ẹdẹ jọ? Ee. Ebaibol na ọ ta kpahe epanọ Ọghẹnẹ o ti ro ku ebẹbẹ mai họ.
Ebẹbẹ nọ Ọghẹnẹ o ti kuhọ
Ẹbẹbẹ: Isu ahwo-akpọ a be sai ru eware nọ ahwo a gwọlọ kẹ ae he.
Epanọ o ti ro kuhọ: Ọghẹnẹ ọ te rehọ egọmeti riẹ nwene isuẹsu ahwo-akpọ. A re se egọmeti yena Uvie Ọghẹnẹ, yọ u ti su otọakpọ na soso no obọ odhiwu ze.—Daniẹl 2:44; Matiu 6:10.
Oware nọ u ti noi ze: Fikinọ egọmeti Ọghẹnẹ nana ọvo u ti su otọakpọ na soso, eware kpobi e te riẹ nya kpatiẹ. Ahwo a te gbẹ jọ iyogbe hayo ruẹ uye fiki ẹgaga akpọ họ. (Olezi 9:7-9, 18) Ukpoye, ohwo kpobi avọ ahwo uviuwou riẹ a te re erere iruo rai, a ti yeri emamọ uzuazọ, yọ eva e te were ae. Ebaibol na ọ ta nọ: “A te bọ iwou, a vẹ te rria eva rai, a te kọ egbọ evaene a vẹ te re ibi rai. A te bọ no re omọfa ọ rria ha, hayo a te kọ no re omọfa ọ re he.”—Aizaya 65:21, 22.
Ẹbẹbẹ: Ohwo-akpọ ọ sae whaha eware buobu nọ e be lẹliẹ ahwo ruẹ uye je ru akpọ bẹ ahwo nẹnẹ na ha.
Epanọ o ti ro kuhọ: Ọghẹnẹ ọ te rehọ Uvie riẹ si eware kpobi nọ e be lẹliẹ ozọ mu ahwo gbe eware nọ e be wha uye-oruẹ ze no.
Oware nọ u ti noi ze: Nọ Uvie Ọghẹnẹ u te mu otọakpọ na họ esuo no, eware nọ i re ru akpọ bẹ ahwo e te gbẹ jọ họ. Wọhọ oriruo, ẹmo, ohọo, gbe ikpeyao e te gbẹ jọ họ. (Olezi 46:9; 72:16; Aizaya 33:24) Ọghẹnẹ ọ ta nọ: “Ahwo mẹ a te rria oria nọ udhedhẹ o dafia, evaọ iwou nọ e foma gbe evaọ eria eriosehọ nọ e rrọ dhedhẹ.”—Aizaya 32:18.
Ẹbẹbẹ: Ahwo oriobọ avọ ahwo nọ a wo uvou-uthei a be hae wha ahwo re.
Epanọ o ti ro kuhọ: Ahwo kpobi nọ a te jọ otọ esuo Uvie Ọghẹnẹ a ti you ohwohwo, fikiere a te rọ ẹgwọlọ ọrivẹ rai karo.—Matiu 22:37-39.
Oware nọ u ti noi ze: Nọ Uvie Ọghẹnẹ u te mu otọakpọ na họ esuo no, ohwo kpobi o ti wo uvi uyoyou, onọ o rẹ “gwọlọ ewoma obọriẹ hẹ.” (1 Ahwo Kọrint 13:4, 5) Ebaibol na ọ ta nọ: “A te wha enwoma ọvo ze he hayo wha ọraha ọvo ze he evaọ ugbehru ọrẹri mẹ na soso, keme eriariẹ Jihovaa e te ginẹ vọ otọakpọ na wọhọ epanọ ame ọ vọ abade na.”—Aizaya 11:9.
Ebaibol na o dhesẹ nọ edẹ urere uyero-akpọ nana ma be rria na, yọ kẹle na Ọghẹnẹ o ti si ebẹbẹ nọ e be lẹliẹ eware jọ gaga kẹ ahwo-akpọ no.b (Olezi 12:5) Rekọ rri bọwo oke yena, ehrẹ Ebaibol e sai fiobọhọ kẹ owhẹ thihakọ ebẹbẹ ra enẹna. Wọhọ oriruo, se izoeme nana “Epanọ Whọ Sae rọ Maneji Ugho” gbe “A Balanced View of Money” (Epanọ U Fo nọ A re Rri Ugho).
a Ebaibol na o dhesẹ nọ Jihova họ odẹ Ọghẹnẹ.—Olezi 83:18.
b Re whọ riẹ oware nọ whọ sai ro fievahọ Ebaibol na, se uzoẹme na “Ebaibol Na—Obe Uzẹme nọ A rẹ Sai Fievahọ.”