Eme Ebaibol Ọ Ta Kpahe Akpọ nọ A be Raha Na?

“Eware nọ ahwo-akpọ a bi ru enẹna o te wha ọraha tha odẹ notha. Ame o ti ku ewho jọ soso. Ẹrrorro ọgaga nọ a re ruẹ obọ riẹ hẹ ọ te jariẹ. Ifou egaga nọ e re muozọ i ti fou. Ame ọ te gbẹ jariẹ tere he. A te gbẹ ruẹ oghẹrẹ erao gbe ire buobu hu. Orọnọ okpa ma bi bru họ ẹme na ha. Eware nọ egba-eriariẹ a be kiẹ via nẹnẹ u dhesẹ nọ ere akpọ na ọ te jọ nọ oke o be nya haro na.”—Ẹme nọ Osu United Nations ọ ta kpahe iyẹrẹ nọ i no obọ ukoko nọ a re se Intergovernmental Panel on Climate Change ze evaọ Ane 4, 2022.

Egba-eriariẹ a ta nọ ọraha nọ ẹrrorro ọgaga ọ be wha ze o ti te igege eriosehọ nọ i bu te egba ene gbe udhegbesa (423) evaọ obọ America, keme eria nana e gwọlọ ẹrrorro tere he. Ma bi rẹro okpẹtu nọ ọ wọhọ oghẹrẹ enọ enọ ma be hai se ku evaọ Ebiabol na. Eye họ, erae gbe owhe ologbo, ekpalekpa ame nọ e rẹ ghra, ebade nọ e te vọ kpọhọhwẹ, gbe ẹrrorro ọgaga.”—Uzoẹme na, “Flooding Chaos in Yellowstone, a Sign of Crises to Come,” evaọ The New York Times, Azeza 15, 2022.

Kọ u wo oware jọ nọ a te sai ru rọ ruẹrẹ akpọ mai nọ o bi dhe ẹrẹraha na? Otẹrọnọ Ee, kọ ono o ti ru ei? Rri ẹme nọ Ebaibol ọ ta.

A ruẹaro kpahotọ nọ eware e te via nọ e te wha ọraha fihọ akpọ na

Ebaibol ọ ta nọ Ọghẹnẹ ọ te “raha enọ e be raha otọakpọ na.” (Eviavia 11:18) Ebaibol na o fiobọhọ ke omai riẹ eware esa nana:

1. 1. Eware nọ ahwo-akpọ a bi ru e te wha ọraha fihọ akpọ na.

2. 2. Ọraha nọ a be wha ziọ akpọ na o ti kuhọ ẹdẹjọ.

3. 3. Ọghẹnẹ o ti ru nọ ọraha na o ti ro serihọ, orọnikọ ohwo-akpọ họ.

Akpọ mai na ọ te jọ wowoma evaọ obaro

Ebaibol na ọ ta nọ “otọakpọ na o rẹ jọ bẹdẹ bẹdẹ.” (Ọtausiuwoma Na 1:4) Yọ ọ te jọ epanọ a sae rọ rria ae bẹdẹ bẹdẹ.

• “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.”—Olezi 37:29.

A te ruẹrẹ akpọ mai na zihe kpohọ epanọ u fo nọ o rẹ jọ.

• “Udhude na avọ otọ oyaya na e te wereva, Yọ udhude opraprara na o te ghọghọ jẹ whẹ idodo họ wọhọ ododo safrọn.”—Aizaya 35:1.