HAI ROU!
Akpọ na Ọ be Rrorro Vrẹta Evaọ Akpọ-Soso—Kọ Eme Ebaibol na Ọ Ta Kpahe iẹe?
Evaọ amara Ahrẹ 2022, a jọ akpọ na soso niyẹrẹ nọ oria kpobi o be rrorro gaga:
“Evaọ amara nana, isiava soso egọmeti China ọ vẹvẹ ahwo unu no na inọ oria kpobi o te rrorro gaga evaọ enwenọ ikpewho 70.”—Ahrẹ 25, 2022, CNN Wire Service.
“Fiki ẹrrorro ọgaga nọ ọ rrọ ubrotọ Europe soso, erae e be to ewhawho gaga evaọ erẹwho buobu.”—Ahrẹ 17, 2022, The Guardian.
“Evaọ Ẹdoka, ikpewho buobu evaọ United States e jẹ rrorro gaga fiki ẹrrorro ezi ivo na. U kpomahọ ikpewho sa-sa nọ e rrọ ofẹ Abade ovatha-ọre, gbe ofẹ obọze ovatha-ọre.”—Ahrẹ 24, 2022, The New York Times.
Kọ eme o ti no onana ze? Kọ u dhesẹ nọ a te gbẹ sae rria akpọ na ha? Eme Ebaibol na ọ ta kpahe iẹe?
Kọ ẹrrorro ọgaga nọ ọ rrọ otọ na, u bi ru eruẹaruẹ Ebaibol gba?
Ee. A jọ Ebaibol na ruẹaro kpahe ẹrrorro ọgaga nọ ọ rrọ akpọ-soso na. Wọhọ oriruo, Jesu ọ ruẹaro nọ ma te ruẹ “eware idudu” hayo “eware nọ i re muozọ nọ a re ruẹ vẹre he.” (Luk 21:11; Good News Translation) Ẹrrorro nọ u bi dhẹ ẹgẹga evaọ akpọ-soso na o be lẹliẹ ozọ mu ahwo buobu inọ ahwo-akpọ a te raha otọakpọ na no.
Kọ akpọ na ọ te raha te epanọ a te gbẹ sae rọ rriae he?
Ijo. Ọghẹnẹ ọ ma otọakpọ na re ahwo a rriae bẹdẹ bẹdẹ. (Olezi 115:16; Ọtausiuwoma Na 1:4) Ọ te kẹ ahwo-akpọ uvẹ re a raha iẹe no ho, keme ọ ya eyaa nọ ọ te “raha enọ e be raha otọakpọ na” no.—Eviavia 11:18.
Joma ta ẹme kpahe eyaa efa nọ Ọghẹnẹ ọ ya evaọ eruẹaruẹ ivẹ jọ:
“Udhude na avọ otọ oyaya na e te wereva, yọ udhude opraprara na o te ghọghọ jẹ whẹ idodo họ wọhọ ododo safrọn.” (Aizaya 35:1) Ọghẹnẹ ọ te kuvẹ hẹ re otọakpọ na o raha fihọ oria nọ a sae rria ha, ukpoye ọ te ruẹrẹ eware gbe eria nọ e jariẹ raha.
“Whọ be rẹrote otọakpọ na, who bi ru ei mọ ibi buobu, je wou eware gaga.” (Olezi 65:9) Ọghẹnẹ o ti ru otọakpọ na zihe ruọ aparadase.
Re who gbe wuhrẹ kpahe epanọ akpọ mai na nọ u bi dhe enwenwene na u bi ro ru eruẹaruẹ Ebaibol gba, se uzoẹme na “Oware nọ Ebaibol Ọ Ta Kpahe Okogho Akpọ Mai na nọ U bi Dhe Ẹrẹraha gbe Epanọ Odẹnotha Ọ Te Jọ.”
Re who gbe wuhrẹ kpahe eyaa nọ Ebaibol na ọ ya inọ a te ruẹrẹ akpọ na, se uzoẹme na, “Ono O ti Siwi Otọakpọ Na?”