HAI ROU!

A be rọ Igbeke Kpe Ahwo Ugbekpe Evaọ Akpọ-Soso—Kọ Eme Ebaibol na Ọ Ta Kpahe iẹe?

A WARIẸ KERE IEI EVAỌ: Ane 27, 2023

A gbẹ be rehọ igbeke mu kpe ahwo evaọ akpọ na soso. Nọ imiriruo jọ gheghe nọ e via kẹle na.

“Kukpe kukpe evaọ US a bi kpe ahwo buobu gaga, yọ o tẹ kawo ẹsiẹvo evaọ ẹkpoka.”—Ane 21, 2023, The Guardian.
“A kpe imakpe soso evaọ uviuwou ovo jọ evaọ okenọ ahwo jọ a je mu sa ahwo kpe evaọ uwou jọ evaọ South Africa. Imahrẹ evaọ usu rai yọ emetẹ, gbe ọmọzae ọvo jọ nọ ọ rrọ ikpe ikpegbesa.”—Ane 21, 2023, AP News.
“Evaọ Germany, ohwo jọ nọ ọ wọ ugbeke ọ sa imazeza kpe evaọ ọgwa nọ Isẹri Jihova a re kokohọ jọ gọ Ọghẹnẹ evaọ Hamburg, kẹsena o te kpe omobọ riẹ no.”—Asa 10, 2023, Reuters.

Ebaibol na ọ sae sasa ahwo nọ eware iyoma itienana e via kẹ oma. Re whọ ruẹ ohwo jọ nọ oware utiona o via kẹ dẹẹ, rri ividio nana, DeJanerio Brown: Iyẹ I Yomẹ Rekọ Jihova Ọ Nyasiọ Omẹ Ba Ha.

Ebaibol o te je fiobọhọ kẹ omai riẹ oware nọ eware iyoma itieye e be rọ via. Re who muhọ ewuhrẹ kpahe uzoẹme nana, rri ividio nana, Fikieme Ọghẹnẹ Ọ jẹ Kuvẹ kẹ Uye-Oruẹ?

Evaọ amara Ahrẹ 2022, a jọ akpọ na soso rehọ igbeke ru ozighi sa-sa nọ i gbe ahwo unu gaga:

“Ọzae jọ nọ a re se Shinzo Abe nọ ọ jọ osu Japan vẹre nọ a riẹ odẹ gaga nọ a kpe, o wha ẹvohẹ fihọ orẹwho na, u te je gbe ahwo buobu unu evaọ akpọ na soso keme a rẹ jọ orẹwho na ru ozighi tere he, a te je wo izi egaga nọ a fihọ kpahe igbeke.”—Ahrẹ 10, 2022, The Japan Times.
“U gbe ahwo Denmark unu nọ ọzae jọ nọ ọ wha ugbeke o kpe imasa evaọ uwou-eki ologbo jọ nọ o rrọ Copenhagen.”—Ahrẹ 4, 2022, Reuters.
“Evaọ South Africa: Ahwo ikpegbisoi a whu nọ ezae jọ nọ e wha igbeke a mu ahwo họ ẹsa evaọ oria nọ ahwo a rẹ jọ da udi evaọ Soweto.”—Ahrẹ 10, 2022, The Guardian.
“Ahwo nọ a bu viọ egba ivẹ gbe udhe (220) a sa kpe evaọ U.S. evaọ etoke ehaa eriosehọ nọ a ru evaọ ẹdẹ avọ 4 Ahrẹ.”—Ahrẹ 5, 2022, CBS News.

Kọ ẹruore ọ riẹ inọ ozighi itieye na i ti kuhọ ẹdẹ jọ? Eme Ebaibol na ọ ta kpahe iẹe?

Ozighi O ti Kuhọ

Ebaibol na o se oke nana nọ ma rrọ na “edẹ urere na.” Oke nọ ahwo a te rọ jọ eva gaga, dhuaro, mu ofu-ọkpoo je ru eware imuomu sa-sa. (2 Timoti 3:1, 3) Ozighi nọ a bi ru o lẹliẹ ozọ rrọ ahwo oma. (Luk 21:11) Rekọ Ebaibol na ọ ya eyaa nọ oke o be tha nọ ozighi o ti kuhọ, ‘ahwo a vẹ te rria oria nọ udhedhẹ o dafia, evaọ iwou nọ e foma gbe evaọ eria eriosehọ nọ e rrọ dhedhẹ.’ (Aizaya 32:18) Oghẹrẹ vẹ ozighi o ti ro kuhọ?

Ọghẹnẹ o ti si ahwo omuomu no jẹ raha ekwakwa ẹmo kpobi no.

“Rọkẹ irumuomu na, a ti kpe ai no otọakpọ na.”—Itẹ 2:22.
“[Ọghẹnẹ] o bi ru emo serihọ evaọ otọakpọ na soso. O wiri uze na jẹ guọghọ ozuẹ na; ọ rọ erae mahe ekẹkẹ ẹmo na.”—Olezi 46:9.

Ọghẹnẹ o ti wuhrẹ ahwo re a rria dhedhẹ, ọ vẹ te rọ ere si eware nọ e be lẹliẹ ahwo ru ozighi na notọ.

“A te wha enwoma ọvo ze he hayo wha ọraha ọvo ze he evaọ ugbehru ọrẹri mẹ na soso, keme eriariẹ Jihova e te ginẹ vọ otọakpọ na wọhọ epanọ ame ọ vọ abade na.”—Aizaya 11:9.
Makọ enẹna, Ọghẹnẹ o bi wuhrẹ ahwo inọ a siọ ozighi ba jẹ siọ ekwakwa ẹmo ba ẹwọ, re a “duwu egbọdọ rai zihe ruọ etẹkpẹ” je “duwu izuẹ rai zihe ruọ ibrẹbe.”—Maeka 4:3.

Re who gbe wuhrẹ kpahe eyaa nọ Ebaibol na ọ ya inọ ozọ o gbẹ te jọ akpọ na ha, se uzoẹme na “Freedom From Fear—Is It Possible?”

Re who gbe wuhrẹ kpahe epanọ ozighi o ti ro notọ bẹdẹ bẹdẹ, se uzoẹme na “Peace on Earth at Last!”