Eme Ebaibol na Ọ Ta Kpahe Ileleikristi gbe Ẹmo-Ofio?

Evaọ ẹmo nọ a bi fi evaọ obọ Ukraine na, isu egagọ Ileleikristi buobu a be tuduhọ ahwo awọ re a dhomahọ ẹmo na. Muẹrohọ oghẹrẹ nọ isu-egagọ nọ e rrọ ofẹ sa-sa a be rọ tha ẹmo na uke:

• “Ma bi yere egbaẹmo mai kpobi nọ e be thọ Ukraine no obọ ewegrẹ mai . . . Ma dikihẹ emu rai yọ ma be lẹ roro owhai ẹsikpobi.”—Metropolitan Epiphanius I of Kyiv, wọhọ epanọ a niyẹrẹ evaọ The Jerusalem Post, Asa 16, 2022.

• “Ọnọ o wuzou ichọche Russian Orthodox Church, o ru egagọ obọdẹ jọ kẹ isoja Russia evaọ Ẹdoka. Ọ ta kẹ ae nọ jọ a họre kẹ orẹwho rai keme ae nọ a rrọ ‘ahwo Russian na ọvo a rẹ sae thọ’ orẹwho rai evaọ ẹmo nọ a bi fi evaọ obọ Ukraine na.”—Reuters, Ane 3, 2022.

Kọ u fo nọ Ileleikristi a re dhomahọ ẹmo? Eme Ebaibol na ọ ta?

Oware nọ Ebaibol na ọ ta

Ebaibol na o dhesẹ nọ Ileleikristi uzẹme a re dhomahọ ẹmo-ofio ho.

• “Zihe ọgbọdọ ra fihọ oria riẹ, keme enọ e tọlọ ọgbọdọ kpobi i ti whu uwhu ọgbọdọ.”—Matiu 26:52.

  Nọ ohwo o te bi dhomahọ ẹmo hayo họre evaọ ẹmo, kọ o bi gine yoẹme kẹ Jesu?

• “Mẹ be kẹ owhai ujaje okpokpọ inọ wha you ohwohwo; nwane wọhọ epanọ me you owhai na, wha you ohwohwo re. Ẹkwoma onana ahwo kpobi a te rọ riẹ nọ whai yọ ilele mẹ, otẹrọnọ wha te wo uyoyou evaọ udevie rai.”—Jọn 13:34, 35.

  Nọ ohwo o te bi dhomahọ ẹmo, kọ ọ sae ta nọ o bi dhesẹ uyoyou nana nọ Jesu ọ ta nọ a ti ro vuhu ilele riẹ na?

Re whọ gbẹ riẹ kpahe ẹme nana, se uzoẹme na “Is War Compatible With Christianity?”

Ileleikristi gbe ẹmo nọ a bi fi enẹna

Kọ o lọhọ re Ileleikristi a siọ oma ba edhehọ ẹmo evaọ akpọ inẹnẹ na? Ee. Ebaibol na ọ ta nọ evaọ oke mai nana nọ a se “edẹ urere na,” ahwo nọ a no erẹwho sa-sa ze a ti ru oware nọ Jesu ọ ta keme a ti gbe “wuhrẹ ẹmo-ofio ofa ha.”—Aizaya 2:2, 4, ẹme-obotọ.

• Re whọ gbẹ riẹ kpahe ẹme nana, se Uwou-Eroro nana nọ uzoẹme riẹ o ta nọ “How Does God View War?”

Kẹle na Jihova,a “Ọghẹnẹ udhedhẹ na,” ọ te rọ egọmeti obọ odhiwu riẹ siwi ahwo “no okienyẹ gbe ozighi.”—Ahwo Filipai 4:9; Olezi 72:14.

• Re whọ riẹ oghẹrẹ nọ o ti ro ru onana, rri ividio na Eme Họ Uvie Ọghẹnẹ?