HAI ROU!
Eme Ebaibol na Ọ Ta Kpahe Etọ nọ E te Ya Fia?
“A jọ China niyẹrẹ nọ ukpe nana ẹrrorro ọmae ga kpaobọ,’ gbe ọrọ avesa nọ etọ e rọ mae ya fia evaọ ezi ivo.”—The Guardian, Azie 7, 2022.
“Ukpe nana họ ukpe avọ isoi nọ etọ e be rọ ya fia evaọ ofẹ Africa jọ, yọ a ta nọ o te gbẹ jọ ere.”—UN News, Aria 26, 2022.
“Nọ a tẹ ghale Europe kpohọ abasa, a ta nọ abava ọ te ya fia fiki iso nọ e te rrọ họ, yọ o wọhọ nọ onana o te mai yoma nọ a tẹ rehọ iẹe wawo enọ e via no anwọ ikpe egba isoi (500) nọ i kpemu.”—BBC News, Aria 23, 2022.
Egba-eriariẹ a ta nọ fiki iso nọ e te rrọ họ, etọ e te gbẹ ya fia, yọ u ti tube yoma vi enẹ dede. Kọ ẹruore jọ ọ riẹ inọ eware i ti woma evaọ obaro? Eme Ebaibol na ọ ta?
Etọ nọ E te Ya Fia gbe Eruẹaruẹ Ebaibol
A jọ Ebaibol na ruẹaro kpahe oke mai na inọ:
“No oria ruọ oria ohọo u ti mu.”—Luk 21:11.
Nọ iso e gbẹ be rrọ họ, ohọo u re mu keme eria kpobi e rẹ ya fia. Nọ ohọo u te bi mu, ahwo a rẹ ruẹ uye je whu. A jọ Ebaibol na ruẹaro nọ eware nana e te via.—Eviavia 6:6, 8.
Oware nọ ẹbẹbẹ etọ nọ e be ya fia na u bi ro dhe eyeyoma
Ebaibol na ọ ta kpahe oware nọ o soriẹ ze nọ ẹbẹbẹ nana o bi ro dhe eyeyoma. Ọ ta nọ:
“Ohwo-akpọ nọ ọ be nya onya o wo ogaga nọ ọ rẹ rọ tubẹ kpọ ithihi riẹ dede he.”—Jerimaya 10:23.
Onana u dhesẹ nọ ahwo-akpọ a sae “kpọ ithihi” rai hayo su omarai hi. Ẹsibuobu, eware nọ a bi ru o sae whae ze nọ iso e gbẹ rọ rrọ họ, eria kpobi e vẹ ya fia.
Egba-eriariẹ buobu a rọwo nọ eware nọ ahwo-akpọ a bi ru eye e be wha ẹrrorro fihọ akpọ na. Onana o whae riẹ ze nọ eria buobu e be rọ ya fia.
Fiki uvou-uthei gbe izi nọ ahwo-akpọ a bi fihọ yọ a bi roro kpahe obaro ho, ahwo a bi kpe ewhawho, nua etọ, jẹ raha eware efa nọ e rrọ otọakpọ na. Onana o wha riẹ ze nọ eria nọ ame ọ rẹ jọ e be rọ yamu no.
Rekọ Ebaibol na o dhesẹ nọ ma wo ẹruore.
Kọ ẹruore jọ ọ riẹ inọ eware i ti woma evaọ obaro?
Ọghẹnẹ ọ ya eyaa evaọ Ebaibol na inọ o ti ku ẹbẹbẹ etọ nọ e be ya fia na họ. Evaọ oghẹrẹ vẹ?
1. Ọghẹnẹ ọ te “raha enọ e be raha otọakpọ na” no. (Eviavia 11:18) Ọghẹnẹ o ti si ahwo omuomu gbe ahwo nọ a wo uvou-uthei no otọakpọ na. A rrọ usu eware nọ e be wha ẹbẹbẹ etọ nọ e be ya fia na ze keme a bi ru eware nọ e rẹ raha otọakpọ na.—2 Timoti 3:1, 2.
2. “Otọ nọ o ya fia kokoroko o ti zihe ruọ ẹtẹre-ame nọ ikpoko e rrọ.” (Aizaya 35:1, 6, 7) Ọghẹnẹ ọ te wariẹ ru eware kpobi nọ e raha no fihọ wowoma, je ru otọakpọ na fihọ aparadase nọ ẹbẹbẹ etọ nọ e te ya fia ọ te gbẹ jọ họ.
3. “Whọ be rẹrote otọakpọ na, who bi ru ei mọ ibi buobu, je wou eware gaga.” (Olezi 65:9) Emu ọ te dafia yọ emamọ ame ọ te jariẹ keme Ọghẹnẹ ọ te rọ eware nana kpobi ghale ahwo-akpọ.