Fikieme Ipolitisi E be rọ Hẹriẹ Ahwo Gaga?—Eme Ebaibol na Ọ Ta?

Evaọ akpọ na soso, ipolitisi e be hẹriẹ ahwo gaga. Nọ Pew Research Center o jọ erẹwho ikpegbizii ru ekiakiẹ evaọ 2022, ahwo nọ a te ahwo no evaọ erẹwho yena nọ a bu vrẹ abọ ọvo a ta nọ ahwo nọ a rrọ itu ipolitisi sa-sa a be hai lele ohwohwo whọ gaga.

Kọ who muẹrohọ no inọ ipolitisi e be hẹriẹ ahwo gaga evaọ oria nọ whọ be rria? Kọ eme ọ be whae ze? Kọ ẹbẹbẹ na o ti notọ ẹdẹ jọ? Ma rri oware nọ Ebaibol na ọ ta.

Iruemu nọ e be hẹriẹ ahwo

Ebaibol na ọ ruẹaro nọ “evaọ edẹ urere na,” koyehọ oke mai nana, ahwo buobu a ti wo iruemu nọ o te whae nọ a gbe ti wo okugbe he.

• “Evaọ edẹ urere na, oke obẹbẹ nọ o rẹ bẹ ẹria o te jọ. Keme ahwo a ti you omobọ rai . . . a te rọwo ru ọtamuo ho.”—2 Timoti 3:1-3.

Dede nọ ahwo buobu a be daoma gaga re eware e riẹ nya evaọ egọmeti, eware e be riẹ nya ghele he. O be jọ bẹbẹ kẹ ahwo re a kuobọgbe ku ebẹbẹ họ fikinọ ọvuọ iroro rai a wo. Oware nọ u bi no oma nọ a be dawo ze u dhesẹ nọ ẹme nọ Ebaibol na ọ ta no anwẹdẹ na ginọ uzẹme.

• “Ohwo o . . . su ọrivẹ riẹ ruọ uye” no.—Ọtausiuwoma Na 8:9.

Rekọ Ebaibol na ọ fodẹ oware nọ u ti ku ẹbẹbẹ na họ. Oye họ egọmeti nọ ohwo nọ ọ sai si ebẹbẹ nọ e rrọ akpọ na no o ti su.

Osu nọ o te nọ ọ be daezọ ahwo

Ebaibol na o dhesẹ nọ Jesu Kristi ọvo o te ohwo nọ ọ rẹ sai ku ebẹbẹ akpọ na họ. Jesu o wo ogaga gbe udu nọ ọ sai ro ru ei. O tẹ jẹ riẹe oja gaga re ahwo-akpọ kpobi a wo okugbe gbe udhedhẹ.

• “Evaọ oke riẹ, ikiẹrẹe na e te gbọ bọbọbọ, yọ udhedhẹ o te dafia.”—Olezi 72:7.

• “Yọ erẹwho na kpobi a te gbodibo kẹe.”—Olezi 72:11.

Jesu ginọ emamọ osu keme ọ be daezọ ahwo, yọ ọ gwọlọ nọ o re fiobọhọ kẹ ae, maero kọ ahwo nọ a bi kienyẹ.

• “O ti siwi oyogbe nọ o bi bo kẹ obufihọ na, te oruori na avọ ohwo kpobi nọ o wo ofiobọhọ họ. Ọ te re ohrọ oruori na gbe oyogbe na, yọ o ti siwi uzuazọ iyogbe na. O ti siwi ai no okienyẹ gbe ozighi, yọ azẹ rai ọ te jọ ghaghae evaọ aro riẹ.”—Olezi 72:12-14.

Gbe wuhrẹ kpahe Uvie Ọghẹnẹ, egọmeti obọ odhiwu nọ Jesu ọ bi su na. Wuhrẹ kpahe erere nọ o ti noi ze te owhẹ gbe epanọ whọ sai ro dhesẹ nọ abọ riẹ whọ rrọ.

• Rri ividio na Eme họ Uvie Ọghẹnẹ?

• Se uzoẹme na “Uvie Ọghẹnẹ Yọ Egọmeti nọ Ofruriọ Ọ te Jọ Họ.”