Ahwo Egọmeti nọ A Wuzou Ofẹ Usiwo-Imu A be Vẹvẹ Unu Kpahe Ebẹbẹ nọ Itanẹte O be Wha se Izoge—Eme Ebaibol na Ọ Ta?

Evaọ edẹ 23 amara Asoi, 2023, ohwo egọmeti jọ nọ o wuzou ofẹ usiwo-imu evaọ United States, ọ vẹvẹ ahwo unu kpahe ebẹbẹ nọ itanẹte o be wha se izoge buobu.

• “Dede nọ itanẹte o sai fiobọhọ kẹ emaha gbe izoge jọ, eware nọ e be via i dhesẹ nọ itanẹte o be wha ebẹbẹ buobu wọhọ ẹyao iroro gbe eyao efa se emaha gbe izoge buobu.”—Social Media and Youth Mental Health: The U.S. Surgeon General’s Advisory, 2023.

A jọ obe na fodẹ ekiakiẹ sa-sa nọ a ru nọ o rọ gwọlọ nọ ma re roro kpahe ẹme nana ziezi.

• Izoge nọ e rrọ unuikpe 12 rite 15 “nọ e be hae raha vrẹ euwa esa kẹdẹ kẹdẹ evaọ itanẹte, ae họ enọ e rẹ mai wo ẹbẹbẹ ẹyao iroro wọhọ ọkora ọgaga gbe awaọruọ.”

• Evaọ usu izoge nọ e rrọ ikpe 14, “enọ i re kpohọ itanẹte gaga a rẹ sae wezẹ tere he, a rẹ nyaku ahwo nọ a rẹ gwọlọ ae ẹme evaọ itanẹte, a re roro nọ a wo erru hu, a re rri oma rai nọ a fioka ha, yọ a re wo ọkora ọgaga. Yọ emetẹ a rẹ mai wo ebẹbẹ nana vi emezae.”

Ẹvẹ esẹgbini a sae rọ thọ emọ rai no ebẹbẹ nana? Joma ta kpahe ehrẹ Ebaibol jọ nọ e rẹ sai fiobọhọ.

Oware nọ esẹgbini a rẹ sai ru

Ru oware jọ. Whai esẹgbini, wha roro kpahe ebẹbẹ nọ e rẹ sai no itanẹte ze re wha riẹ sọ wha rẹ kẹ emọ rai uvẹ kpohọ itanẹte hayo kẹ ae uvẹ hẹ.

• Ohrẹ Ebaibol: “Wuhrẹ ọmọ edhere nọ u fo nọ ọ rẹ nya.”—Itẹ 22:6.

• Re whọ gbẹ riẹ kpahe eware efa, se uzoẹme na “Kọ U Fo re Ọmọ Mẹ O Fi Eware Họ Itanẹte je Rri Enọ Ahwo A Fihọ?”

Whọ tẹ kẹ ọmọ ra uvẹ re o kpohọ itanẹte, daoma riẹ kpahe ebẹbẹ nọ e rẹ sai noi ze gbe eware nọ o bi ru evaọ itanẹte. Ẹvẹ whọ sai ro ru onana?

Thọ ọmọ ra no eware nọ e rẹ wha ebẹbẹ ze evaọ itanẹte. Wuhrẹ ọmọ ra re ọ riẹ eware nọ e rẹ wha ẹbẹbẹ ze evaọ itanẹte, re ọ kẹnoma kẹ eware itieye na.

• Ohrẹ Ebaibol: “Jọ a tubẹ fodẹ ọfariẹ-ogbe gbe oghẹrẹ egbegbe ọvuọvo hayo uvou-uthei evaọ udevie rai hi, . . . hayo uruemu omovuọ hayo eme igheghẹ eta hayo eme oworu nọ a rẹ ta rọ hwehwẹ hẹ.”—Ahwo Ẹfisọs 5:3, 4.

• Re whọ riẹ kpahe eware jọ nọ e rẹ sai fiobọhọ, se uzoẹme na “Wuhrẹ Ọmọ Ra Kpahe Epanọ Ọ rẹ rọ Yọroma Evaọ Itanẹte.”

Fi izi họ kẹe. Wọhọ oriruo, whọ sai fi izi họ kẹe kpahe oke nọ o re ro kpohọ itanẹte gbe epanọ ọ rẹ raha oke kri te.

• Ohrẹ Ebaibol: “Wha fiẹrohotọ ziezi re wha ruẹ nọ oghẹrẹ nọ wha be nya o rrọ . . . wọhọ ahwo nọ a wo areghẹ, wha hae rehọ oke rai ruiruo evaọ edhere nọ ọ mai woma.”—Ahwo Ẹfisọs 5:15, 16.

• Rọ ividio Wo Areghẹ t’Oma Kpahe Egbẹnyusu Itanẹte na ro wuhrẹ ọmọ ra re ọ riẹ oware nọ u ro fo re ọ riẹ umuo nọ ọ rẹ nya ba evaọ itanẹte.