Kọ Eria Itanẹte nọ A Sae Jọ Nyusu Kugbe Amọfa E be Wha Uye Se Ọmọ Ra?—Epanọ Ebaibol Ọ Sai ro Fiobọhọ kẹ Esẹgbini

“O gwọlọ nọ a re ru oware jọ vẹrẹ vẹrẹ kpahe ẹyao iroro nọ izoge buobu a be mọ nẹnẹ na, yọ oware jọ nọ o be mae whae ze họ itanẹte nọ a be jọ nyusu kugbe amọfa.”—Dr. Vivek Murthy, U.S. surgeon general, New York Times, Azeza 17, 2024.

Ẹvẹ esẹgbini a sae rọ thọ emọ rai no enwoma nọ e rrọ oria itanẹte nọ a rẹ jọ nyusu kugbe amọfa? Ehrẹ Ebaibol e sai fiobọhọ.

Oware nọ esẹgbini a rẹ sai ru

Roro kpahe ehrẹ Ebaibol nana.

“Ọnọ o wo orimuo o re rri otọ mu re ọ tẹ te jowọ.”—Itẹ 14:15.

Fiki enwoma nọ i re no itanẹte nọ a rẹ jọ nyusu ze, o gbahọ nọ whọ rẹ kẹ ọmọ ra uvẹ re ọ nyusu kugbe amọfa evaọ itanẹte he. Re whọ tẹ te kẹ ọmọ ra uvẹ re o kpohọ eria itanẹte nọ a rẹ jọ nyusu kugbe amọfa, ruẹ nọ ọmọ ra o wo areghẹ te epanọ ọ sae rọ nya ba oke nọ who fihọ kẹe, salọ emamọ egbẹnyusu, jẹ whaha oware kpobi nọ u yoma evaọ itanẹte.

• Re whọ gbẹ riẹ kpahe eware efa, se izoẹme nana “Kọ U Fo re Ọmọ Mẹ O Fi Eware Họ Itanẹte je Rri Enọ Ahwo A Fihọ?” gbe “Wuhrẹ Ọmọ Ra Kpahe Epanọ Ọ rẹ rọ Yọroma Evaọ Itanẹte.”

“Wha hae rehọ oke rai ruiruo evaọ edhere nọ ọ mai woma.”—Ahwo Ẹfisọs 5:16.

Nọ whọ tẹ kẹ ọmọ ra uvẹ re o kpohọ eria itanẹte nọ a rẹ jọ nyusu kugbe amọfa, fi izii họ kẹe, jẹ vuẹe epanọ izii na e te rọ thọe nọ o te ru lele ae. Hai muẹrohọ ọmọ ra sọ uruemu riẹ u bi nwene. Nọ whọ tẹ ruẹ nọ uruemu riẹ o be rọ ẹmẹrera yoma, onana o sai fiobọhọ kẹ owhẹ riẹ sọ whọ rẹ whaha iẹe itanẹte nọ o re kpohọ.

• Rehọ ividio eware nọ a drọ fihọ ebọdo ọfuafo na Wo Areghẹ t’Oma Kpahe Egbẹnyusu Itanẹte fiobọhọ kẹ ọmọ ra re ọ riẹ oware nọ u ro fo re ma yọroma evaọ eria itanẹte nọ a rẹ jọ nyusu kugbe amọfa.

Wuhrẹ eware efa

Ebaibol na ọ ta nọ ma rrọ “oke obẹbẹ nọ o rẹ bẹ ẹria.” (2 Timoti 3:1-5) Ma rẹ jọ Ebaibol na ruẹ ehrẹ nọ i re fiobọhọ kẹ omai thihakọ. A jọ izoẹme sa-sa nọ i bu vrẹ udhe nọ a jọ ta kpahe izoge nọ e be mọ ẹyao iroro kẹ esẹgbini avọ emọ rai ehrẹ nọ e rẹ sai fiobọhọ kẹ ae. Ebaibol a kere izoẹme na no ze.