E+/taseffski/via Getty Images (Stock photo. Posed by model.)
HAI ROU!
Izoge nọ E be Mọ Ẹyao Iroro I bi Dhe Ebuebu—Eme Ebaibol na Ọ Ta?
Evaọ Ẹdọvo-Oka, ẹdẹ avọ 13 Ava, 2023, utu nọ a re se Centers for Disease Control and Prevention (CDC) evaọ obọ United States o siobọno iyẹrẹ ekiakiẹ jọ nọ a ru kpahe ẹyao iroro nọ emọ nọ e rrọ unu ikpe ikpegbesa rite ikpegbizii nọ e rrọ obọ U.S. a be mọ. Iyẹrẹ na e ta nọ enwenọ abọvo emọ nọ e rrọ ekọleji a be hae jọ ọkọkora no oke te oke, yọ o be hae jarae oma nọ a gbe wo ẹruore he.
Dr. Kathleen Ethier nọ o wuzou CDC’s Division of Adolescent and School Health (DASH) ọ ta nọ: “Anwọ ikpe 10 ze na, ma muẹrohọ no inọ izoge nọ e be mọ ẹyao iroro i bi dhe ebuebu. Rekọ nọ ma be ta ẹme na, oghẹrẹ nọ emetẹ nọ e rrọ ikpe ikpegbọ a be rọ mọ ẹyao iroro je roro kpahe epanọ a re ro kpe omarai no, u tube yoma vi epaọ ọsosuọ no.”
Iyẹrẹ na e ta re nọ:
Evaọ emetẹ udhusoi kpobi nọ e rrọ ikpe ikpegbọ, ikpegbene evaọ usu rai a gbahọ no re a lele ọzae wezẹ dede nọ a gwọlọ ere he. Dr. Ethier ọ ta nọ: “Onana u yoma kẹhẹ. Oyena u dhesẹ nọ evaọ usu emetẹ 10 kpobi nọ e rrọ ikpe ikpegbọ nọ whọ riẹ, omọvo evaọ usu rai hayo bu vi ere a gbadu no.”
Evaọ emetẹ udhusoi kpobi nọ e rrọ ikpe ikpegbọ, 30 evaọ usu rai eye e gwọlọ nọ a re kpe omarai no.
Evaọ emetẹ udhusoi kpobi nọ e rrọ ikpe ikpegbọ, 57 evaọ usu rai a be hae jọ ọkọkora no oke te oke, yọ o be hae jarae oma nọ a gbe wo ẹruore he.
Ẹbẹbẹ nana nọ ọ rrọ otọ na o kuye kẹhẹ. U fo nọ oke uzoge o rẹ jọ oke nọ ohwo ọ rẹ rọ were eva jẹ ghọghọ. Eme ọ sai fiobọhọ kẹ izoge thihakọ ebẹbẹ nọ i bi te ai nẹnẹ? Eme Ebaibol na ọ ta?
Ebaibol na ọ kẹ izoge ehrẹ nọ e rẹ sai fiobọhọ
Ebaibol na ọ ta vevẹ nọ eware e te jọ gaga evaọ etoke nana nọ ma be rria na. O se etoke nana “oke obẹbẹ nọ o rẹ bẹ ẹria.” (2 Timoti 3:1-5) O make rrọ ere na, Ebaibol na ọ kẹ obọdẹ ehrẹ nọ i bi fiobọhọ kẹ izoge buobu evaọ akpọ na soso nọ a be sai ro thihakọ ebẹbẹ nọ i bi te ai. Rri izoẹme nana nọ a kere no Ebaibol ze na.
Obufihọ kẹ izoge nọ i bi roro kpahe epanọ a re ro kpe omarai no
Obufihọ kẹ izoge nọ eva e be were he, nọ e rrọ ọkora
Epanọ Ma Sae rọ Siọ Ọkora Ba jẹ Were Eva (eware nọ a drọ fihọ ebọdo ọfuafo)
Obufihọ kẹ izoge nọ amọfa a be gwọlọ ẹme hayo enọ a be jọ itanẹte gwọlọ ẹme
Kpe Ọgwọlọ-Ẹme Ababọ Obọ nọ Who re Dhe Tei (eware nọ a drọ fihọ ebọdo ọfuafo)
Obufihọ kẹ izoge nọ emetẹ hayo emezae a be lẹliẹ gbe enọ a gbadu
Ebaibol na ọ kẹ esẹgbini ehrẹ nọ e rẹ sai fiobọhọ
Ebaibol na ọ tẹ jẹ kẹ esẹgbini obọdẹ ehrẹ nọ i re fiobọhọ kẹ ae re a sai fiobọhọ kẹ emọ rai nọ e gbẹ rrọ uzoge re a sai thihakọ ebẹbẹ nọ i bi te ai. Rri izoẹme nana nọ a kere no Ebaibol ze na.