OBUFIHỌ RỌKẸ UVIUWOU | ỌMỌ-ỌYỌRỌ
Emọ avọ Itanẹte—Abọ avọ 2: Wuhrẹ Ọmọ Ra Kpahe Epanọ Ọ rẹ rọ Yọroma Evaọ Itanẹte
Fiki ebẹbẹ nọ itanẹte ọ rẹ sae wha ze, esẹgbini buobu a rẹ rọwo nọ emọ rai a kpohọ itanẹte he. Rekọ whọ tẹ kẹ ọmọ ra nọ o te uzoge no uvẹ re o kpohọ itanẹte, ẹvẹ whọ sai ro fiobọhọ kẹe yọroma re o gbe kie ruọ ẹbẹbẹ hẹ, je ru eware avọ areghẹ?
Ma te ta kpahe eware nana
Eware nọ e mae roja kẹ ọmọ ra
Oware nọ u fo nọ whọ rẹ riẹ: Fikinọ itanẹte ọ sae were ohwo te epanọ ọ rẹ rọ gwọlọ kpohọ iẹe ẹsikpobi, o gwọlọ nọ who re fiobọhọ kẹ ọmọ ra riẹ umuo oke nọ ọ rẹ raha evaọ itanẹte.
Ohrẹ Ebaibol: “Vuhu eware nọ e mae roja.”—Ahwo Filipai 1:10.
Roro kpahe onana: Kọ itanẹte ọ be hae whaha ọmọ ra nọ o te uzoge no owezẹ, o bi ru nọ ọ gbẹ be sai ro ru ihomwhọko riẹ hẹ, hayo kuomagbe ahwo uviuwou na ha? Ahwo nọ a rẹ kiẹ kpahe eware a ta nọ o gwọlọ nọ izoge a rẹ wezẹ te euwa eree hayo izii evaọ aso, rekọ nọ a tẹ raha oke buobu fihọ itanẹte, a rẹ gbẹ sae wezẹ te euwa ihrẹ dede he.
Oware nọ whọ rẹ sai ru: Lele ọmọ ra ta ẹme re ọ riẹ eware nọ e mae roja evaọ uzuazọ, gbe oware nọ u ro fo nọ ọ rẹ raha oke ga hrọ họ evaọ itanẹte. Fi izi jọ họ kẹe. Wọhọ oriruo whọ sae ta kẹe nọ ifonu riẹ ọ rọ jọ ubrukpẹ nọ o bi kiẹzẹ evaọ aso ho. Oware nọ who bi ro ru onana họ re o wo oma-onyẹ, keme uruemu nana u ti fiobọhọ kẹe nọ o te te ohwo no.—1 Ahwo Kọrint 9:25.
Oghẹrẹ nọ itanẹte o re ro kpomahọ iroro ọmọ ra
Oware nọ u fo nọ whọ rẹ riẹ: Nọ uzoge ọ tẹ ruẹ ifoto amọfa nọ a rọ ifonu hayo ekọmputa ru fihọ wowoma evaọ itanẹte gbe ifoto eware nọ egbẹnyusu riẹ a ru nọ a jẹ jọ reakpọ kuoma, onana o sae lẹliẹe jọ ọkọkora, roro iroro hayo ru nọ oma o rẹ rọ jariẹ goli.
Ohrẹ Ebaibol: “Siobọno . . . ihri-eriọ.”—1 Pita 2:1.
Roro kpahe onana: Kọ itanẹte u bi ru nọ ọmọ ra ọ be hae rọ rehọ oghẹrẹ nọ oma riẹ o rrọ rọ wawo amọfa? Kọ ọmọ ra nọ o te uzoge no ọ be hai roro nọ amọfa a be reakpọ kuoma rekọ ọ rrọ goli?
Oware nọ whọ rẹ sai ru: Lele ọmọ ra ta kpahe enwoma nọ i re noi ze nọ ọ tẹ be rehọ omariẹ wawo amọfa. Riẹ nọ emetẹ avọ emezae a rọ oghẹrẹ ovo na ha. Emetẹ a rẹ mae ruawa kpahe epanọ oma rai o rrọ gbe epanọ a sai ro wo egbẹnyusu. Whọ sae ta kẹ ọmọ ra re o fi oke jọ họ nọ o re ro kpohọ itanẹte vievie he. Uzoge jọ nọ a re se Jacob ọ ta nọ: “Me si oware nọ me re ro kpohọ itanẹte no ifonu mẹ evaọ etoke jọ. Onana u fiobọhọ kẹ omẹ rọ eware nọ e mae roja karo, yọ oghẹrẹ nọ me je rri omamẹ gbe amọfa u nwene re.”
Eware nọ ọmọ ra o bi ru evaọ itanẹte
Oware nọ u fo nọ whọ rẹ riẹ: Nọ ohwo ọ tẹ rrọ itanẹte o wọhọ ẹsenọ ọ be rria kugbe ogbotu ahwo. Yọ fikinọ ahwo kpobi a rrọ epọvo na ha, a rẹ seba ẹwhọ họ.
Ohrẹ Ebaibol: “Wha siobọno oghẹrẹ ẹgo oyoma kpobi, evedha, ofu, edo, eme ekela . . . Wha dhesẹ uwowou kẹ ohwohwo.”—Ahwo Ẹfisọs 4:31, 32.
Roro kpahe onana: Kọ itanẹte u bi ru nọ ọmọ ra nọ o te uzoge no o bi ro gu iguẹgu, họre amọfa hayo ta eme ekela?
Oware nọ whọ rẹ sai ru: Fiobọhọ kẹ ọmọ ra riẹ oware nọ u fo nọ o re ru nọ ọ tẹ rrọ itanẹte. Obe jọ nọ a re se Digital Kids o ta nọ: “Iruo jọ nọ esẹgbini a wo họ, a re wuhrẹ emọ rai re a whaha evega gbe ekpehre uruemu, te a rrọ itanẹte hayo a rrọ kugbe ahwo.”
Kareghẹhọ nọ ohwo ọ sai yeri uzuazọ riẹ vrẹ ababọ itanẹte, yọ orọnikọ esẹgbini kpobi a rẹ kẹ emọ rai nọ i te izoge no uvẹ re a kpohọ itanẹte he. Rekọ whọ tẹ kẹ ọmọ ra uvẹ re o kpohọ itanẹte, ruẹ nọ o te ohwo nọ ọye ọvo ọ sai fi oke nọ ọ te raha evaọ itanẹte họ kẹ omariẹ, riẹ oghẹrẹ ahwo nọ o re mu usu kugbe, jẹ kẹnoma kẹ eware nọ i fo ho evaọ itanẹte.