Ahwo A Gbe bi Fievahọ Enọ E Gwọlọ Ruọ Esuo Ho—Eme Ebaibol na Ọ Ta?

Evaọ 2024 a ti votu evaọ erẹwho buobu. A ri votu evaọ erẹwho nọ i bu te enẹ evaọ ukpe ọvo ẹdẹvo ho. Rekọ ahwo buobu a gbe bi fievahọ enọ e gwọlọ ruọ esuo ho.

• Evaọ ekiakiẹ jọ nọ a ru, ahwo buobu evaọ America a ta nọ “oriobọ o be wọ ahwo buobu gwọlọ ruọ esuo” orọnikọ fikinọ a gwọlọ gine fiobọhọ kẹ ahwo ho.a—Pew Research Center, September 19, 2023.

Izoge buobu a gbe bi fievahọ ahwo nọ a gwọlọ ruọ esuo ho.

• “Oware nọ izoge a gwọlọ họ, epanọ a sai ro ku ebẹbẹ họ, rekọ evaọ ekiakiẹ jọ nọ a ru, izoge a ta nọ ahwo nọ a gwọlọ ruọ esuo a be daezọ epanọ a re ro ku ebẹbẹ họ họ.”—The New York Times, January 29, 2024.

• “Ahwo nọ a ru ekiakiẹ jọ a ruẹ nọ izoge a tube fievahọ ahwo nọ a re fi ividio họ oria itanẹte nọ a re se YouTube vi ahwo nọ a gwọlọ ruọ esuo.”—The Korea Times, January 22, 2024.

Kọ ma sai gine fievahọ ahwo nọ a gwọlọ ruọ esuo inọ a ti ru eware woma kẹ omai? Ono ma rẹ sai fievahọ?

Riẹ oghẹrẹ ohwo nọ who re fievahọ

O thọ họ re ahwo a yọroma kẹ oghẹrẹ ohwo nọ o re fievahọ. Ebaibol na ọ ta nọ “ogbori ọ rẹ rọwo ẹme kpobi, rekọ ọnọ o wo orimuo o re rri otọ mu re ọ tẹ te jowọ.”—Itẹ 14:15.

• Re whọ riẹ eware jọ nọ i re fiobọhọ kẹ owhẹ riẹ oware nọ o rrọ uzẹme gbe oware nọ o rrọ uzẹme he, se uzoẹme na “Kẹnoma kẹ Iku Erue.”

Ofariẹ, makọ isu nọ i wo emamọ eware họ iroro nọ a gwọlọ ru kẹ ahwo, u wo umuo nọ a rẹ sai ru ba. Oyejabọ nọ Ebaibol na ọ rọ vẹvẹ omai unu inọ:

• “Who fievahọ ikpahwo-esuo ho hayo ọmọ ohwo-akpọ họ, ọnọ ọ rẹ sae wha esiwo ze he.”—Olezi 146:3.

Osu nọ whọ rẹ sai fievahọ

Ebaibol na o dhesẹ nọ Ọghẹnẹ ọ rọ Jesu mu osu no. O te ziezi yọ a rẹ sai fievahọ iẹe. (Luk 1:32, 33) Jesu họ Ovie Uvie Ọghẹnẹ, egọmeti Ọghẹnẹ nọ o ro mu evaọ obọ odhiwu. Egọmeti na o ti su otọakpọ na.—Matiu 6:10.

• Wuhrẹ kpahe oware nọ whọ sai ro fievahọ Jesu gbe epanọ o ti ro ku ebẹbẹ nọ e rrọ akpọ na họ. Se izoẹme nana “Ono Họ Ovie Uvie Ọghẹnẹ?” gbe “Eme Uvie Ọghẹnẹ U ti Ru?”