Mu Usu Kugbe Amọfa re Oma O Gbẹ Jọ Owhẹ Goli Hi—Epanọ Ebaibol na Ọ Sai ro Fiobọhọ

Evaọ 2023, edọktọ e ruẹ nọ ahwo buobu evaọ akpọ na a jọ goli yọ u fo nọ a re ru oware jọ kpahe iẹe. Kọ a sai gine ku ẹbẹbẹ nana họ?

• Edọktọ jọ nọ o wuzou gaga evaọ U.S. nọ a re se Dr. Vivek Murthy ọ ta nọ, “Nọ oma o tẹ rrọ omai goli yọ ma rrọ kugbe amọfa ha, onana o sae wha ẹyao se omai yọ eva e rẹ gbẹ were omai hi.” Ọ ta re nọ: “Ma sai ru oware jọ kpahe iẹe.” Eme ma rẹ sai ru? “Nọ ma tẹ be hai ru eware nọ e rẹ lẹliẹ usu mai kugbe amọfa kpekpe kẹdẹ kẹdẹ.”a

Orọnikọ ma gbẹ rrọ kugbe amọfa ha ọvo oma o rẹ rọ jọ omai goli hi. Oma o rẹ jọ ahwo jọ goli nọ a tẹ make rrọ udevie ahwo buobu. Ghelọ oware nọ o be whae ze nọ oma o be hae rọ jọ omai goli kẹhẹ, Ebaibol na ọ sai fiobọhọ kẹ omai. Ehrẹ nọ e rrọ Ebaibol na e sai fiobọhọ kẹ omai ru eware nọ e rẹ lẹliẹ usu mai kugbe amọfa ga, yọ onana o sai ru nọ oma o gbẹ rọ jọ omai goli tere he.

Ehrẹ Ebaibol nọ e rẹ sai fiobọhọ kẹ omai

Hai lele amọfa ta ẹme jẹ gaviezọ. Nọ who te bi lele amọfa ta ẹme, ta oware nọ o rrọ owhẹ eva jẹ hae gaviezọ ziezi. Riẹ nọ epanọ whọ be daezọ amọfa te, ere ọvona usu ra kugbe ai o rẹ kpekpe te.

• Ohrẹ Ebaibol: “Wha gwọlọ ewoma obọrai ọvo ho, rekọ ewoma amọfa re.”—Ahwo Filipai 2:4.

Mu usu kugbe oghẹrẹ ahwo sa-sa. Daoma ruẹ nọ who mu usu kugbe ekpako gbe emaha, ahwo nọ uruemu ẹwho rai u wo ohẹriẹ no orai, hayo ahwo nọ a no orẹwho ọfa ze.

• Ohrẹ Ebaibol: “Rovie udu rai fihọ gbaladha.”—2 Ahwo Kọrint 6:13.

Re whọ gbẹ riẹ kpahe eware efa nọ who re ru nọ e rẹ lẹliẹ usu ra kugbe amọfa jọ gaga, se uzoẹme na “Satisfying Our Hunger for Friendship.”