Ahwo Buobu A Rrọ Goli—Eme Ọ rẹ Sai Fiobọhọ kẹ Owhẹ?

• “Enwenọ abọvo ahwo nọ a rrọ United States a ta nọ a rrọ goli, yọ evaọ usu ahwo nana, enọ e rrọ ikpe ikpegberee rite udhegbisoi oware nana o be mae via kẹ.”—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “Ukoko nọ a re se [The World Health Organization] o ta nọ a rọ utu ahwo jọ mu re a kiẹ kpahe oware nọ o be whae ze nọ ahwo a rọ rrọ goli. A gwọlọ nọ utu na u re fiobọhọ kẹ ahwo riẹ epanọ a sai ro mu usu kugbe amọfa, jẹ kiẹ kpahe epanọ a sai ro fiobọhọ kẹ ahwo nọ a rrọ goli evaọ akpọ na soso, makọ evaọ erẹwho nọ ahwo a jọ yogbe gaga.”—World Health Organization, Akpegbọvo 15, 2023.

Ehrẹ nọ e rrọ Ebaibol na e sai fiobọhọ kẹ omai mu usu kugbe amọfa. Onana u re ru nọ oma o gbẹ rọ jọ omai goli hi.

Ehrẹ Ebaibol nọ e rẹ sai fiobọhọ

Whaha eware jọ nọ i re ru nọ whọ gbẹ rọ jọ kugbe amọfa ha. Usu eware nana jọ họ, itanẹte nọ who re kpohọ ẹsikpobi. Ukpoye gwọlọ epanọ whọ sae rọ jọ kugbe ahwo ovao dhe ovao, gbe epanọ whọ sai ro mu usu kugbe emamọ ahwo.

• Ohrẹ Ebaibol: “Emamọ ogbẹnyusu o re dhesẹ uyoyou ẹsikpobi[,] ọ tẹ jẹ rrọ oniọvo nọ a yẹ fiki oke idhọvẹ.”—Itẹ 17:17.

Daoma fiobọhọ kẹ amọfa. Nọ whọ tẹ be hai fiobọhọ kẹ amọfa, u ti ru nọ usu ra kugbe ae o te rọ jọ kpekpekpe, yọ eva e te were owhẹ.

• Ohrẹ Ebaibol: “Ẹkẹ evawere e mae rrọ vi emio.”—Iruẹru Ikọ 20:35.

Kpohọ oria itanẹte mai re whọ ruẹ eware efa evaọ Ebaibol na nọ e rẹ sai fiobọhọ kẹ owhẹ mu usu kugbe emamọ ahwo.