Kọ Isẹri Jihova A rẹ Siọ Evasini nọ A rẹ Rehọ?
Ijo. Isẹri Jihova a rẹ siọ evasini nọ a rẹ rehọ họ. Ma rri rie nọ Oleleikristi kpobi ọ rẹ jiroro kẹ omariẹ sọ ọ rẹ rehọ evasini hayo ọ rẹ rehọ họ. Isẹri Jihova buobu a jiroro no inọ a rẹ rehọ evasini.
Ma rẹ gwọlọ usiwo-imu nọ o mai woma, yọ o were omai gaga nọ egba-eriariẹ a ru imu gbe eware sa-sa no nọ i re fiobọhọ ru ikpeyao kpotọ. Ma bi yere edọkita gbe enọso sa-sa rọkẹ iruo egaga nọ a bi ru re a sai fiobọhọ kẹ amọfa maero evaọ oke obẹbẹ.
Isẹri Jihova a re ru lele oware nọ ahwo usiwo-imu a ta. Wọhọ oriruo, anwẹnọ okpẹyao COVID-19 na ọ rọ rrọ otọ na, Isẹri Jihova a rọ evẹrẹ buobu ru ividio je kere izoẹme sa-sa no evaọ oria itanẹte mai nana be rọ tuduhọ ahwo awọ re a ru lele ehrẹ egọmeti nọ i re fiobọhọ nọ a gbe ro wo ẹyao na ha. Ehrẹ nana jọ họ, a du go kẹle ohwohwo ga hrọ họ, ahwo a du kokohọ oria bu ga hrọ họ, ohwo ọ rẹ jọ uwou nọ ọ tẹ be mọ hayo otẹrọnọ o kuomagbe amọfa nọ a sae lẹliẹ wo ẹyao na, abọ nọ a rẹ wozẹ kẹse kẹse, emaske nọ a rẹ hai kuhọ, gbe eware efa nọ egọmeti ọ ta nọ i re fiobọhọ.—Ahwo Rom 13:1, 2.
U kri no nọ a be rọ jọ ebe Isẹri Jihova ta kpahe eware nana:
Ohwo ọvo ọ rẹ jiroro kẹ omariẹ kpahe oghẹrẹ usiwo-imu nọ ọ rẹ rehọ.—Ahwo Galesha 6:5.
“Orọnikọ [emagazini nana] ọ be ta nọ oghẹrẹ umu hayo usiwo jọ o mai woma ha, yọ o be kẹ ohrẹ kpahe usiwo-imu hu. Ẹjiroro nọ ma ro kere iei họ re u fiobọhọ kẹ ohwo nọ o bi sei riẹ oghẹrẹ usiwo nọ o riẹ, kẹsena ohwo na ọvo ọ vẹ jiroro onọ ọ rẹ rehọ kẹ omariẹ.”—Awake!, Ava 8, 1987.
“Whẹ ọvo whọ rẹ jiroro na sọ te owhẹ te emọ ra wha rẹ rehọ evasini.”—Awake!, Aria 22, 1965.
Ma rẹ dhogbo epanọ a re ro siwi omai keme ma rri uzuazọ ghaghae gaga.—Iruẹru Ikọ 17:28.
“Isẹri Jihova a rẹ nyabru edọkita re a siwi ai nọ a tẹ be mọ. Uzuazọ o were rai, yọ a rẹ daoma ru oware kpobi nọ u fo jẹ rọwokugbe Ebaibol na re a sae sẹro uzuazọ rai kri te epanọ o sae lọhọ te kpobi.”—Uwou-Eroro Na, Ahrẹ 1, 1975.
‘Isẹri Jihova a rẹ rehọ imu hayo jẹ usiwo-imu rehọ. O rrọ isiuru rai re a wo omokpokpọ jẹ rria tọ. Wọhọ Luk, Oleleikristi jọ evaọ ikpe-udhusoi ọsosuọ nọ ọ jọ ọbo-imu, Isẹri Jihova jọ yọ ebo-imu. . . . Iruo egaga nọ ebo-imu na a bi ru ro siwi ahwo o be da Isẹri Jihova ẹro fia. Yọ okenọ ebo-imu a te fiobọhọ siwi ai o rẹ dae ẹro gaga re.’—Uwou-Eroro Na, Ava 1, 2011.