Eme Ọ rẹ Sai Fiobọhọ kẹ Owhẹ Wo Otoriẹ Ebaibol Na?

Uyo nọ Ebaibol nọ ọ kẹ

Ebaibol na ọ vuẹ omai eware buobu nọ e rẹ sai fiobọhọ kẹ omai wo otoriẹ riẹ. Ghelọ oghẹrẹ ohwo kpobi nọ whọ rrọ kẹhẹ, riẹ nọ ẹme Ọghẹnẹ nọ ọ rrọ Ebaibol na ‘o ga hrọ họ, yọ u kpehru hrọ kẹ owhẹ hẹ.’—Iziewariẹ 30:11.

Eware nọ i re fiobọhọ kẹ owhẹ wo otoriẹ Ebaibol na

1. Rri Ebaibol na epanọ u fo. Jẹ Ebaibol na rehọ inọ Ẹme Ọghẹnẹ ọ rrọ. Wo omaurokpotọ, keme Ọghẹnẹ ọ rẹ wọso enọ i wo omorro. (1 Ahwo Tẹsalonika 2:13; Jemis 4:6) Rekọ whọ nwane rọwo oware kpobi nọ who se hayo nọ who yo ho, nọ who gbe ri vuhumu nọ uzẹme o rrọ no ho. Ọghẹnẹ ọ gwọlọ nọ whọ rọ “ẹgba iroro ” ra ro ruiruo.—Ahwo Rom 12:1, 2.

2. Lẹ se Ọghẹnẹ re ọ kẹ owhẹ areghẹ. Obe Itẹ 3:5 o ta nọ: “Whọ rẹroso otoriẹ obọra ha.” Ukpoye, “hae yare Ọghẹnẹ” re ọ kẹ owhẹ areghẹ nọ who re ro wo otoriẹ Ebaibol na.—Jemis 1:5.

3. Hai wuhrẹ Ebaibol na ẹsikpobi. Nọ who te bi se Ebaibol na ẹsikpobi, ẹsiẹe who ti ro wo erere noi ze ziezi, viukpọ omotiẹse nọ who re sei.—Joshua 1:8.

4. Wo ugogo uzoẹme jọ nọ who re wuhrẹ kpahe. Nọ who te wo ugogo uzoẹme jọ, whọ jẹ kiẹ oware nọ Ebaibol na ọ ta kpahe iẹe, u re fiobọhọ gaga nọ whọ sae rọ riẹ oware nọ Ebaibol na o gine wuhrẹ. Rọ “iwuhrẹ obọ emuhọ” ro muhọ, kẹsena whọ vẹ “nyaharo kpohọ iwuhrẹ nọ e mae ga.” (Ahwo Hibru 6:1, 2, Easy-to-Read Version) Who te ru ere, whọ te sae rọ oria Ebaibol jọ wawo oria ofa, jẹ ruẹ nọ eria jọ evaọ Ebaibol na i ru eria efa vẹ ziezi, makọ eria nọ e tubẹ “rrọ bẹbẹ re a wo otoriẹ rai” dede.—2 Pita 3:16.

5. Kuvẹ re amọfa a fiobọhọ kẹ owhẹ. Ebaibol na ọ tuduhọ omai awọ nọ ma kuvẹ re amọfa a fiobọhọ kẹ omai wo otoriẹ Ebaibol na. (Iruẹru Ikọ 8:30, 31) Isẹri Jihova a re wuhrẹ Ebaibol na kugbe ahwo ọvọvẹ. Wọhọ Ileleikristi ọsosuọ, a rẹ rọ eria Ebaibol sa-sa fiobọhọ kẹ ohwo re ọ sai vuhu oware nọ Ebaibol na o gine wuhrẹ mu.—Iruẹru Ikọ 17:2, 3.

Eware nọ u du gwọlọ nọ who re wo tao ho

1. Eriariẹ egaga hayo isukulu ikpehru. Ikọ ikpegbivẹ Jesu a wo otoriẹ Ikereakere na yọ a rehọ e rai wuhrẹ amọfa, dede nọ ahwo a je rri ikọ na nọ “a kpohọ isukulu hu yọ a viodẹ hẹ.”—Iruẹru Ikọ 4:13.

2. Ugho. Whọ rẹ sai wuhrẹ oware nọ Ebaibol na ọ ta ọvọvẹ. Jesu ọ ta kẹ ilele riẹ nọ: “Ọvọvẹ a kẹ owhai, wha kẹ ọvọvẹ.”—Matiu 10:8.