Kọ Isẹri Jihova A Nwene Eme Ebaibol na no re E Sae Rọwokugbe Iwuhrẹ Rai?
Ijo, ma ru ere he. Ukpoye ma te muẹrohọ nọ eware nọ ma rọwo i wo ohẹriẹ no eware nọ Ebaibol na o wuhrẹ, ma re nwene eware nọ ma rọwo.
Evaọ ikpe buobu, ma romatotọ kiẹ Ebaibol na riwi. Kẹsena ma te ti mu Ebaibol Efafa Akpọ Ọkpokpọ ọrọ Ikereakere Efuafo Nahọ ẹfa, je mu ei họ esiobọno evaọ ukpe 1950. Efafa Ebaibol nọ e jariẹ oke yena ma je ro ruiruo yọ eye ma jẹ rehọ iwuhrẹ mai no ze. Joma ta kpahe eware jọ nọ Isẹri Jihova a rọwo kri no, re whọ rehọ ae wawo iwuhrẹ Ebaibol na jẹ ruẹ sọ e rọwokugbe.
Oware nọ ma rọwo: Ọghẹnẹ yọ Esanerọvo ho. Uwou-Eroro mai nọ a jẹ hai se Zion’s Watch Tower, ọrọ amara Ahrẹ, ukpe 1882 o ta nọ: “Ahwo nọ a bi se ebe mai a riẹ nọ ma rọwo Jihova avọ Jesu gbe Ẹzi ọfuafo na, rekọ ma rọwo uwuhrẹ esanerọvo na ha keme o no Ebaibol ze he—Eghẹnẹ esa nọ e rrọ omọvo, hayo Ọghẹnẹ ọvo nọ ọ rrọ imasa.”
Oware nọ Ebaibol na o wuhrẹ: “ỌNOWO Ọghẹnẹ mai na ọvuọvo.” (Iziewariẹ 6:4, Ebaibol Ẹri Na) “Ọghẹnẹ ọvo ọ rrọ, Ọsẹ na, ọnọ eware kpobi i no obọ riẹ ze, yọ ọye ma rrọ kẹ; yọ Olori ọvo ọ rrọ, Jesu Kristi, ọnọ eware kpobi e rọ ẹkwoma riẹ rrọ, yọ ẹkwoma riẹ ma rọ rrọ re.” (1 Ahwo Kọrint 8:6) Jesu omariẹ ọ ta nọ: “Ọsẹ na ọ rro vi omẹ.”—Jọn 14:28.
Oware nọ ma rọwo: Ahwo a te to evaọ erae ehẹle he. Obe Ahwo Rom 6:23 a rehọ uzoẹme Zion’s Watch Tower, ọrọ Azeza 1882 no ze. O ta nọ “Osa nọ Uzioraha O rẹ Hwa Họ Uwhu.” Uwou-Eroro Na o ta nọ: “Ẹme na ọ rrọ vevẹ gaga. Rekọ u gbunu gaga inọ ahwo buobu nọ a rọwo nọ Ebaibol na yọ Ẹme Ọghẹnẹ a be ta ẹme nọ o wọso oria ikere nana, yọ a rọwo nọ Ebaibol na o wuhrẹ nọ osa uzioraha họ uzuazọ ebẹdẹ bẹdẹ evaọ erae ehẹle.”
Oware nọ Ebaibol na o wuhrẹ: “Ẹzi nọ o ruthọ o re ti whuẹ.” (Izikiẹl 18:4, 20, Ebaibol Ẹri Na) Oware nọ u ti te ahwo kpobi nọ a be wọso Ọghẹnẹ họ “ọraha ibẹdẹ bẹdẹ” orọnikọ olahiẹ evaọ erae ehẹle he.—2 Ahwo Tẹsalonika 1:9, Ebaibol Ẹri Na.
Oware nọ ma rọwo: Uvie Ọghẹnẹ yọ egọmeti orọnikọ oware nọ o rrọ ohwo udu hu. Zion’s Watch Tower ọrọ Akpegbivẹ 1881 o ta kpahe Uvie Ọghẹnẹ inọ: “Nọ a tẹ rọ Uvie na mu no, o te raha ivie otọakpọ na kpobi no.”
Oware nọ Ebaibol na o wuhrẹ: “Evaọ ezi ivie eyena, Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.”—Daniẹl 2:44, Ebaibol Ẹri Na.
Kọ Ebaibol Efafa Akpọ Ọkpokpọ na ọvo Isẹri Jihova a rẹ rehọ iwuhrẹ rai no ze?
Ijo, keme ma be rọ efafa Ebaibol sa-sa ta usi uwoma. Uzẹme riẹ họ, dede nọ ma rẹ rọ Efafa Akpọ Ọkpokpọ na kẹ ahwo ọvọvẹ je wuhrẹ Ebaibol na kugbe ai, ma re wuhrẹ Ebaibol na kugbe ahwo nọ a gwọlọ rọ efafa Ebaibol efa wuhrẹ Ẹme Ọghẹnẹ.