A Dhesẹ Uruemu Uwowolẹ Rọkẹ Izerẹ Ichọche nọ Eva E jẹ Dha

Artur yọ ọsẹro okogho evaọ Armenia. O weze bru ukoko Isẹri Jihova jọ re ọ tuduhọ ae awọ. O te muẹrohọ nọ ukoko na u ri wobọ evaọ usi uwoma ota ẹgbede ẹdẹvo ho, onọ a rẹ jọ fi ebe nọ a kere no Ebaibol ze họ oware nọ a re ghelie no oria ruọ oria. Re ọ tuduhọ ae awọ, Artur avọ aye riẹ Anna, kugbe Osẹri Jihova ọfa jọ nọ a re se Jirayr, a te fi ebe Isẹri Jihova họ oware nọ a re ghelie na evaọ ẹwho ọsese jọ. A fi oware ebe na họ oria nọ o re zurie.

O raha oke he, ahwo nọ a be nyavrẹ a tẹ jẹ wẹriẹ re a rehọ ebe. U ri kri ha na, ahwo nọ a wọso Isẹri Jihova a te muẹrohọ edhere ọkpokpọ nana nọ a be rọ ta usi uwoma na. Izerẹ ichọche ivẹ jọ a tẹ wẹriẹ oria nọ oware nọ a re ghelie na o rrọ na; ẹsiẹvo na, ọjọ evaọ usu rai ọ tẹ rọ owọ fa oware ebe na kie. Ọ tẹ tehe Artur, ẹno riẹ o te kie. Artur, Anna, gbe Jirayr a tẹ jẹ daoma hrẹ ofu ozerẹ na, rekọ ofu riẹ o kpotọ họ. Izerẹ na a te bi thihi oware ebe na, ebe na kpobi e tẹ vaha fihotọ. Nọ a wọviẹ Isẹri Jihova na je seha kẹ ae bẹ no, a tẹ nyavrẹ.

Artur, Anna, gbe Jirayr a tẹ rọ ẹme na kpobọ iporisi nọ e rrọ ẹwho na. A tẹ ta oware nọ o via kpobi jẹ ta ẹme kpahe Ebaibol na kẹ iporisi na jọ gbe ahwo nọ a rrọ etẹe ru iruo. A tẹ rọ Isẹri Jihova esa na kpohọ ọfisi iporisi nọ ọ mai wuzou evaọ etẹe. Evaọ oke ọsosuọ, ọ jẹ gwọlọ riẹ kpahe oware nọ o via na ọvo. Rekọ nọ o yo nọ a tehe Artur yọ ọ kpobọ họ dede nọ o te ọzae ziezi, ọga iporisi na ọ gbẹ nọ enọ kpahe ẹme na ha, ukpoye ọ tẹ jẹ nọ enọ kpahe eware nọ Isẹri Jihova a rọwo. Onana o tẹ whae ze nọ Isẹri Jihova na a ro lele iporisi na ta ẹme kpahe Ebaibol na evaọ euwa ene soso! Oware nọ iporisi na o yo u duobọtei te epanọ ọ rọ ta nọ: “A rẹ ruobọ egagọ rai na ha! Egagọ rai na e were omẹ!”

Evaọ okiokiọ riẹ nọ Artur ọ wariẹ muọ usi uwoma ẹgbede na họ, ọzae jọ nọ ọ ruẹ eware kpobi nọ e via odẹnukpo na ọ tẹ nyabru ei ze. Ọzae na o te jiri Artur kẹ epanọ ọ rọ kpọ ofu riẹ gbe epanọ o gbe ro ru ozerẹ na kele he. Ọ tẹ jẹ ta nọ oware nọ o via na o wha riẹ ze nọ o gbe ro wo adhẹẹ kẹ izerẹ ichọche na ha.

Evaọ owọwọ ẹdẹ yena, ọga iporisi na o te se Artur re ọ wariẹ zihe kpobọ ogba iporisi na. Rekọ ukpenọ ọ rẹ ta ẹme kpahe oware nọ o via na, ọ tẹ jẹ nọ enọ kpahe Ebaibol na. Iporisi ivẹ efa i te kuomagbe ae.

Okiokiọ riẹ, Artur ọ tẹ wariẹ weze bru ọga iporisi na re o dhesẹ ividio nọ a ru no Ebaibol ze kẹe. Ọga iporisi na o te se iporisi efa re a rri ividio na kugbe.

Fiki ekpehre oware nọ izerẹ ichọche na a ru na, iporisi buobu a yo usi uwoma na, yọ onana họ orọ ọsosuọ rai. Onana o wha riẹ ze nọ a be rọ rehọ emamọ ubiẹro rri Isẹri Jihova.