Jerimaya 33:3—“Se Omẹ Me Reti Yo kẹ Owhẹ”

“Bo se omẹ, me ti yo kẹ owhẹ ababọ oke oraha jẹ vuẹ owhẹ ikpeware nọ a rẹ sai wo otoriẹ rai hi, enọ whọ re riẹ hẹ.”—Jerimaya 33:3, Efafa Akpọ Ọkpokpọ.

“Se omẹ me reti yo kẹ owhẹ, mẹ rẹ te ta eware ilogbo gbe enọ a si no nọ whọ re riẹ hẹ kẹ owhẹ.”—Jerimaya 33:3, Ebaibol Ẹri Na.

Otofa Eme nọ E Rrọ Jerimaya 33:3

Eme nana i dhesẹ nọ Ọghẹnẹ o bi zizie ahwo re a lẹ sei. Ahwo kpobi nọ a lẹ sei, o re fiobọhọ kẹ ae riẹ eware nọ e te via evaọ obaro.

“Bo se omẹ, me ti yo kẹ owhẹ.” Eme nọ a fa “bo se omẹ” na i dhesẹ hẹ inọ ohwo o re mu se hayo woro odẹ Ọghẹnẹ. Ukpoye, o gwọlọ nọ ohwo ọ rẹ lẹ se Ọghẹnẹ re o fiobọhọ kẹe jẹ kpọe evaọ uzuazọ.—Olezi 4:1; Jerimaya 29:12.

Ahwo orẹwho Izrẹl evaọ oke anwae ae Ọghẹnẹ ọ ta ẹme nana kẹ. Ahwo orẹwho na a kiukeku Ọghẹnẹ a tẹ jẹ gọ emedhọ, yọ egbaẹmo Babilọn a ko Jerusalẹm họ. (Jerimaya 32:1, 2) Fikiere Jihovaa ọ tẹ ta kẹ ahwo Izrẹl re a zihe bru ei ze, re a lẹ sei inọ o fiobọhọ kẹ ae.

“[Mẹ te] . . . vuẹ owhẹ ikpeware nọ a rẹ sai wo otoriẹ rai hi, enọ whọ re riẹ hẹ.” Eware nọ Ọghẹnẹ ọ ta nọ o ti dhesẹ via na yọ ikpeware nọ a sai “wo otoriẹ rai hi,” keme ababọ obufihọ Ọghẹnẹ, ohwo-akpọ ọvo ọ sai wo otoriẹ rai hi. A sae jẹ fa ẹme na “ikpeware nọ a rẹ sai wo otoriẹ rai hi” wọhọ, “eware nọ a si no.”

“Eware nọ a si no” vẹ Ọghẹnẹ o ti dhesẹ via? Eye họ eware nọ e te via evaọ obaro wọhọ, epanọ a te rọ raha okpẹwho Jerusalẹm no, epanọ ahwo a te gbẹ rọ rriae he, gbe epanọ a te rọ wariẹ bọe, ahwo a vẹ rriae. (Jerimaya 30:1-3; 33:4, 7, 8) Rekọ Ọghẹnẹ ọ ta re nọ ahwo riẹ a ti vru fihọ igbo ho, ọ te wariẹ koko ae họ re a jọ ahwo orẹwho nọ ọ salọ.—Jerimaya 32:36-38.

Eme nọ E Wariẹ Jerimaya 33:3 Họ

Jerimaya ọruẹaro na o ru iruo aruọruẹ riẹ evaọ 608 B.C.E., evaọ ukpe avọ ikpe ọrọ esuo Zẹdikaya ovie na. Jerimaya ọ ruẹaro nọ Ọghẹnẹ ọ te rehọ Jerusalẹm họ obọ ovie Babilọn, o ve ti fi ei kparobọ, yọ ovie Babilọn o ti mu Zẹdikaya kpohọ igbo. Eruẹaruẹ Jerimaya na e were ovie na vievie he, fikiere o te fi Jerimaya họ uwou-odi.—Jerimaya 32:1-5; 33:1; 37:21.

Oke nana Ọghẹnẹ ọ rọ ta eme nọ e rrọ obe Jerimaya 33:3 na. Rekọ u yoma gaga nọ Zẹdikaya ovie na gbe ahwo buobu evaọ orẹwho na a gaviezọ họ, a gbe je ru eware iyoma vi epaọ ọsosuọ. (Jerimaya 7:26; 25:4) A lẹ se Ọghẹnẹ hẹ re o fiobọhọ kẹ ae jẹ kpọ ae họ. Evaọ ukpe nọ o lele i rie, ahwo Babilọn a te fi Zẹdikaya kparobọ jẹ raha Jerusalẹm. A te mu ahwo buobu nọ a zọ kpohọ igbo evaọ obọ Babilọn.—Jerimaya 39:1-7.

Eme nọ e rrọ obe Jerimaya 33:3 na e rẹ kareghẹhọ omai inọ Ọghẹnẹ ọ rẹ kẹ ahwo kpobi nọ a bi se Ẹme riẹ “eriariẹ egbagba oreva riẹ.” Yọ o re dhesẹ “eware ididi” kẹ ahwo kpobi nọ a be lẹ sei je se Ebaibol na. (Ahwo Kọlọsi 1:9; 1 Ahwo Kọrint 2:10) Eware ididi nana jọ họ, eware nọ Ọghẹnẹ ọ ya eyaa nọ o ti ru evaọ obaro kẹle na.—Eviavia 21:3, 4.

Rri ividio ọkpẹkpẹe nana re whọ ruẹ eware nọ e rrọ obe Jerimaya.