Me Ru Iruo nọ E Lẹliẹ Uzẹme Ebaibol na Te Eria Buobu

Ẹsikpobi ọsẹ mẹ ọ jẹ hae ta kẹ omẹ nọ me kuomagbe ai evaọ uwuhrẹ na. Fikiere ẹdẹ jọ nọ Isẹri Jihova a nyaze ti wuhrẹ ai Ebaibol na, mẹ tẹ tubẹ keria kugbe ai. Me muẹrohọ nọ, nọ Ebaibol na ọ tẹ ta ẹme kpahe eware nọ egba-eriariẹ a kiẹ via, onọ Ebaibol na ọ ta na o rẹ jọ gbagba ẹsikpobi. Onana u gbe omẹ unu gaga. Nọ oke o be nya na, u te ti mu omẹ ẹro nọ Ebaibol na ginọ ẹme Ọghẹnẹ, yọ Isẹri Jihova a bi wuhrẹ oware nọ Ebaibol na ọ ta je bi koko izi Ọghẹnẹ nọ e rrọ Ebaibol na. Evaọ ukpe 1970, mẹ tẹ họ-ame, yọ ẹdẹ ọvona ọsẹ mẹ ọ họ-ame re. Nọ imikpe jọ e vrẹ no, oni mẹ avọ inievo-emetẹ ivẹ mẹ a tẹ họ-ame.

Me muẹrohọ nọ ehwa mẹ buobu, epanọ a rẹ rọ reakpọ kuoma je kpohọ epati ọvo họ oware nọ o rrọ ae oja. Re a ta uzẹme, oghẹrẹ uzuazọ utioye u je si omẹ urru oke yena keme ikpe ikpegbihrẹ mẹ jọ. Rekọ mẹ ruẹ nọ Isẹri Jihova nọ i je wuhrẹ omẹ Ebaibol na, eva e be hae were ae ẹsikpobi evaọ iruo odibọgba oke-kpobi nọ a bi ru na. Fikiere mẹ tẹ gwọlọ nọ me re kuomagbe ai. Yọ ere me gine ru. Nọ mẹ jọ ikpe udhegbọvo, me te mu iruo odibọgba oke-kpobi na họ.

Eva e jẹ were omẹ gaga evaọ iruo ọkobaro na. Mẹ tubẹ ta kẹ omamẹ nọ, mẹ riẹ, mẹ hai ti muhọ no anwẹdẹ. O jẹ hae were omẹ gaga re mẹ ta usi uwoma evaọ unueri Göteborg. Mẹ jẹ hae ta usi uwoma kẹ ahwo nọ a be ta evẹrẹ efa, nọ i bi ekọ-iyibo ilogbo ziọ unueri na.

Anwọ ikpe udhuvẹ-gbikpe nọ e vrẹ na, u wo obọdẹ edhere jọ nọ me ro fiobọhọ kẹ ahwo evẹrẹ buobu yo usi uwoma na no. Jọ me gbiku na ze.

Ma jẹ rọ Iprogramo Ekọmputa nọ A re Se MEPS Printi Ebe

Nọ mẹ jọ ọkobaro, me je ru iruo ubroke nọ mẹ rẹ rọ kuọ omamẹ. Me je ru iruo evaọ oria nọ a rẹ jọ printi ebe. Mẹ họ ohwo nọ ọ jẹ hae ruẹrẹ eme nọ a bi ti printi na họ ziezi re i wo erru jẹ jọ vevẹ ziezi. Evaọ oke yena, ahwo a je nwene kpohọ edhere ọkpokpọ nọ a re ro printi ebe, nọ u je kieze obọ. Vẹre vẹre nọ a te bi printi eware, a rẹ ruẹrẹ eme na họ ubi ovuovo. Rekọ edhere ọkpokpọ na họ, a rẹ rehọ ifoto eme gbe iwoho na, a ve printi rai lahwe. Me te ti wuhrẹ oghẹrẹ nọ a rẹ rọ ekọmputa rehọ ifoto eme gbe iwoho, a ve fi ai họ oware nọ a ti ro printi rai lahwe.

Evaọ ukpe 1980, me te wo aye, odẹ riẹ Helene. Helene ọ jọ ọkobaro oke-kpobi, yọ o rẹ were iẹe re ọ ta usi uwoma kẹ ahwo nọ a no eria sa-sa akpọ na ze wọhọ epanọ o rẹ were omẹ na. Ma gwọlọ nọ ma re kpohọ Isukulu Giliad re ma jọ imishọnare.

Rekọ fiki oghẹrẹ iruo nọ me je ru nọ mẹ jọ ọkobaro na, a te zizie omẹ avọ aye mẹ kpohọ Ebẹtẹle nọ ọ rrọ Sweden. Ukoko Jihova o gwọlọ nọ a rẹ rọ oghẹrẹ okpokpọ nọ a bi ro printi na ro printi ebe mai re iruo na e nyaharo ziezi. Fikiere evaọ ukpe 1983 a te vi omai kpohọ Ebẹtẹle nọ ọ rrọ Wallkill evaọ New York. A vi omai kpohọ obei re a wuhrẹ omai iprogramo ekọmputa ọkpokpọ jọ nọ inievo ukoko na a je ru, onọ a re se Multilanguage Electronic Phototypsetting System (koyehọ MEPS).a

Ma tẹ te riẹ nọ MEPS yọ oghẹrẹ iprogramo ekọmputa jọ nọ u re ru ei lọhọ re a kere eme evaọ evẹrẹ sa-sa, a ve fi iwoho kugbe ai, kẹsena a vẹ ruẹrẹ ae họ re a printi rai lahwe. Iruo mai họ, re ma ru epanọ a sae rọ rehọ eme evẹrẹ sa-sa fihọ MEPS, re a sai printi ebe mai evaọ evẹrẹ buobu. Whaọ enẹna, Isẹri Jihova a bi printi ebe mai nọ a be rọ ta usi uwoma na fihọ evẹrẹ nọ i bu vi odu ọvo (1,000) soso.

Nọ oke jọ o vrẹ no, a te vi omẹ avọ aye mẹ Helene kpohọ unuakpọ Asia re ma fiobọhọ ru evẹrẹ efa buobu fihọ MEPS. Eva e were omai gaga inọ ma bi ti fiobọhọ re ukoko Jihova o sai printi ebe nọ ma bi ro whowho usi Uvie na fihọ evẹrẹ efa buobu.

Uzuazọ Ahwo Obei U Wo Ohẹriẹ Gaga

Evaọ 1986, mẹ avọ aye mẹ ma te kpobọ India. Ma ruẹ nọ oghẹrẹ nọ a bi yeri uzuazọ u wo ohẹriẹ gaga. Nọ ma te Bombay, nọ a bi se Mumbai enẹna, oghẹrẹ nọ a bi yeri uzuazọ u kiehọ omai oma vievie he. Uzuazọ ahwo Sweden gbe orọ ahwo India u wo ohẹriẹ gaga. Evaọ oka ọsosuọ nọ ma ro te obei, ma je tube roro sọ ma re zihe kpo.

Rekọ nọ oka ọsosuọ na o vrẹ no, ma te nwene iroro. Oware nọ ma ro ru ere họ, ma gwọlọ nọ ma rẹ jọ imishọnare anwẹdẹ. Ma tẹ nọ omamai nọ, ‘Obọnana nọ a vi omai ziọ orẹwho ofa no na, kọ ma rẹ ginẹ rọ ere zihe kpo?’ Ma tẹ gbaemu nọ ma rẹ gwọlọ edhere kpobi nọ oria nana o rẹ rọ reria omai oma.

Fikiere ukpenọ ma re zihe kpo, ma tẹ jiroro nọ ma rẹ daoma riẹ kpahe oghẹrẹ uzuazọ nọ a bi yeri. Nọ mẹ avọ aye mẹ ma gine ru ere, uzuazọ obọ India u te mu omai họ ẹwere. Ma tube wuhrẹ evẹrẹ ivẹ jọ nọ a rẹ ta evaọ India dede, eye họ ẹvẹrẹ Gujarati avọ Punjabi.

A Vi Omai Kpobọ Myanmar

Evaọ ukpe 1988, a te vi omai kpobọ Myanmar. Myanmar yọ orẹwho nọ o rrọ udevie China, India, gbe Thailand. Ahwo a je ru ozighi gaga evaọ Myanmar evaọ oke yena fiki isuẹsu. Yọ isoja i je su enwenọ orẹwho na soso. Evaọ oke yena, a ri ru ibieme nọ a sai ro kere ẹvẹrẹ rai fihọ MEPS ho. Yọ a ri wo iprogramo ekọmputa ọvuọvo nọ a sai ro printi eme ẹvẹrẹ rai hi. Fikiere, oware ọsosuọ nọ a ta nọ ma ru họ, anọ ma ruẹrẹ ibieme ẹvẹrẹ nana fihọ iprogramo ekọmputa. Kẹsena ma vẹ wha iprogramo na kpobọ Wallkill re a fi ei họ MEPS.

Nọ ma je zihe, nọ ma te oria nọ ma be te jọ ruọ arupre, aye mẹ o te fi iprogramo na họ ẹmẹkpa nọ o kru họ obọ. Fiki ebẹbẹ nọ e j’otọ oke yena fiki ẹme isuẹsu, otẹrọnọ a kru omai inọ ma be rọ ebe ẹvẹrẹ Myanmar kpohọ orẹwho ofa, a sai mu omai fihọ uwou-odi. Oke nọ a jẹ kiẹ eware nọ aye mẹ ọ wha lele oma gbe eware nọ o fihọ oma, ọ tẹ kpare abọ riẹ kpehru avọ ẹkpa na nọ ọ rrọ iẹe obọ. Oware nọ Ọghẹnẹ o re ru na, ohwo ọvo o muẹrohọ ẹkpa na ha!

U te no iprogramo ekọmputa ọkpokpọ na no, a kẹ inievo nọ i je ru iruo efafa evaọ Myanmar elaptọpo, oware nọ a re ro printi ebe, a te je wuhrẹ ae epanọ a rẹ rọ MEPS ru iruo rai. Inievo nana buobu nọ i je ru iruo efafa na a re ruẹ ekọmputa ẹdẹvo ho. Rekọ u no rai eva ze inọ a re wuhrẹ eware ekpokpọ. Vẹre vẹre, inievo mai a rẹ nyabru ahwo nọ a rẹ hwa ugho kẹ re a printi ebe mai. Edhere nọ o kiekpo no nọ ọ rrọ bẹbẹ gaga a jẹ hai ro printi eware na. Rekọ fiki eware nana nọ a kẹ rai na, a gbẹ jẹ nyabru ahwo yena ha. Onana o tẹ whae ze nọ ebe mai nọ a je printi i ro woma gaga.

Ma Kpobọ Nepal

Evaọ 1991, a te vi omẹ avọ aye mẹ kpobọ Nepal nyai fiobọhọ kẹ inievo na. Nepal yọ orẹwho nọ o rrọ ofẹ obọze ovatha-ọre ugbehru Himalayas. Ukoko ọvo ọye ọ jọ orẹwho na soso evaọ oke yena. Yọ ebe ukoko na nọ a wo evaọ ẹvẹrẹ Nepal i bu tere he.

U kri hi, a tẹ fa ebe ukoko na efa buobu nọ a jẹ rọ kẹ ahwo evaọ ẹkwotọ na soso. Enẹna, Isẹri Jihova nọ e rrọ Nepal a bu te oware wọhọ idu esa (3,000). A tẹ jẹ rrọ ikoko nọ i bu vi udhuvẹ. Yọ evaọ ukpe 2022, ahwo nọ a ziọ Ekareghẹhọ uwhu Jesu a bu vi idu ihrẹ gbe egba isoi (7,500)!

A Fa Ibroshọ jọ Fihọ Ẹvẹrẹ Lahu

Nọ ukpe 1990 o vrẹ no, imishọnare nọ e jọ okpẹwho nọ a re se Chiang Mai evaọ Thailand a te mu usi uwoma họ ẹta kẹ ahwo nọ a be rria ukpehru Lahu. Ahwo nọ a be rria kẹle uwhru China, Laos, Myanmar, Thailand, gbe Vietnam ae a rẹ ta ẹvẹrẹ Lahu. Rekọ evaọ oke yena, a re fa ebe ukoko na evuevo fihọ ẹvẹrẹ Lahu hu.

U wo ọmọzae jọ nọ imishọnare a je wuhrẹ Ebaibol kugbe. Ọye ọ fa ibroshọ na “Ri! Me Bi Ru Eware Kpobi Fihọ Ekpokpọ” no ẹvẹrẹ Thailand kpohọ ẹvẹrẹ Lahu. Tei te amọfa nọ a be rria iwhre Lahu a tẹ zọhọ igho ze, a te vi ibroshọ na avọ igho na kpohọ obọ uwou ogha. A kere ileta lele eware nọ a vi na. A jọ ileta na ta nọ a gwọlọ nọ ahwo kpobi nọ a be jẹ ẹvẹrẹ Lahu a wuhrẹ uzẹme nọ ae omarai a jọ ibroshọ na wuhrẹ na.

Nọ imikpe jọ e vrẹ no, a te vi omẹ avọ aye mẹ Helene nyai wuhrẹ inievo nọ e be fa ebe mai fihọ ẹvẹrẹ Lahu oghẹrẹ nọ a rẹ rọ MEPS ru iruo rai. U wo oniọvo-ọmọzae jọ nọ u ri kri nọ ọ họ-ame he, nọ ọ rrọ usu efefafa na evaọ ọfisi efafa nọ ọ rrọ Chiang Mai. Kpakọ oniọvo nana họ ọmọzae nọ ọ fa ibroshọ “Ri! Me Bi Ru Eware Kpobi Fihọ Ekpokpọ” na fihọ ẹvẹrẹ Lahu evaọ oke ẹdẹ na! U gbe omai unu kẹhẹ.

Evaọ ukpe 1995 a te vi omẹ avọ aye mẹ zihe kpobọ India. Ma jọ obei fiobọhọ kẹ efefafa nọ e rrọ uwou ogha na re a wo ekwakwa MEPS nọ a sai ro ru iruo rai. Ma be ta ẹme na, ahwo evẹrẹ buobu evaọ India a wo ebe ukoko na buobu nọ a bi ro wuhrẹ ahwo evaọ usi uwoma re a họ-ame evaọ ukoko Jihova.

Emamọ Uzuazọ Ma Yeri

Anwọ 1999 ze mẹ avọ aye mẹ ma bi ro ru iruo evaọ uwou ogha nọ o rrọ Britain. Ma be hai thuru kugbe inievo nọ e rrọ obọ ehri ukoko re ma gbe ru MEPS na woma ziezi. Eva e be were omai gaga inọ obọ London obonẹ nọ ma rrọ na, ma be hae rọ evẹrẹ India ivẹ nọ ma wuhrẹ vẹre na, koyehọ Gujarati avọ Punjabi ta usi uwoma kẹ ahwo nọ a bi yo evẹrẹ nana evaọ London. Ma tẹ nwane ruẹ nọ a fa eware ukoko na fihọ ẹvẹrẹ ọkpokpọ no evaọ jw.org, ma vẹ nwane gwọlọ ahwo nọ a rẹ ta ẹvẹrẹ yena evaọ ẹkwotọ mai nọ ma rẹ sae ta usi uwoma kẹ.

Eva e be were omẹ inọ, nọ mẹ jọ emaha mẹ ma omaa eware nọ mẹ rẹ sai ru evaọ ukoko Jihova ukpenọ me re lele ehwa mẹ nọ akpọriọ ọ jẹ were. Nọ mẹ avọ aye mẹ ma tẹ kareghẹhọ oghẹrẹ uzuazọ nọ ma yeri no, ma rẹ vioja vievie he inọ ma rọ uzuazọ mai ru iruo kẹ Jihova evaọ iruo odibọgba oke-kpobi na. Ma kpohọ erẹwho nọ i bu vi ọgba soso no, ma tẹ jẹ rọ ẹro mai ruẹ no inọ idibo Ọghẹnẹ a be ta usi uwoma kẹ ahwo nọ a rrọ erẹwho kpobi, erua kpobi, gbe erọunu kpobi!—Eviavia 14:6.