Ma tẹ gwọlọ ru oware jọ nọ u wuzou gaga, ma rẹ daoma riẹ “oware nọ oreva Jihova o rrọ” ma ve je ru ei. (Ẹf. 5:17) Nọ oware jọ o tẹ rrọ otọ, ma jẹ be jọ Ebaibol gwọlọ ohrẹ jọ nọ o sai fiobọhọ kẹ omai ru oware nọ u fo, u dhesẹ nọ ma be daoma riẹ oware nọ Jihova ọ gwọlọ. Nọ ma je lele ohrẹ nọ ma kiẹ ku na, ma ve ti ru oware nọ u fo. Ọwegrẹ mai na, Setan nọ Ebaibol o se “omuomu na” ọ be gwọlọ kwa eware akpọ na vọ omai abọ re ma gbe wo uvẹ ru iruo Ọghẹnẹ hẹ. (1 Jọn 5:19) Oleleikristi o gbe rri otọ mu hu, epanọ o re ro wo eware eyero akpọ, kpohọ isukulu ilogbo, hayo wo iruo nọ o re ru, o vẹ te whae ze nọ o gbe ro wo uvẹ ru iruo kẹ Jihova ziezi evaọ ukoko na ha. Oleleikristi nọ o bi le eware itieye na siọ iruo Ọghẹnẹ ba, kiyọ oghẹrẹ nọ ahwo nọ a be gọ Ọghẹnẹ hẹ a re rri eware, ere o bi rri eware re. Orọnikọ eware yena nọ ma kele na e nwane thọ họ. Rekọ orọnọ eye e rẹ mae jọ omai oja ha evaọ uzuazọ mai. w24.03 24 ¶16-17

A jọ obe Olezi 34:19 fodẹ eware ivẹ jọ nọ e roja gaga. Ọrọ ọsosuọ họ, ebẹbẹ e rẹ sai te ohwo nọ o kiẹrẹe. Ọrọ avọ ivẹ, Jihova o re fiobọhọ kẹ omai nọ ebẹbẹ i te te omai. Edhere jọ nọ Jihova o bi ro fiobọhọ kẹ omai họ, o wuhrẹ omai nọ ebẹbẹ e te siọ omai ba ete he nọ ma gbẹ rrọ akpọ omuomu nana. Ginọ uzẹme nọ Jihova ọ ta nọ ma tẹ be gọe, eva e te were omai. (Aiz. 66:14) Rekọ ọ ta ha inọ ebẹbẹ i ti te omai hi. Ọ vuẹ omai nọ ma hai roro kpahe oke nọ ma te rọ reakpọ kuoma bẹdẹ bẹdẹ. Oke yena akpọ mai ọ te rọ ginẹ jọ epanọ Ọghẹnẹ ọ gwọlọ e riẹ. (2 Kọr. 4:16-18) Bẹsenọ oke yena o re te, Jihova o bi fiobọhọ kẹ omai re ma thihakọ ebẹbẹ nọ i bi te omai. (Enu. 3:22-24) Ẹvẹ ma sae rọ rehọ aro kele idibo Jihova jọ nọ a gbiku rai evaọ Ebaibol na gbe erọ oke mai na? Eware idudhe e sae via kẹ omai, rekọ ma tẹ rẹroso Jihova, o ti fi omai họ otọ họ.—Ol. 55:22. w23.04 14-15 ¶3-4

Josẹf avọ Meri a ru oware nọ egọmeti oke yena a ta nọ a ru dede nọ o lọhọ kẹ ai hi. U fo re ma rọ aro kele ai. (Luk 2:1-6) Nọ Meri o dihọ te eyẹ no, Ọgọstọs nọ ọ jọ osu Rom o te jie uzi jọ. Anọ ohwo kpobi o kpohọ ọvuọ ẹwho riẹ nyai kere odẹ fihotọ. Koyehọ Josẹf avọ Meri a ti kpobọ ẹwho rai nọ a re se Bẹtlẹhẹm. No oria nọ a jọ na te obei u thabọ te enwenọ emaele udhone gbe ikpegbesa (ikilomita 150), yọ edhere na ọ jọ igbigbehru. Kareghẹhọ nọ Meri o dihọ te eyẹ. Fikiere, erẹ na ọ te lọhọ kẹe vievie he. O sae jọ nọ a jẹ ruawa gaga. Ẹsejọhọ Josẹf o je roro nọ, ‘Kọ eva eyẹ e tẹ da Meri, eme ma ti ru?’ Ọmọ nọ ọ te jọ Mesaya na ẹdẹfa ma be ta ẹme riẹ na. Kọ aimava a ta nọ a rẹ siọ oware nọ egọmeti ọ ta na ba eru fikinọ Meri o dihọ na? Epanọ eware e jọ kẹ Josẹf avọ Meri na o sae lẹliẹ ozọ mu ai. Ghele na, a yoẹme dede nọ o lọhọ kẹ ai hi. Yọ Jihova ọ ghale rai fikinọ a yoẹme. A te obọ Bẹtlẹhẹm gbẹsinẹdẹ. Meri ọ tẹ jẹ jọ obei yẹ oma kọkọ. Obei nọ a nya na o lẹliẹ eruẹaruẹ Ebaibol jọ rugba dede.—Mae. 5:2. w23.10 8 ¶9; 9 ¶11-12