Uzuazọ gbe Uwhu​—Ẹvẹ Whọ Sae rọ Siọ Ozọ Uwhu Ba Ẹdhẹ?

Uyo nọ Ebaibol na ọ kẹ

Ma rẹ dhozọ uwhu keme uwhu yọ ọwegrẹ mai, yọ fiki onana ma rẹ gwọlọ thọ uzuazọ mai. (1 Ahwo Kọrint 15:26) Rekọ ahwo buobu a rẹ dhozọ uwhu fiki iku erue nọ a yo kpahe ahwo nọ a whu no, yọ a be rọ ere fi oma rai họ “igbo evaọ edẹ uzuazọ rai kpobi.” (Ahwo Hibru 2:15) Nọ whọ tẹ riẹ uzẹme na kpahe uwhu, u re ru nọ whọ gbẹ rọ dhozọ riẹ hẹ, keme oghẹrẹ ozọ utioye na u re ru nọ ohwo ọ gbẹ rọ reawere uzuazọ riẹ hẹ.​—Jọn 8:32.

Uzẹme na kpahe uwhu

• Ahwo nọ a whu no a riẹ oware ovo ho. (Olezi 146:4) U du gwọlọ nọ whọ rẹ dhozọ edada hayo olahiẹ nọ who te whu no ho, keme Ebaibol na ọ rehọ uwhu dhesẹ owezẹ gheghe.​—Olezi 13:3; Jọn 11:11-​14.

• Ahwo nọ a whu no a sae nwa omai oma ha. Nọ ewegrẹ nọ i re ru ozighi gaga a te whu no, a re gbe “wo ogaga ovo ho.” (Itẹ 21:16) Ebaibol na ọ ta nọ “uyoyou nọ a wo gbe omukpahọ rai avọ ihri-eriọ rai e raha no.”​—Ọtausiuwoma Na 9:6.

• Orọnikọ uwhu o nwane rrọ ekuhọ mai hi. Ọghẹnẹ ọ te kpare ahwo nọ a whu no zihe ziọ uzuazọ.​—Jọn 5:28, 29; Iruẹru Ikọ 24:15.

• Ọghẹnẹ ọ ya eyaa inọ oke o be tha nọ “uwhu o gbẹ te jọ ofa ha.” (Eviavia 21:4) Ebaibol na ọ ta nọ: “Ahwo okiẹrẹe na a te rọ otọakpọ na reuku, yọ a te rriae bẹdẹ bẹdẹ.” Evaọ oke yena, ahwo a te gbẹ dhozọ uwhu hu.​—Olezi 37:29.