Uzẹme Kpahe Ẹwẹ na U Muẹme
“Wha rẹ te riẹ uzẹme na, uzẹme na u re ti ru owhai emuyẹ.”—JỌN 8:32.
1. Fikieme o jẹ r’oja re ma kiẹ erọwọ mai riwi kpahe ẹwẹ na gbe uwhu?
ERỌWỌ kpahe uwhu gbe Uzuazọ-Ofa ẹsibuobu i no egagọ gbe otọhotọ uruemu-ẹwho ohwo ze. Wọhọ epanọ ma ruẹ no na, no umuo orọwọ na inọ okenọ a tẹ wariẹ yẹ ẹwẹ na unuẹse buobu no ẹsiẹ ọ jẹ sae nyate ute urere riẹ rite ẹjiroro na inọ etoke uzuazọ ovuọvo jọ u re dhesẹ eyerikuhọ urere ohwo. Fiki onana, ohwo jọ ọ sai fievahọ inọ evaọ ukuhọ riẹ o ti kuomagbe ọnọ o muẹro na evaọ okenọ o te whu, omọfa o ve fievahọ nnọ o ti wo Nirvana, yọ omọfa jọ o ve fievahọ nnọ o ti wo osa-ohwa obọ odhiwu. Kọ otẹrọ ere, eme họ uzẹme na? Nọ erọwọ mai i re kpomahọ iruemu, owojẹ, gbe ẹjiroro mai na, kọ o gbẹ jọ omai oja re ma duku uyo kẹ onọ oyena?
2, 3. (a) Fikieme ma jẹ sai fievahọ oware nọ Ebaibol na ọ ta kpahe ẹwẹ na? (b) Wọhọ epanọ a dhesẹ evaọ Ebaibol na, eme họ uzẹme na kpahe ẹwẹ na?
2 Obe nọ o mae kpako evaọ akpọ na, Ebaibol na, u lele esi ọ ikuigbe ohwo-akpọ kpemu te oke emama ọ ẹwẹ ohwo-akpọ ọsosuọ na. Iwuhrẹ riẹ e kare ereghẹ-ididi gbe iruemu-anwae ahwo-akpọ. Ebaibol na o dhesẹ uzẹme na vevẹ kpahe ẹwẹ na: Whẹ họ ẹwẹ ra, iwhuowhu na e be rria uzuazọ vievie he, yọ a te kpare enọ e rọ ekareghẹhọ Ọghẹnẹ evaọ ẹruoke riẹ. Kọ eme ẹriẹ kpahe onana u dhesẹ k’owhẹ?
3 “Wha rẹ te riẹ uzẹme na, uzẹme na u re ti ru owhai emuyẹ,” ere Jesu Kristi ọ ta kẹ ilele riẹ. (Jọn 8:32) Ẹhẹ, uzẹme na o rẹ kẹ ohwo ufuoma. Rekọ eme uzẹme kpahe ẹwẹ na o rẹ k’omai ufuoma no?
Ufuoma no Ozọ gbe Ababọ-Ẹruore
4, 5. (a) Didi ozọ uzẹme kpahe ẹwẹ na u re sino? (b) Ẹvẹ ẹruore ẹkparomatha na o rọ tudu họ uzoge nọ ọ mọ ẹyao uwhu awọ?
4 The World Book Encyclopedia o ta nọ: “Ahwo buobu a rẹ dhozọ uwhu jẹ daoma whaha eroro kpahe iẹe.” “Ẹme na ‘uwhu’ omariẹ u zihe ruọ enwene oware nọ a rẹ fodẹ hẹ no evaọ abọ Ukiediwo-Ọre,” ere ogbiku jọ o muẹrohọ. Yọ evaọ iruemu-ẹwho jọ eme wọhọ “o kpo no” gbe “o zihe no” eye a be mae ta ro dhesẹ uwhu ohwo. Evaọ uzẹme ozọ uwhu onana yọ ozọ oware nọ a riẹ hẹ, keme rọkẹ ahwo buobu uwhu yọ oware udidi. Eriariẹ ọ uzẹme na kpahe oware nọ o rẹ via evaọ okenọ ma te whu o rẹ lẹliẹ ozọ onana kpotọ.
5 Wọhọ oriruo, roro kpahe oghẹrẹ iroro nọ e jọ eva Michaelyn ọrọ ikpe 15 na. O wo ẹyao ọ ọta evaọ azẹ jẹ rẹriẹ ovao dhe uwhu oja. Oni riẹ, Paula, ọ kareghẹhọ nọ: “Michaelyn ọ ta nọ ọ daezọ uwhu hu kemena ọ riẹ nọ uwhu yọ oware ubroke gheghe. Ma t’ẹme gaga kpahe akpọ ọkpokpọ Ọghẹnẹ gbe ahwo kpobi nọ a te kpare ziọ eva riẹ. Michaelyn o wo ẹrọwọ ologbo fihọ Jihova Ọghẹnẹ gbe ẹkparomatha na—ababọ ogẹgẹ avro.” Ẹruore ẹkparomatha na ọ kẹ uzoge ọmọtẹ aruọwha ọnana ufuoma no ozọ uwhu.
6, 7. Ababọ-ẹruore vẹ uzẹme kpahe ẹwẹ na o rẹ k’omai ufuoma no? Dhesẹ iẹe.
6 Ẹvẹ uzẹme na u kpomahọ ọsẹ gbe oni Michaelyn? Jeff ọsẹ riẹ ọ ta nọ: “Uwhu ọmọtẹ ọsese mai yọ oware nọ o mae da omai nọ o via k’omai no. Rekọ ma fievahọ eyaa ẹkparomatha Jihova riẹriẹriẹ, yọ ma bi rẹro ẹdẹ jọ nọ ma te wariẹ gba Michaelyn ọghaghae mai na yawo igbama mai. Roro epanọ ọwariẹ-kugbe na o ti woma te!”
7 Ẹhẹ, uzẹme kpahe ẹwẹ na o rẹ k’ohwo ufuoma no ọkora ọ ababọ-ẹruore nọ uwhu ohwo oyoyou o rẹ wha ze. Uzẹme, oware ovuovo o rẹ sai siọ edada gbe uweri nọ uwhu ohwo oyoyou o rẹ wha ze no riẹriẹriẹ hẹ. Dede na, ẹruore ẹkparomatha na o re ru uweri na lọhọ u ve je ru edada na mae lọhọ ẹwha.
8, 9. Ozọ vẹ uzẹme kpahe uyero iwhuowhu na o k’omai ufuoma no?
8 Uzẹme Ikereakere na kpahe uyero iwhuowhu o rẹ jẹ k’omai ufuoma no ozọ iwhuowhu na. Anwẹnọ a rọ riẹ uzẹme onana, ahwo buobu nọ a kie ro ifi ọ ogbẹrọwọ kpahe iwhuowhu na a gbẹ be ruawa kpahe ehao-ebọwo, eware-oka, ekpọnoma, gbe ighrodi hi, hayo kọ a bi dheidhe eghaghae ro kiofu esemọ rai re a seba ezihe ze ti kpokpo enọ e rọ uzuazọ họ. Uzẹme, nọ iwhuowhu na “a riẹ oware ovo ho” na, oghẹrẹ iruemu itieye na i fioka ha.—Ọtausiuwoma Na 9:5.
9 Uzẹme kpahe ẹwẹ na, nọ a rẹ ruẹ evaọ Ebaibol na, o rẹ ghinẹ kẹ ufuoma je fo evaifihọ. Rekọ je roro ẹruore obọdẹ jọ nọ Ebaibol na ọ k’owhẹ.
[Blurb on page 29]
Uzẹme kpahe ẹwẹ na o rẹ k’owhẹ ufuoma no ozọ uwhu, ozọ iwhuowhu na, ababọ-ẹruore kpahe uwhu ohwo oyoyou