Ẹruore Obọdẹ!
“Kohwo kohwo nọ ọ rọ nọ ọ rọwo omẹ, o re ti whuẹ hẹ.”—JỌN 11:26.
1. Oghẹrẹ ikegbe vẹ a te kpare ima ahwo buobu nọ a whu no enẹna fihọ?
OKENỌ a tẹ kpare ima ahwo buobu ze no evaọ ẹkparomatha na, a ti zihe ai ziọ uzuazọ evaọ otọakpọ ufofe he. (Iruẹru 24:15) A te kparoma evaọ ikegbe nọ a ru wowoma no yọ a te ruẹ nnọ a ruẹrẹ eria nọ a rẹ rria, emuosẹ, gbe emuore buobu fihọ kẹ ai no. Kọ amono a ti ru eruẹrẹfihotọ enana kpobi? Vevẹ, ahwo jọ a te jọ uzuazọ evaọ akpọ ọkpokpọ na taure ẹkparomatha otọakpọ na o te ti muhọ. Rekọ amono?
2-4. Didi obọdẹ ẹruore ọ rọ obaro kẹ ahwo nọ a be rria evaọ “edẹ urere” na?
2 Orugba eruẹaruẹ Ebaibol o dhesẹ nọ ma be rria evaọ “edẹ urere” erọ eyero eware nana.a (2 Timoti 3:1) Kẹle na, Jihova Ọghẹnẹ o bi ti dh’omahọ iruẹru ohwo-akpọ o ve ririe emuemu kpobi no otọakpọ na. (Olezi 37:10, 11; Itẹ 2:21, 22) Eva oke oyena, eme ọ te via kẹ enọ e be gọ Ọghẹnẹ avọ ẹrọwọ?
3 Jihova ọ te raha ikiẹrẹe na kugbe irumuomu hu. (Olezi 145:20) O ti ru oware utioye na ẹdọvo ho, yọ o ti ru ei hi evaọ okenọ o ti ru otọakpọ na fo no eyoma kpobi. (Wawo Emuhọ 18:22, 23, 26.) Evaọ uzẹme, obe urere Ebaibol na o t’ẹme kpahe “otu obuobu jọ, nọ ohwo ọvo ọ sai kele he, nọ i no erẹwho kpobi ze, erua gbe ahwo gbe erọo-unu,” nọ i no ‘uye ulogbo na’ ze. (Eviavia 7:9-14) Ẹhẹ, ogbotu gbidigbidi a te zọ vrẹ uye ulogbo na onọ akpọ omuomu ọnana u je ti t’oba na, yọ a te rueva akpọ ọkpokpọ Ọghẹnẹ. Evaọ obei, ahwo ẹmeoyo a sai ti wo erere vọvọ no ọruẹrẹfihọ ogbunu Ọghẹnẹ ze re ọ kẹ ahwo-akpọ ufuoma no umuemu gbe uwhu. (Eviavia 22:1, 2) Fikiere, “otu obuobu” na a te rẹro ruẹ uwhu vievie he. Kinọ obọdẹ ẹruore jọ!
4 Kọ ma sai fievahọ ẹruore ogbunu ọnana? Riẹriẹriẹ! Jesu Kristi omariẹ o dhesẹ nọ oke o te jọ nọ ahwo a te rria ababọ ewhuo. Taure ọ tẹ te kpare ogbẹnyusu riẹ Lazarọs, Jesu ọ ta kẹ Mata nọ: “Kohwo kohwo nọ ọ rọ nọ ọ rọwo omẹ, o re ti whuẹ hẹ.”—Jọn 11:26.
Whọ Sae Rria Bẹdẹ Bẹdẹ Re
5, 6. Otẹrọnọ whọ gwọlọ rria bẹdẹ bẹdẹ evaọ Aparadase ọ otọakpọ, eme who re ru?
5 Kọ whọ gwọlọ rria bẹdẹ bẹdẹ evaọ Aparadase ọ otọakpọ? Kọ who wo isiuru re whọ wariẹ ruẹ iyoyou ra? Kiyọ who re wo eriariẹ egbagba kpahe oreva gbe ẹjiroro Ọghẹnẹ. Evaọ olẹ se Ọghẹnẹ, Jesu ọ ta nọ: “Onana họ uzuazọ ebẹdẹ bẹdẹ, re a riẹ owhẹ nọ whẹ ọvo họ uvi Ọghẹnẹ, gbe Jesu Kristi ọnọ who vi.”—Jọn 17:3.
6 O rọ oreva Ọghẹnẹ inọ “[oghẹrẹ] ahwo kpobi a wo usiwo, re a ze te riẹ uzẹme na.” (1 Timoti 2:3, 4) Enẹna họ oke nọ who re ro wuhrẹ epanọ whọ sae rọ rria bẹdẹ bẹdẹ evaọ Aparadase ọ otọakpọ, kugbe ima amọfa nọ i muọ oreva Ọghẹnẹ họ eruo no enẹna. O te were Isẹri Jihova re a fiobọhọ k’owhẹ wuhrẹ viere kpahe Ọghẹnẹ gbe ute riẹ. Kọ whọ gbẹ nya bru ai eva obọ Ọgwa Uvie rai nọ ọ kẹle owhẹ hayo kere kpohọ adrẹse nọ ọ mae kẹle owhẹ evaọ enọ a fodẹ fihọ ẹwẹ-obe nọ ọ kẹle ọnana?
[Footnotes]
a Rri Eriariẹ Nọ I Re Su Kpohọ Uzuazọ Ebẹdẹ Bẹdẹ, ẹwẹ-obe avọ 98-107, nọ Watchtower Bible and Tract Society of New York, Inc., a kporo.
[Picture on page 31]
“Otu obuobu” jọ a gbe ti du whu vievie he