Edhesẹvia Odẹ Jihova Evaọ Otọakpọ na Soso
1 Okenọ Jesu o vi ilele riẹ re a jọ isẹri “rite ọnyaba akpọ na,” yọ o fi oriruo nọ a re lele h’otọ kẹ ai no. (Iruẹru 1:8) Oke kpobi gbe oria kpobi nọ ọ jọ duku ahwo, ọ jẹ t’ẹme kpahe ẹjiroro Ọghẹnẹ rọkẹ ohwo-akpọ. Evaọ aruorokele Jesu, utu ọrigbo ẹrọwọ na ọ be rehọ idhere sa-sa ru re “akpọ kpobi ọ riẹ” odẹ Jihova.—Aiz. 12:4, 5.
2 Oware nọ A Ru Evaọ Edẹ nọ I Kpemu No: Evaọ ikpe nọ i kpemu no, a je whowho evuẹ evaọ ebe-usi; a ru “Photo-Drama of Creation” je dhesẹ iẹe kẹ ima ahwo buobu; a rehọ imoto ikporakporo ro ruiruo; jẹ rehọ egramafonu gbe, evaọ omoke jọ, iredio ro ruiruo gaga—aikpobi jẹ rọ vuẹ emamọ usi na. Uzẹme, evaọ oke na kpobi a be hai fiẹgbahọ ẹnyabru ahwo ovao dh’ovao re a ruẹse nya lele isiuru nọ a duku. Fikiere, odibọgba n’uwou ruọ uwou u dhesẹ oma via no wọhọ obọdẹ edhere nọ a re ro dhesẹ odẹ Jihova via evaọ oria kpobi.—Iruẹru 5:42.
3 Oware nọ A Bi Ru Evaọ Ẹdẹ Mai Na: Avọ oke nọ u bi nwene na akpọ na o bi kpemu kparo, yọ evaọ eria buobu a rẹ kaki di ahwo họ uwou hu. Umutho ahwo ọvo u re nevaze re a se je roro kpahe eware abọ-ẹzi. Fikiere ma re nwene odibọgba mai lele ai hrọ. Fiba ẹkwotọ na nọ a re ru re kẹse kẹse, a tuduhọ omai awọ no re ma nya kpohọ obonọ ahwo a rrọ jẹ “hẹ thọ-oma vẹra” re ma ta ẹkẹunu mai kpahe ẹruore nọ ọ rrọ eva mai na. (1 Pita 3:15) Onana u dhesẹ omodawọ re ma ta usiuwoma kẹ ibe iruiruo, ibe emọ-isukulu, ahwo nọ a rrọ iyẹrẹ gbe evaọ egareji hayo ogege-eriosehọ, n’uwou eki te uwou eki, gbe oria ofa kpobi nọ a rẹ sae jọ duku ahwo. Avọ uketha Jihova, omodawọ mai o be kparobọ ziezi. Kọ who bi w’obọ evaọ ẹnyate ahwo oma evaọ oria kpobi nọ a rrọ?
4 Jomai omomọvo ọ rehọ edhere kpobi nọ o rovie ruiruo evaọ edhesẹvia odẹ Jihova evaọ ẹkwotọ mai. Ma rẹ sae ruẹ evevọwẹ ilogbo evaọ erugba odibọgba mai, nọ ma be rẹro so Jihova re o si ahwo udu ogbagba ze na.—Jọn 6:44.