‘Iruo Rai E Rrọ Ivrẹvru Hu’
1 Ẹvẹ iroro na e rrọ uduotahawọ te! Uye rai evaọ iruo Jihova o rrọ uvrẹvru hu. (1 Kọr. 15:58) Wo ohẹriẹ, roro kpahe oghẹrẹ nọ ahwo a be ruẹ uye te re a daoma ru ẹnyaharo fihọ edikihẹ rai evaọ uzuazọ hayo uyero abọ-ugho rai. A rẹ sai le ewuhrẹ okpehru evaọ ikpe buobu hayo rehọ oma kpobi kẹ iruo re a ruẹse nyaharo evaọ abọ ekwakwa efe. Ghele na, fiki “oke gbe uvẹ,” ẹsejọhọ a rẹ sai wo orro nọ a be gwọlọ na ha, hayo o rẹ sae gba ae họ re a wo edẹro kẹ umutho ekwakwa kawo vi epanọ a gwọlọ vẹre. Wọhọ “ofou olele họre,” omodawọ rai o rrọ ufofe. (Ọtausi. 1:14; 9:11) Fikiere, ẹvẹ o r’oja te re ma wo iruo buobu nọ ma re ru evaọ iruo evuọvo nọ e rrọ ivrẹvru hu na fikinọ i wo aghare okrẹkri!
2 Iruo Nọ I Ghine Wo Aghare: Ẹvuẹ emamọ usi Uvie Ọghẹnẹ na họ iruo nọ e mae r’oja evaọ otọakpọ na. O rrọ iruo nọ a re ru hrọ makinọ ahwo a kezọ hayo a kezọ họ. Ma gwọlọ re ma sae ta, wọhọ Pọl, inọ: “Azẹ ahwo kpobi ono omẹ uzou o te omẹ hẹ, keme me si oma hemu siọ owhai ohrẹ Ọghẹnẹ ososo ba ẹhrẹ ẹdọvo ho.”—Iruẹru 20:26, 27.
3 Okenọ ahwo a tẹ kezọ jẹ j’owọ lele ovuẹ Uvie na, ẹvẹ o rẹ kẹ oghọghọ te! Omoni ọ uvovo-aye jọ o whu. U te je gbei unu kpahe obonọ omoni riẹ o kpohọ—obọ odhiwu manikọ ehẹle? Ọ tẹ rọ odẹ Jihova lẹ se Ọghẹnẹ kẹ obufihọ, wọhọ epanọ oniọvo riẹ jọ o wuhrẹ i riẹ. U kri hi o te muọ Ebaibol na họ ewuhrẹ je muọ iwuhrẹ Ileleikristi họ ẹnya. O te ti wo eriwo ọkpokpọ kpahe uzuazọ jẹ hẹriẹ usu no ẹgba ọ usu-onya iyẹrẹ. Uvovo-aye na ọ tẹ siọ evovo, imu-egaga elọ, gbe uji-utho ba. Ọ rọwo nọ: “Uyoyou kẹ Jihova ọvo họ oware nọ o lẹliẹ omẹ nya siọ edhere uzuazọ uyoma utioye na ba. Jihova ọvo, evaọ ohrọoriọ ulogbo riẹ, họ ọnọ ọ rẹ sae k’omẹ ẹruore uzuazọ ebẹdẹ bẹdẹ.” Ọ gbẹ be raha uzuazọ riẹ fihọ ilale ifofe ofa ha.
4 Makinọ ahwo a se nọ a rẹ kezọ, yọ who ru oware ulogbo jọ gba no ghele. A riẹ nnọ Isẹri Jihova a weze bru ai no. U re dhesẹ ekiete, ẹrọwọ, gbe uyoyou ra via. Fikiere, kọ iruo ra evaọ iruo Olori na e rrọ ivrẹvru? Vievie!