Ghale Kugbe Amọfa Wọhọ Epanọ Ẹgwọlọ Rai Ọ Rrọ
1 Jihova o ru eruẹrẹfihọ ẹkwoma “odibo” ẹrọwọ na re i ru ẹgwọlọ abọ-ẹzi mai gba. (Mat. 24:45-47) Eruẹrẹfihọ enana buobu e rẹ jọ ẹkwoma ebe, Ebaibol, ebe ikokoli, ekasẹte ividio, ekasẹte itepu, gbe idiski ọ kọmputa nọ a re ro ru ekiakiẹ Ebaibol. Oware nọ Jihova ọ rẹ kẹ u re te ẹsikpobi ababọ ekufiẹ. O rẹro nọ ma rẹ ghale ae kugbe ohwohwo, jẹ ruẹ nọ ahwo kpobi a wo erere ẹrẹrẹe.
2 A rẹ raha igho buobu ro ru eruẹrẹfihọ itieye na kpobi. Inievo akpọ-soso na a be rẹrote araha enana. Onana o mae rrọ uzẹme anwẹnọ ukoko na u ro mu ọruẹrẹfihotọ ẹghale ebe ababọ unuigho jọ họ na, je fieva kpobi họ azọhọ unevaze re a rọ hwa osa araha na.
3 Epanọ Ma Sai ro Fiobọhọ: Ma sae j’owọ kẹ ohrẹ Pọl re ma ghale kugbe amọfa ‘wọhọ epanọ ẹgwọlọ rai ọ rrọ.’ (Rom 12:13) Okenọ ma te ru azọhọ unevaze kẹ iruo akpọ-soso na, yọ ma be ghale oware nọ ma wo kugbe inievo mai wariẹ akpọ na họ. Avọ iroro nana, ahwo jọ a jiroro no re a hai koko unuigho jọ họ nọ a re ro ru unevaze kẹ iruo akpọ-soso na k’amara k’amara, wọhọ epanọ a re ru kẹ araha Ọgwa Uvie na. A vuhumu nọ a be rehọ azọhọ nana ro ruiruo orọnikọ rọkẹ ebe ikporo ọvo ho rekọ rọkẹ abọ iruo na kpobi. Dai roro erere ologbo nọ okugbe-inievo akpọ-soso mai a te ruẹ otẹrọnọ amọfa a w’abọ evaọ edhere ọnana kẹse kẹse.
4 Ofariẹ, ma rẹ sae ghale kugbe ae ẹkwoma ẹrehọ umutho ẹsikpobi evaọ okenọ ma tẹ be yare ebe nọ a ru lọhọ re e sai te omai obọ na. Ẹyare eware nọ ma ghinẹ gwọlọ ọvo o rẹ kuvẹ kẹ inievo mai evaọ eria efa re a je wo eruẹrẹfihọ abọ-ẹzi nọ a gwọlọ re a jọ gaga jẹ wha ewhowho emamọ usi na haro evaọ abọ akpọ nọ a rrọ.—Hib. 13:16.
5 Ma rẹ mai wo onana họ iroro evaọ okenọ ma tẹ be yare ekwakwa nọ Society ọ rẹ rehọ igho buobu ru. Enana e kẹre te ekasẹte ividio, CD-ROM, ebe ilogbo, iko emagazini ẹgbukpe, gbe ekasẹte itepu. Viukpenọ a rẹ yare okwakwa ọvuọvo kẹ omomọvo uviuwou na, kọ ahwo uviuwou na kpobi a gbẹ sae rọ ovo ruiruo? Ma te bru oware nọ ma rẹ rehọ kẹ oma mai kpotọ, o te kuvẹ kẹ amọfa re a wo emamọ eware evona nọ ma be reawere rai na.—Fil. 2:4.
6 A be sae nyate abọjọ araha ebe nọ ma bi fihọ ada na ẹkwoma azọhọ unevaze kẹ iruo akpọ-soso Society nọ ma bi ru eva Ọgwa Uvie gbe erọ ahwo nọ a wo isiuru nọ e rehọ ebe na. Rekọ, u te te ebe nọ ma rẹ rehọ k’oma mai, ebe wọhọ ebe-ile, Yearbook, Ebaibol elọhuke, gbe ebe efa, ma rẹ sai rẹro nọ ahwo obọ otafe na a te rẹrote ẹgwọlọ mai hi. Idibo Jihova nọ e rehọ oma mudhe no họ ugogo ehri ọ obufihọ ugho onana. Avọ iroro yena, iwhowho-uvie buobu a rẹ wawo unuigho nọ eware enana i re te otẹrọnọ a jọ obọ eki dẹ ae, a ve ru azọhọ rai lele ere. Wọhọ oriruo, Ebaibol elọhuke, nọ a rehọ ọbia igoru ralọ igbenu riẹ na ọ sae ghare te ₦900 hayo bu viere, obe ulogbo nọ a re ro ru ekiakiẹ o sae ghare te ₦1,300 je bu viere, ukeledẹ nọ a rehọ ekọlọ sa-sa ro ru o sae ghare te oware wọhọ ₦50, ofeme-ulogbo nọ o rọ CD-ROM o sae ghare te umuo ₦1,000 rite ₦2,300 hayo bu viere, ikporakporo nọ e rrọ idiski e rẹ ghare te enwenọ ₦300 yọ a rẹ jẹ zẹ ekasẹte ividio jọ ghare viere. Ma gbe ru azọhọ nọ i te unuigho eyena ha o te whaha oware nọ ukoko na o rẹ sai rugba evaọ ẹwhaharo iruo akpọ-soso na.
7 Jesu o whowho nọ a ti vuhu ilele uzẹme riẹ mu vevẹ ẹkwoma uyoyou rai kẹ ohwohwo. (Jọn 13:34, 35) Ọghoruo mai evaọ ẹkẹ ekwakwa iwo gbe ababọ-oriobọ mai evaọ ẹghale kugbe amọfa wọhọ epanọ ẹgwọlọ rai ọ rrọ yọ emamọ idhere nọ ma re ro dhesẹ oma mai wọhọ uvi Ileleikristi.