Dhesẹ Ovuhumuo kẹ Ekwakwa nọ A Ruẹrẹhọ kẹ Iruo Ọghẹnẹ
1 Okenọ a je ru ọruẹrẹfihotọ re a ruẹrẹ etẹmpol na, Josaya Ovie na o jiri ahwo nọ a rọ iruo na kẹ, inọ: “A rẹ kiẹ otọ igho nọ a rehọ kẹ ae na ha, keme ae ewata.” (2 Ivie 22:3-7) Ovuhumuo nọ ezae eyena i wo kẹ eware efuafo o dhesẹ oma via evaọ oghẹrẹ nọ a rehọ ekwakwa nọ a muhọ ae obọ na ruiruo. Nẹnẹ na, nọ ma bi wo obọ eva iruẹru efuafo usiuwoma Ọghẹnẹ na, o gwọlọ nnọ ma re je dhesẹ oruọzewọ evaọ oghẹrẹ nọ ma rẹ rehọ ekwakwa nọ a rọ k’omai na ruiruo.
2 Evaọ Iruo Odibọgba Na: Ovuhumuo kẹ evuẹ nọ i wo uzou nọ e rrọ ebe mai na gbe ẹriẹ araha nọ a ro ru ai o rẹ lẹliẹ omai riwi ai ghaghae. U fo ho re ma ghale ebe mai epanọ u je rọkẹ ahwo nọ a dhesẹ uvumọ ovuhumuo kẹ ovuẹ Ebaibol na ha. Otẹrọnọ ohwo o dhesẹ umutho isiuru kpahe emamọ usi na, ma rẹ sae kẹ e omobe-ovẹvẹ jọ viukpọ ebe efa.
3 Ghale ebe evaọ edhere nọ o re dhesẹ ovuhumuo kẹ aghare rai. Whaha oria ẹgbede nọ whọ rẹ nya se ae ba nọ a jẹ vaha e fihọ otọ. Re whọ sae whaha ẹraha kufiẹ ebe na, kele ebe nọ e rrọ owhẹ obọ evaọ obọ uwou taure whọ tẹ te rehọ ebe efa. Otẹrọnọ emagazini jọ e be hai kiọkọ owhẹ obọ eva ukere kpobi, ru re who bru ayare ra kpotọ.
4 Ebe nọ Ma re ro Ruiruo k’Omobọ Mai: Ebe nọ ma ghinẹ gwọlọ ọvo ma re vi. Maero ma re dhesẹ omoyọrọ evaọ okenọ ma tẹ be yare Ebaibol ọ deluxe, Reference Bibles, gbe ebe ilogbo efa, wọhọ Concordance, Index, iko ọ Insight, gbe obe ọ Proclaimers , enana kpobi igho buobu a ro kporo ai.
5 Kọ whọ be hae kareghẹhọ kere odẹ gbe adrẹse ra fihọ ebe ra? Onana u re fi obọ họ ru ebe nọ a re mi ro nwene enọ i vru no kpotọ. Obe-ile, Ebaibol, hayo obe ra jọ nọ a re ro ru uwuhrẹ u te vru, ẹsejọhọ whọ te jọ udevie eware nọ i vru nọ a kokohọ evaọ obọ Ọgwa Uvie hayo Ọgwa okokohọ na rue riẹ.—Luk 15:8, 9.
6 Joma dao oma rehọ ebe mai na ruiruo evaọ edhere areghẹ. Onana yọ edhere nọ ma re ro dhesẹ oruọzewọ mai evaọ eroruiruo ekwakwa Uvie na nọ Jihova o mu họ omai obọ na.—Luk 16:10.