Rehọ Ebe Mai Ruiruo Ziezi
1. Ẹvẹ ma rẹ rọ rehọ aro kele oriruo Jesu nọ o dhesẹ edẹro kẹ ọruẹrẹfihotọ Jihova?
1 Nọ Jesu ọ rehọ edhere igbunu rọ ko ogbotu ahwo no, ọ tẹ ta nọ a koko emu nọ o kiọkọ họ. (Mat. 14:19-21) Edẹro itieye nọ Jesu o dhesẹ kẹ ọruẹrẹfihotọ Jihova na o rrọ emamọ oriruo k’omai inọ ma rẹ rehọ eware nọ Jihova ọ be rọ ẹkwoma “odibo oruọzewọ” na ru k’omai ro ruiruo ziezi.—Kọl. 3:15; Luk 12:42; Mat. 24:45-47.
2. Eme ma rẹ sai ru nọ emagazini e gbẹ d’omai obọ fia ha?
2 Emagazini: Ma gbe bi fi emagazini nọ ma rehọ họ ada ha, e sae d’omai obọ fia. Emagazini e tẹ be d’omai obọ fia ẹsikpobi, joma bru unu nọ ma be hae rehọ kpotọ. Kọ ẹvẹ kpahe emagazini nọ i kri no? E tẹ make rọnọ i kri no, eme nọ e rrọ ae eva i gbe wo iruo. Emagazini nọ i kri no e tẹ vọ omai obọ, ma sae ta kẹ ọsẹro usiuwoma ota hayo ọkpako ọfa, a ti dhesẹ edhere nọ ma sai ro fi ai họ ada k’omai.
3, 4. Eme ma re wo họ iroro taure ma tẹ te rehọ ebe evaọ obọ Ọgwa Uvie?
3 Ebe Efa: Nọ a te nwene kpohọ obe nọ a bi fihọ ada evaọ amara ọkpokpọ, kake jọ obọ uwou ra kiẹ riwi tao sọ who wo obe na bu te enọ whọ rẹ sae wha kpohọ usiuwoma taure whọ tẹ te jọ obọ Ọgwa Uvie rehọ efa kugbe. Rehọ enọ whọ gwọlọ ro ruiruo evaọ oka yena ọvo, nọ eyena i te re no, whọ vẹ tẹ rehọ efa.
4 Rọ kpahe ebe nọ whọ gwọlọ wo kẹ omobọ ra, yare enọ whọ ginẹ gwọlọ ọvo. Kere odẹ ra fihọ oria nọ a dhesẹ na. Oyena u re fi obọ họ k’owhẹ kake ruẹ obe ra otẹrọnọ u vru. Otẹrọnọ who wo Watchtower Library evaọ CD-Rom, who te je koko emagazini nọ who mi evaọ ukpe nana soso họ, u gbe du gwọlọ nọ whọ rẹ yare Uwou-Eroro gbe Awake! nọ ukoko ọ gba ekru hu.
5. Eme ma re wo họ iroro nọ ma te bi fi obe họ ada kẹ ohwo?
5 Efihọ-Ada Ebe: Ahwo nọ a dhesẹ uvi isiuru ọvo ma re fi ebe mai họ ada kẹ. Woi họ iroro inọ mai họ ahwo nọ ma wo owha-iruo orọ eru unevaze fihọ ebe nọ ma be wha kpohọ usiuwoma. Whọ tẹ rehọ obe kẹ ohwo, daoma vuẹe inọ ọ sai ru unevaze rọ tha iruo usiuwoma ota akpọ-soso mai na uke.
6. Fikieme ebe mai e jẹ rrọ ghaghae k’omai gaga, kọ eme onana o rẹ wọ omai ru?
6 Jesu ọ rọ emu abọ-iwo rọ kuọ ahwo evaọ edhere igbunu, rekọ emu abọ-ẹzi ọ mae rọ kuọ ahwo. Jesu ọ ta nọ: “Fiki ebrẹdi ọvo ohwo ọ rẹ rọ zọ họ, rekọ fiki kẹme kẹme nọ ọ via no unu Ọghẹnẹ ze.” (Mat. 4:4) Ebe mai i bi wuhrẹ ahwo uzẹme Ebaibol nọ u re ru ai wo uzuazọ ebẹdẹ bẹdẹ. (Jọn 17:3) E ghare vi eware nọ ma rẹ raha kufiẹ!