Uzou Avọ 20

Oware Igbunu Avivẹ Evaọ Kena

OKENỌ Jesu o zihe ziọ ẹkwotọ ẹwho riẹ nọ ọ ta usiuwoma kẹre gaga no evaọ Judia, orọnikọ ọ ziọ eriosehọ họ. Ikpoye, o te tube muọ odibọgba nọ ọ mae rro họ evaọ Galili, ẹkwotọ nọ ọ jẹ whẹro. Rekọ ilele riẹ, ukpenọ a lele iei, a te zihe bru iviuwou rai gbe ekọ nọ a jọ vẹre.

Didi ovuẹ Jesu o muhọ ewhowho? Ona: “Uvie Ọghẹnẹ o kẹle ino: Wha kuevarẹriẹ, wha rọwo usiuwoma na.” Kọ eme o no rie ze? Ahwo Galili a te dede Jesu rehọ. Ahwo na kpobi a jẹ kẹe ọghọ. Ghele na, onana orọnikọ fiki ovuẹ riẹ hẹ rekọ, ukpoye, fikinọ ibuobu rai a jọ Ọnyavrẹ na evaọ Jerusalẹm emerae jọ nọ i kpemu a tẹ ruẹ eware igbunu nọ ọ jọ obei ru.

U muẹro nọ Jesu o muọ odibọgba ologbo Galili riẹ họ evaọ Kena. Whọ rẹ sae kareghẹhọ nọ, vẹre, nọ o no Judia ze, o zihe ame ruọ udi evaọ eha-orọo jọ evaọ obei. Evaọ oke avivẹ nana, ọmọ okpohwo egọmeti Herọd Antipas Ovie na jọ ọ be mọ gaga. Nọ o yo nọ Jesu o no Judia ziọ Kena no, okpohwo na ọ tẹ nya no ugbobọ uwou riẹ evaọ Kapaniọm ze te gwọlọ Jesu. Avọ uweri, ọzae na ọ tẹ kpakpa iẹe nọ: ‘Iviena nyaze obọnana re ọmọ mẹ o te whu.’

Jesu ọ tẹ kuyo nọ: ‘Nyawa; ọmọ ra ọ sasa no!’ Okpohwo Herọd na ọ tẹ rọwo ọ tẹ nya ugbothabọ na zihe kpo. Evaọ edhere odibo riẹ jọ o te zere iei, ọnọ ọ dhẹ ze te ta kẹe nọ ese ọ gbẹ riẹ hẹ—ọmọ riẹ ọ sasa no! Ọ tẹ nọe nọ: ‘Okevẹ oma riẹ o rọ sasa?’

A tẹ kuyo nọ: ‘Odẹ nukpo eva ughọjọ ọvo uvo.’

Okpohwo na o te vuhumu nọ nwanọ auwa ọvo ọyena Jesu ọ rọ ta nọ, ‘Ọmọ ra ọ sasa no!’ Uwhremu na te ọzae na te ekru riẹ kpobi a te zihe ruọ ilele Kristi.

Fikiere Kena o te wo aruoriwo wọhọ oria nọ Jesu ọ jọ ru eware igbunu isiava, nọ u kpoka họ ezihetha riẹ no Judia ze. Rekọ orọnikọ enana ọvo họ eware igbunu nọ o ru no rite oke nana ha, rekọ i wuzou keme i kpoka họ ezihe riẹ ziọ Galili.

Jesu ọ tẹ rova ri obọ uwou kpohọ Nazarẹt. Eme ọ rọ obei hẹrẹ iẹe? Jọn 4:43-54; Mak 1:14, 15; Luk 4:14, 15.

▪ Okenọ Jesu o zihe ziọ Galili, eme ọ via kẹ ilele riẹ, kọ ẹvẹ ahwo a dede i rie rehọ te?

▪ Didi oware igbunu Jesu o ru, kọ ẹvẹ u ro kpomahọ ahwo nọ a ru rie kẹ?

▪ Ẹvẹ Jesu ọ rọ do orro họ Kena oma?