Ruabọhọ “Oware Uwoma Uruo”
1 Emamọ oware who ru nọ who ro zihe ro odibo Jihova Ọghẹnẹ. Rekọ, use-abọ nọ o riẹ evaọ oke obẹbẹ onana họ re whọ ruabọhọ “oware uwoma uruo.” (Gal. 6:9) Dede nọ onana o rẹ gwọlọ uvi omodawọ, whọ rẹ sai ru ei. Evaọ oghẹrẹ vẹ?
2 Wo Oghẹrẹ Uruemu Jesu: Wọhọ Jesu, whọ rẹ sai thihakọ edawọ otẹrọnọ whọ tẹrovi ẹruore Uvie na. (Hib. 12:2, 3) Jọ u mu owhẹ ẹro nnọ Jihova o you owhẹ yọ ọ gwọlọ nọ whọ kparobọ. (2 Pita 3:9) Fi eva ra kpobi họ iẹe, avọ imuẹro nnọ o ti fiobọhọ k’owhẹ. (1 Kọr. 10:13) Hẹ lẹ kẹse kẹse, yare Jihova re o fiobọhọ k’owhẹ thihakọ. (Rom 12:12) Ghọghọ evaọ imuẹro na inọ akothiwo ra o ti su kpohọ uyero ọjẹrehọ evaọ aro Ọghẹnẹ. (Rom 5:3-5) Edikihẹga ra evaọ ẹbọ ‘oghẹrẹ uruemu Kristi Jesu’ o te wha evevọwẹ s’owhẹ yọ o te lẹliẹ udu Jihova ghọghọ.—Rom 15:5; Itẹ 27:11.
3 Ruabọhọ Eruo Eware Iwoma: Rehọ eruẹrẹfihotọ nọ Jihova o ru kẹ ahwo riẹ no re i fiobọhọ kẹ ai ruabọhọ oware uwoma uruo na ro ruiruo vọvọ. Nya lele emamọ omaa omobọ-ohwo orọ isase Ẹme Ọghẹnẹ gbe ewuhrẹ ebe nọ utu ọrigbo nọ o wo ẹrọwọ avọ areghẹ na a kporo no Ebaibol ze. Ruẹrẹ oma kpahe kẹ, kpohọ, je w’obọ evaọ iwuhrẹ ukoko na kpobi ẹsikpobi. Taure iwuhrẹ Ileleikristi i te ti muhọ gbe okenọ i te kuhọ no, kuomagbe inievo abọ-ẹzi ra reawere usu okpekpe. Fi uvi itee họ kẹ odibọgba ra re whọ sai w’obọ ziezi evaọ usiuwoma ota na je ru ona ra woma viere evaọ ẹrọvia emamọ usi na kẹ amọfa.
4 Enẹ whọ sae rọ ruabọhọ oware uwoma uruo jẹ ruẹ oghọghọ viere evaọ oke ovona. Rọ kpahe onana, oniọvo jọ evaọ obọ Itali ọ ta nọ: “Evaọ owọwọ, nọ me te t’uwou yọ mẹ jọ iruo Jihova ruiruo okikpo no, uzẹme o rọ inọ oma o rẹ rọ omẹ. Rekọ mẹ rẹ wereva, yọ me re yere Jihova fikinọ ọ k’omẹ oghọghọ nọ ohwo ọvo ọ rẹ sae rehọ mi omẹ hẹ.” Fikiere, ruabọhọ oware uwoma uruo, whẹ omara whọ te ruẹ oghọghọ ulogbo re.