Uwuhrẹ 4

Ono Họ Ẹdhọ Na?

Setan Ẹdhọ na—bovẹ o noze? (1, 2)

Ẹvẹ Setan o re ro su ahwo thọ? (3-7)

Fikieme whọ jẹ whaha Ẹdhọ na? (7)

1. Otofa ubiẹme “ẹdhọ” na họ ohwo nọ ọ rẹ ta erue imuomu kpahe omọfa. Otofa “Setan” họ ọwegrẹ hayo ohwo ọwọsuọ. Enana yọ edẹ nọ a kẹ ọwegrẹ ologbo Ọghẹnẹ. Evaọ oke ọsosuọ, ọ jọ ẹnjẹle ọgbagba evaọ ob’odhiwu kugbe Ọghẹnẹ. Ghele na, o te roro vrẹta kpahe omobọ riẹ jẹ gwọlọ ẹgagọ nọ u fo nọ a rẹ rehọ kẹ Ọghẹnẹ.—Matiu 4:8-10.

2. Ẹnjẹle ọnana, Setan, ọ tẹ rehọ ẹkwoma araomuomu t’ẹme kẹ Ivi. Ẹkwoma erue nọ ọ ta kẹe, o te ruei ghẹmeeyo kẹ Ọghẹnẹ. Enẹ Setan ọ rọ họre oware nọ a re se “esuo-atanure” Ọghẹnẹ, hayo ọkwa riẹ wọhọ ọnọ Ọmai Kpehru. Setan ọ kpare onọ sọ Ọghẹnẹ o bi su evaọ edhere nọ u fo gbe evaọ ewoma enọ e rọ otọ esuo Riẹ. Setan ọ tẹ jẹ vravro sọ ohwo-akpọ jọ ọ te rehọ oma kpotọ kẹ Ọghẹnẹ. Fiki onana, Setan ọ tẹ rehọ ere ru oma riẹ họ ọwegrẹ Ọghẹnẹ. Fiki erei a ro sei Setan Ẹdhọ na.—Emuhọ 3:1-5; Job 1:8-11; Eviavia 12:9.

3. Setan ọ rẹ daoma lẹliẹ ahwo họ re a gọe. (2 Ahwo Kọrint 11:3, 14) Edhere ọvo jọ nọ o bi ro su ahwo thọ họ ẹkwoma egagọ erue. Otẹrọnọ egagọ i bi wuhrẹ erue kpahe Ọghẹnẹ, yọ i bi ghine ru ẹjiroro Setan. (Jọn 8:44) Ahwo nọ e rọ otu egagọ erue a sae rọwo n’eva ze nnọ a be gọ Ọghẹnẹ uzẹme na. Rekọ Setan a be ghinẹ gọ. Ọye họ “ọghẹnẹ akpọ nana.”—2 Ahwo Kọrint 4:4.

4. Uruemu-imizi yọ edhere ọfa nọ Setan o bi ro si ahwo fihọ otọ ogaga riẹ. A rẹ sai se idhivẹri na re e thae uke, re e nwa amọfa oma, re e ruaro kpahe obaro, hayo re i ru eware igbunu. Setan họ ogaga omuomu nọ ọ rọ obemu iruemu enana kpobi. Re ma ru Ọghẹnẹ evawere, ma re wo obọ ọvo kpahe uruemu-imizi hi.—Iziewariẹ 18:10-12; Iruẹru 19:18, 19.

5. Setan ọ be rehọ ẹkwoma omoya ovioma ọgaga gbe egagọ ikoko isuẹsu rọ viẹ ahwo họ re. Ejọ i re roro nọ orẹwho hayo ovioma rai u woma vi orọ amọfa. Rekọ onana yọ ọrue. (Iruẹru 10:34, 35) Amọfa a re riwi kpohọ ikoko egọmeti inọ a ti ku ebẹbẹ ohwo-akpọ họ. Eva ere o ruo, yọ a be se Uvie Ọghẹnẹ. Uvie na ovo họ ifue ebẹbẹ mai.—Daniẹl 2:44.

6. Edhere ọfa nọ Setan o bi ro su ahwo thọ họ ẹkwoma isiuru emuemu nọ ọ rẹ rọ dawo ae. Jihova ọ vuẹ omai nọ ma whaha iruemu ethọthọ keme ọ riẹ nọ e rẹ nw’omai oma. (Ahwo Galesha 6:7, 8) Ahwo jọ a rẹ sae gwọlọ nọ who kuoma gbai evaọ iruemu eyena. Rekọ kareghẹhọ, inọ, ghinọ Setan họ ọnọ ọ gwọlọ nọ who ru eware enana.—1 Ahwo Kọrint 6:9, 10; 15:33.

7. Setan ọ sae rehọ ukpokpoma hayo ọwọsuọ ru owhẹ nyase Jihova ba. Ejọ nọ who you e sae dheva gaga fikinọ who bi wuhrẹ Ebaibol na. Efa e rẹ sai s’owhẹ ẹkoko. Rekọ ono o wo uzuazọ ra? Setan ọ gwọlọ guegue owhẹ re whọ siọ Jihova ba ewuhrẹ kpahe. Who ru re Setan o fi owhẹ kparobọ họ! (Matiu 10:34-39; 1 Pita 5:8, 9) Ẹkwoma ẹwhaha Ẹdhọ, whọ rẹ sai ru Jihova evawere je dhesẹ nọ whọ kpare esuo-atanure Riẹ kpehru.—Itẹ 27:11.

[Pictures on page 9]

Egagọ erue, uruemu-imizi, gbe orẹwho mẹ oja, i re su ahwo thọ

[Picture on page 9]

Whaha Setan ẹkwoma ewuhrẹ nọ who re gbe wuhrẹ kpahe Jihova