Iruo nọ E Gwọlọ Omarokpotọ
1 Ẹme Ọghẹnẹ ọ tudu họ omai awọ nnọ ma wo “udu udhedhẹ. [Ma] rọ uyoma fi-ifo uyoma ha, rekọ ikpoye kọ ọvunu-oguo.” (1 Pita 3:8, 9) Uthubro yena o nwani kie kpahe iruo usiuwoma ota na. Uzẹme, odibọgba Oleleikristi na o rẹ sae jọ odawọ omarokpotọ mai.
2 Omarokpotọ yọ okwakwa nọ u re fi obọ họ kẹ omai thihakọ iyero nọ e kare evawere. Okenọ ma tẹ rrọ usiuwoma, ma rẹ nya bru erara nọ i zizie omai hi, yọ ma riẹ nnọ ejọ i ti dhesẹ uruemu ababọ-ẹwo. Re ma gbẹ ta usiuwoma ghelọ uruemu utioye na o gwọlọ omarokpotọ. Evaọ ẹkwotọ jọ nọ ọ rẹ bẹbẹ gaga, inievo-emetẹ ekobaro ivẹ jọ i je no ẹthẹ ruọ ẹthẹ kẹdẹ kẹdẹ evaọ ikpe ivẹ ababọ ohwo nọ ọ jẹ k’ezọ kẹ ae! Ghele na, a thihakọ, yọ nẹnẹ na ikoko ivẹ e rrọ oria oyena.
3 Epanọ A re Ru Kpahe Evega: Omarokpotọ u re fi obọ họ kẹ omai rọ aro kele Jesu evaọ okenọ amọfa a te dhesẹ eva egaga kẹ omai. (1 Pit. 2:21-23) A ta eme-ẹsọ kẹ oniọvo-ọmọtẹ jọ evaọ uwou jọ, aye uwou na ọ kaki mu ei họ kẹsena ọzae na o te kuomagbe aye riẹ, ọ tẹ ta kẹ oniọvo-ọmọtẹ na nnọ o no ighẹ na no. Oniọvo-ọmọtẹ na ọ tẹ hwẹ ọvo, ta inọ o r’ẹro nnọ o ti lele ai ta ẹme evaọ oke ofa. Onana u gbe ọzae avọ aye na unu gaga te epanọ a rọ gaviezọ kẹ Osẹri ọfa nọ o weze bru ai, a tẹ jẹ uzizie re a kpohọ ewuhrẹ evaọ obọ Ọgwa Uvie rehọ. Oniọvo-ọmọtẹ nọ a kake ta ikpehre-eme kẹ na ọ nya ze ti yere ae jẹ wariẹ se isẹri kẹ ai. Ma rẹ sai ru eva ahwo nọ a be kezọ họ lọhọ re ẹkwoma “udhedhẹ avọ oma-urokpotọ” nọ ma re dhesẹ.—1 Pita 3:15; Itẹ 25:15.
4 Whaha Uke-Ufuo: Eriariẹ Ebaibol nọ ma wo e kẹ omai uvumọ ẹjiroro nọ ma re ro rri ahwo kpokpotọ hayo rehọ edẹ nọ i re si adhẹẹ no oma dhesẹ ae he. (Jọn 7:49) Ukpoye, Ẹme Ọghẹnẹ ọ hrẹ omai nọ ma “ta ẹme oyoma [ohwo ọvo]” ho. (Tait. 3:2) Nọ ma te wo udu uwowolẹ, wọhọ epanọ Jesu ọ jọ, ma re ru amọfa oma sasa. (Mat. 11:28, 29) Omarokpotọ nọ a rẹ rọ t’ẹme kẹ ohwo o rẹ lẹliẹ ovuẹ mai ruọ ahwo oma viere.
5 Ẹhẹ, omarokpotọ u re fi obọ họ kẹ omai thihakọ evaọ ẹkwotọ ọbẹbẹ. O rẹ sai ru eva ahwo nọ a rẹ rọwo yo ho lọhọ, yọ u re ru ovuẹ Uvie na si amọfa urru. Maero, u re ru eva were Jihova, ọnọ ọ rẹ “rọ aruoriwo kẹ enọ e roma-kpotọ.”—1 Pita 5:5.