Obọdẹ Aghare ọrọ Areghẹ Ọghẹnẹ
1 Ahwo jọ a roro inọ u fo re Isẹri Jihova a tẹro vi obufihọ evaọ eru kpotọ ebẹbẹ nọ e be rẹriẹ ovao ku ahwo-akpọ nẹnẹ. Ahwo otiọye na a be ruẹ obọdẹ aghare nọ ọ rrọ iruo ewuhrẹ Ebaibol mai hi. O wọhọ epanọ Pọl ukọ na o kere: “Keme ẹme [ure oja, NW ] na ọ rọ ugheghẹ rọ kẹ e nọ i bi vrẹ na, rekọ o rọ ogaga Ọghẹnẹ kẹ omai otu nọ a bi siwẹ.” (1 Kọr. 1:18) Evaọ uzẹme, ma riẹ inọ odibọgba Ileleikristi na họ iruo nọ e mai wuzou kpobi nọ a be jọ otọakpọ na ru nẹnẹ.
2 Emamọ Uzuazọ Nẹnẹ: Umutho iyẹrẹ kakao ọvo a ruẹ no evaọ omodawọ ahwo-akpọ re a ku ebẹbẹ nọ e rẹriẹ ovao dhe ahwo-akpọ họ. Izi nọ a fihọ e re whaha eviharo iruẹru ugbarugba ha. Ọvọ udhedhẹ gbe egbaẹmo nọ a re vi kpohọ oria nọ ozighi ọ rrọ re a ru udhedhẹ i ri ru ẹmo serihọ họ. Oma nọ ahwo a be dawo re a si uvuhu no u bi w’iruo ho. (Ol. 146:3, 4; Jeri. 8:9) Evaọ abọdekọ riẹ, ovuẹ Uvie na u nwene izuazọ ima ahwo buobu no ẹkwoma obọ nọ u fihọ kẹ ae no whẹ ẹgọ ọkpokpọ nọ ọ rẹ were Ọghẹnẹ họ. (Rom 12:2; Kọl. 3:9, 10) Evaọ ere oruo, a be reawere emamọ uzuazọ nẹnẹ.—1 Tim. 4:8.
3 Obaro Evawere: Fiba obọ nọ u bi fihọ k’omai dadamu kẹ ebẹbẹ uzuazọ inẹnẹ, areghẹ Ọghẹnẹ o bi fi obọ họ k’omai m’omaa kẹ obaro na. (Ol. 119:105) O be thomai no omodawọ ufofe nọ ma rẹ rọ gwọlọ nwene uyerakpọ nana kpohọ ewoma. (Ọtausi. 1:15; Rom 8:20) Ẹvẹ eva e be were omai te inọ ma be raha uzuazọ mai kufiẹ hẹ kẹ ilale itee nọ e rẹ tọ họ! Ukpoye, ma be rọ ẹgba mai ro le eyaa Jihova nọ i muẹro ọrọ “ihru ekpokpọ avọ akpọ ọkpokpọ” nọ ẹrẹreokie ọ te rria. Okenọ ẹdẹ ẹdhoguo Jihova o te te, o te jọ vevẹ gaga inọ enọ e rẹro so areghẹ Ọghẹnẹ a riẹ salọ.—2 Pita 3:10-13; Ol. 37:34.
4 Dede nọ areghẹ Ọghẹnẹ ọ sae wọhọ oware ugheghẹ evaọ aro enọ e rehọ oke rai kpobi kẹ “ereghẹ oke onana,” uzẹme riẹ họ oye ọvo họ edhere nọ u fo elele. (1 Kọr. 1:21; 2:6-8) Fikiere, ma rẹ gbẹ jọ otọakpọ na soso whowho ovuẹ nọ u no obọ Ọghẹnẹ ze, ọnọ ọye ọvo “o wo areghẹ” na.—Rom 16:27.