Ma Sai Ru Oware nọ Jihova Ọ Gwọlọ mi Omai
1 Izi gbe ehri-izi Jihova nọ ma rẹ nya lele họ edhere uzuazọ nọ o mai fo eyeri nẹnẹ, yọ u re fi obọ họ kẹ omai fi emamọ otọhotọ họ kẹ obaro ebẹdẹ. (Ol. 19:7-11; 1 Tim. 6:19) Dede na, akpọ Setan o bi fi omai họ ọyawọ ọgaga. Ugboma sebaẹgba mai u bi fiba use-abọ na. Nọ ma be daoma nya te owha-iruo Ikereakere mai na, ẹsejọ eware i re si nyẹ omai. (Ol. 40:12; 55:1-8) O sai tube gbe omai unu dede sọ ma te sai ru eware kpobi nọ Jihova ọ gwọlọ mi omai. Eva oke utioye na, eme ọ rẹ sai fi obọ họ kẹ omai yọrọ emamọ edikihẹ abọ-ẹzi mai?
2 Ijaje Jihova E Rrọ Owha Ogbẹgbẹdẹ Hẹ: Jihova ọ rẹ yare eware nọ ma sae kẹ hẹ mi omai hi. Ijaje riẹ e rrọ owha ogbẹgbẹdẹ hẹ rekọ e rrọ rọkẹ ewoma mai. (Izie. 10:12, 13; 1 Jọn 5:3) Ọ riẹ omoyẹlẹ mai ahwo-akpọ, “be kareghẹhọ nọ mai ẹkpẹ gheghe.” (Ol. 103:13, 14) Ọghẹnẹ ọ be rehọ aruoriwo jẹ omodawọ kpobi nọ ma be rọ gọe rehọ, o tẹ make rọnọ iyero mai e be lẹliẹ omai ru te ẹgwọlọ họ. (Izerẹ 5:7, 11; Mak 14:8) O zizie omai re ma gbolo ewha mai kpobi kẹe, ọ tẹ jẹ kẹ omai imuẹro inọ o ti ru iei lọhọ kẹ omai re ma yọrọ ẹrọwọ mai.—Ol. 55:22; 1 Kọr. 10:13.
3 Akothiho ọ Roja: Ikuigbe Ebaibol na erọ ahwo nọ a wo akothiho wọhọ Elaeja, Jerimaya, gbe Pọl u dhesẹ oware nọ akothiho ọ jẹ roja. (Hib. 10:36) Jihova ọ sẹro rai evaọ oke ẹbẹbẹ gbe oke nọ udu u whrehe ai. (1 Iv. 19:14-18; Jeri. 20:7-11; 2 Kọr. 1:8-11) Yọ omarokpotọ inievo mai erọ ọgbọna o be kẹ omai ọwhọ. (1 Pita 5:9) Iriruo itieye nọ ma re roro kpahe ẹsikpobi e rẹ sai fi obọ họ kẹ omai kru udu ga.
4 Ẹruore nọ ma wo fihọ eyaa Ọghẹnẹ “u kie omai uduvi.” (Hib. 6:19) Onana o wọ Abraham avọ Sera jẹ ayare Jihova rehọ, inọ a no uwou rai re a nyae ‘rria wọhọ erara evaọ otọ eyaa na.’ O kẹ Mosisi ẹgba nọ o ro dikihẹ whawha kẹ egagọ uzẹme. O kẹ Jesu ẹzẹ ro thihakọ ure oja. (Hib. 11:8-10, 13, 24-26; 12:2, 3) Eyaa Ọghẹnẹ erọ akpọ ọkpokpọ nọ ma rẹ rehọ ọwhọ roro kpahe ẹsikpobi u ti fi obọ họ kẹ omai yọrọ edikihẹ-ga mai.—2 Pita 3:11-13.
5 Eroro kpahe iruẹru omarokpotọ, oma-olahiẹ, gbe aruọwha mai erọ oke nọ u kpemu o sae jẹ kẹ omai ẹgba evaọ odibọgba mai. (Hib. 10:32-34) O rẹ kareghẹhọ omai oghọghọ nọ ma re wo tobọ eva okenọ ma te ru oware nọ Jihova ọ gwọlọ mi omai—egagọ ẹwẹ mai kpobi.—Mat. 22:37.
[Study Questions]
1. Iroro vẹ ma rẹ sai lele muabọ ẹsejọ, kọ fikieme?
2. Ẹvẹ Jihova o ro dhesẹ ororokẹ evaọ eware nọ ọ gwọlọ mi omai?
3. Ẹvẹ Jihova ọ be rọ bọ omai ga re ma thihakọ?
4. Fikieme u je wuzou re ma hae kareghẹhọ eyaa Ọghẹnẹ ẹsikpobi?
5. Fikieme o sae rọ kẹ ọbọga nọ ma te roro kpahe iruẹru omarokpotọ omobọ mai erọ oke nọ u kpemu?