Ẹnyate Ahwo Buobu Oma Te Epanọ O rẹ Lọhọ Te Kpobi
1 Ilele ọsosuọ Jesu a rọ ajọwha whowho ovuẹ Uvie na. A rehọ idhere nọ i kiehọ rọ wha emamọ usi na te ahwo buobu oma te epanọ o rẹ lọhọ te kpobi. Ileleikristi nọ a kẹ ẹgba ẹzi ro kere Ebaibol na a kere i rie evaọ ẹvẹrẹ Griki ọlọlọhọ, nọ o jọ ẹvẹrẹ nọ ahwo wariẹ Uvie-Ulogbo Rom kpobi a jẹ ta. Ofariẹ, o wọhọ nọ eta-usiuwoma ajọwha no umuo ikpe-udhusoi avivẹ gbe ọrọ avesa na vrẹ a kobaro evaọ eroruiruo ikulu-ebe, enọ e lọhọ eroruiruo vi iko-ebe nọ ohwo ọ tẹ be gwọlọ ugogo oria nọ ẹme ọ rrọ.
2 Eroruiruo Ewuhrẹ-Eware-Ikuo: Ẹkwoma Aizaya ọruaro na, Jihova ọ ta no: “Wha re ti vievie erẹwho na.” (Aiz. 60:16) Evaọ orugba ọgbọna ọrọ eruẹaruẹ nana, idibo Jihova a be rehọ ekwakwa aghae nọ i no erẹwho na ze rọ wha iruo usiuwoma ota na haro. Wọhọ oriruo, evaọ 1914, ikpe buobu taure a te ti muọ isinima họ eroruiruo ziezi wọhọ oware okọ, Emọ-Uwuhrẹ Ebaibol a te mu isinima nọ a re se nọ “Photo-Drama of Creation” họ edhesẹ. Edhesẹ isinima nana nọ o rẹ rehọ te euwa eree na, nọ iwoho riẹ e vọ avọ ekọlọ gbe edo na, u se isẹri ziezi kẹ ima ahwo buobu.
3 Nẹnẹ, ahwo Ọghẹnẹ a be rehọ ijini nọ i re kere ebe vẹrẹ gaga gbe ekwakwa nọ e rẹ rọ ekọmputa ruiruo ro kere Ebaibol gbe ebe nọ a kere no Ebaibol ze evaọ evẹrẹ udhusoi buobu. A be rehọ edhere nọ ọ vẹrẹ gaga rọ wha ebe nọ a kere no Ebaibol ze ro kpohọ eria nọ i thabọ gaga evaọ akpọ na, nọ i bi te ahwo obọ evaọ ekwotọ nọ i bu te 235. Jihova ọ rehọ ẹkwoma ẹzi riẹ rọ wọ idibo riẹ no re a rehọ ekwakwa itieye nọ a rehọ eriariẹ eware-ikuo ro ru na ruiruo ziezi, bi ru re uzẹme Ebaibol u te ahwo buobu obọ vi epaọ ọsosuọ evaọ ikuigbe.
4 Inwene Omobọ-Ohwo: Oma o wọ egegagọ uzẹme no re a ru inwene kẹ omobọ rai re a sae wha emamọ usi na te ahwo buobu oma. Ibuobu i ru uzuazọ rai lọhọ no re a sai wobọ ziezi evaọ iruo usiuwoma ota na. Ejọ e kwa kpohọ oria nọ ẹgwọlọ kẹ iwhowho-uvie ọ jẹ mae rro no. Efa i ru odibọgba rai kẹre no ẹkwoma ewuhrẹ ẹvẹrẹ ọfa.
5 Ofariẹ re, ma rẹ jẹ sae wha emamọ usi na te ahwo buobu oma ẹkwoma usiuwoma nọ ma rẹ ta evaọ okenọ ahwo a rẹ rọ jọ uwou gbe evaọ oria nọ a jẹ sae ruẹ ahwo. Otẹrọnọ eva ẹsibuobu ahwo a rẹ jọ uwou eva uvo evaọ ẹkwotọ rai hi, kọ whọ sai nwene omaa ra re who kpohọ usiuwoma ota eva owọwọ? Kọ eria ẹgbede e riẹ nọ a jẹ sae ta usiuwoma? Kọ whọ dawo usiuwoma ota ifonu gbe usiuwoma ota evaọ ẹkwotọ ekiọthuọ no? Kọ whọ be hae gwọlọ uvẹ nọ whọ rẹ rọ ta usiuwoma evaọ oke-gheghe?
6 Ẹvẹ uvẹ-ọghọ nọ ma wo o rro te nọ ma bi ro wobọ evaọ isẹri-ise ilogbo nọ a bi se kpahe odẹ Jihova gbe Uvie riẹ! Joma ruabọhọ ovuẹ uzẹme Ẹme Ọghẹnẹ nọ o rẹ kẹ uzuazọ na nọ ma rẹ wha se ahwo buobu te epanọ o rẹ lọhọ te kpobi.—Mat. 28:19, 20.
[Study Questions]
1. Eme Ileleikristi ọsosuọ a ru re a sae wha emamọ usi na te ahwo buobu oma te epanọ o rẹ lọhọ te kpobi?
2, 3. (a) Ẹvẹ Aizaya 60:16 o bi ro rugba eva oke ọgbọna? (b) Ẹvẹ a be rọ rehọ ekwakwa nọ a rehọ eriariẹ eware-ikuo ro ru rọ wha egagọ uzẹme haro?
4. Inwene vẹ ahwo jọ a jọ uzuazọ rai ru no re a sae wha emamọ usi na se ahwo buobu?
5, 6. Eme wha rẹ sai ru re wha rọ ovuẹ uzẹme Ebaibol na te ahwo buobu oma evaọ ẹkwotọ ukoko rai?