“Me Wo Isiuru Kpahe Ovuẹ Rai Hi”
1 Ere ahwo jọ a rẹ ta kpahe ovuẹ mai evaọ eria jọ. Kọ eme o re fiobọhọ k’omai nọ iruo na e gbẹ bẹ omai no ho nọ ma tẹ jọ ẹkwotọ mai nyaku ahwo nọ a wo isiuru kpahe ovuẹ mai hi? Ẹvẹ ma sai ro ru ahwo wo isiuru kpahe emamọ usi na?
2 Yọrọ Oghọghọ Ra: Ma tẹ be kareghẹhọ oware nọ o soriẹ nọ ahwo buobu a gbe ro wo isiuru hu u re fiobọhọ k’omai yọrọ oghọghọ mai. Ahwo nọ a wuhrẹ no inọ eware i mu hrerẹ ze orọnikọ ẹma a ma rai hi, hayo ahwo nọ a yọrọ evaọ eria nọ a jọ rọwo nọ Ọghẹnẹ ọ rrọ họ, o sae jọnọ a ri roro kpahe aghare Ebaibol na ha. O sae jọnọ eviẹhọ nọ ahwo jọ a muẹrohọ no evaọ egagọ u ru rai nọ a gbe wo isiuru kpahe egagọ họ. Rọkẹ ejọ, o sae jọnọ idhọvẹ gbe ababọ-ẹruore o be lẹliẹ ai ru ere. (Ẹf. 2:12) Ejọ fiki awaruọ uzuazọ nọ o nẹ rai b’otọ a bi rri otọ mu hu.—Mat. 24:37-39.
3 Ghelọ uruemu ababọ odederehọ otujọ, ma rẹ sai wo oghọghọ evaọ iruo odibọgba na, keme ma riẹ nọ omodawọ mai o be wha orro se Jihova. (1 Pita 4:11) Ofariẹ, uzẹme na nọ ma bi dhesẹ kẹ ahwo, makọ te ahwo nọ a ri sei gbe oware ovo ho, o rẹ bọ ẹrọwọ mai ga. Joma daoma rri ahwo nọ a rrọ ẹkwotọ mai wọhọ epanọ Jihova o rri rai. O da riẹ kẹ ahwo Ninẹve nọ “e riẹ obọze avọ ẹkpẹlobọ rai hi.” (Jona 4:11) U fo nọ ahwo nọ a rrọ ẹkwotọ mai a yo usi uwoma na! Fikiere, ajọ o b’omai no ho, rekọ ma dawo idhere nọ ma re ro ru ahwo wo isiuru kẹ ovuẹ Ebaibol na.
4 Ta Kpahe Eware nọ E Rrọ Ọdawẹ kẹ Ahwo Ẹkwotọ Ra: Whọ sae fodẹ oware jọ nọ u kpomahọ ahwo oborai evaọ eme-emuhọ ra, whọ vẹ nọ ohwo nọ who bi lele tẹme na re ọ ta eriwo riẹ. Gaviezọ kẹe, kẹsena who ve dhesẹ ovuẹ Ebaibol na nọ o rẹ kẹ omosasọ na kẹe rọ kpahe fihọ ẹme nọ ọ ta. Nọ okpẹtu jọ ọ via evaọ eria jọ, oniọvo jọ ọ jẹ jọ unuẹthẹ kpobi nọ o te ta epanọ oware nọ o via kẹ ahwo na o da riẹ te. Ọ ta nọ: “U gbunu kẹhẹ, ahwo a te mu ẹme họ ẹkpahe kẹ omẹ. Me lele ahwo tẹme ziezi ẹdẹ ọyena keme me dhesẹ uvi isiuru kpahe ahwo nọ me weze bru na.”
5 Uvie Ọghẹnẹ u ti ku ebẹbẹ kpobi nọ i bi te ohwo-akpọ họ. Daoma vuhu ẹbẹbẹ nọ ọ mae rrọ ọdawẹ kẹ ohwo nọ who bi lele tẹme. Ẹsejọhọ ọ te k’owhẹ uvẹ re whọ ta kpahe ovuẹ Ebaibol nọ o rẹ kẹ ẹruore na. O gbẹ via ere he, ẹsejọhọ o te ruẹe re ọ gaviezọ okiofa.—Iruẹru 17:32.