Jọ Oruiruo Evawere
1 Jesu ọ ta nọ evaọ etoke ẹzino riẹ, ahwo buobu a te “riẹ hẹ,” wọhọ epanọ o jọ evaọ edẹ Noa. (Mat. 24:37-39) Fikiere, ma re rẹro nọ ahwo buobu a te gaviezọ kẹ emamọ usi Uvie na ha. Eme ọ rẹ sai fiobọhọ k’omai yọrọ ẹzi oghọghọ nọ ma bi ru odibọgba mai na?—Ol. 100:2.
2 Orọ ọsosuọ, u fo re ma wo h’iroro nọ te ovuẹ mai gbe eromuo mai re ma ta usiuwoma na obọ Ọghẹnẹ i no ze. Ababọ ezọgaviẹ kpobi evaọ odibọgba na, ghelọ emamọ omodawọ mai, o ghinẹ rọ ọjẹkufiẹ Jihova. Ẹkareghẹhọ nnọ edikihẹga mai evaọ usiuwoma ota na o wo ọjẹrehọ riẹ u re fiobọhọ k’omai yọrọ oghọghọ gbe evawere iroro mai wọhọ enọ i bi ru ẹme Ọghẹnẹ.—Jem. 1:25.
3 Orọ avivẹ, ahwo nọ e te jẹ edhere esiwo Jihova rehọ a gbẹ riẹ. Dede nọ ibuobu a rẹ jọ avọ ababọ osegboja, ahwo nọ e wọhọ igodẹ a riẹ nọ a ti gbe kokohọ, makọ enẹna, evaọ oke urere na. U fo nọ ma gbẹ hae ta usiuwoma na, nya ruọ “kẹwho kẹwho hayo kiwhre kiwhre” re ma “guọlọ ohwo eva riẹ nọ o te i.”—Mat. 10:11-13.
4 Yọrọ Eriwo Ọliọliọ: Iyẹrẹ iyoma egagọ erue e kẹ ejọ ababọ-isiuru no. Uyerakpọ nana u ru amọfa fihọ “oyoya, a tẹ jẹ vaha” abọ no. (Mat. 9:36) Ababọ iruo, ẹruọsa ugboma, gbe omofọwẹ nọ ahwo jọ a be ruẹ-uye rai u dhe rai ọvẹ no. Ewo otoriẹ nana u re fiobọhọ k’omai thihakọ evaọ iruo mai na. Daoma rehọ eme nọ i duobọte eware nọ e mae rọ ọdawẹ kẹ ahwo evaọ ẹkwotọ mai ro mu ẹmeọta họ. Fiobọhọ kẹ ae ruẹ nọ Uvie Ọghẹnẹ ọvo họ ifue na. Rehọ Ikereakere na gbe igogo eme nọ e rọ ebe Society na ruiruo rọ rehọ emamọ usi na nyate idu rai.—Hib. 4:12.
5 Enọ e be rehọ evawere ru ẹme Ọghẹnẹ a rẹ kareghẹhọ ẹsikpobi nọ: “Evawere ỌNOWO na họ ogaga” mai. (Neh. 8:10) U du fo re ma ku oghọghọ mai fiẹ hẹ. “Uwou na u te te, wha ru re udhedhẹ rai o ziẹ e; rekọ u gbe te he, wha ru re udhedhẹ rai u zihe bru owhai.” (Mat. 10:13) Jihova o re ru oghọghọ gbe ogaga mai kpokpọ nọ ma bi thihakọ evaọ iruo efuafo riẹ na, yọ ọ rẹ ghale edikihẹga mai.