“Ta Ẹme Ọghẹnẹ Ababọ Ozọ”
1 Kọ who re siuke kpemu ẹsejọ nọ uvẹ nọ whọ rẹ rọ ta kpahe ẹrọwọ ra u te rovie fihọ eva obọ isukulu hayo obọ iruo? Kọ usiuwoma nọ whọ ruẹrẹ oma kpahe kẹ hẹ nọ whọ rẹ ta kẹ imoni ra gbe ahwo nọ wha gbẹ rrọ oria hayo ahwo nọ whọ riẹ hẹ o rrọ use-abọ k’owhẹ? Eme o ti fi obọ họ kẹ omai kpobi sae rehọ uvẹ kpobi nọ u rovie fihọ rọ “ta ẹme Ọghẹnẹ ababọ ozọ”?—Fil. 1:14.
2 Who Fibo Ho: Nọ a tẹ wọ eku fihọ ogbẹnyusu ọkpekpe hayo omoni ra uzou, kọ who ti fibo, whọ gbẹ te thọe? Nọ anwọ emuhọ ohwo-akpọ ze a be rọ ta Jihova ogbẹnyusu nọ ọ mae kpekpe omai oma na raha. Ma wo uvẹ ọghọ obọdẹ nọ ma re ro se isẹri kẹ Ọghẹnẹ ologbo mai! (Aiz. 43:10-12) Uyoyou udidi nọ ma wo kẹ Jihova o rẹ sai fi obọ họ kẹ omai whaha omovuọ hayo ozodhẹ jẹ wọ omai sisẹri kpahe uzẹme na ududu.—Iruẹru 4:26, 29, 31.
3 Kareghẹhọ inọ ovuẹ mai yọ emamọ usi. O te wha irere ibẹdẹ se ahwo nọ a gaviezọ kẹ ovuẹ na. Aghare iruo usiuwoma ota na nọ ma rẹ tẹrovi viukpọ omobọ mai hayo enọ e be wọso mai, u ti fi obọ họ kẹ omai ta usiuwoma avọ aruọwha.
4 Iriruo Amọfa: Iriruo amọfa nọ i dikihẹ whawha avọ ẹrọwọ jẹ rehọ aruọwha whowho ẹme Ọghẹnẹ e rẹ wha omai udu ga. Wọhọ oriruo, Enọk ọ rọ aruọwha whowho ẹdhoguo Jihova kpahe erahaizi. (Jud 14, 15) Noa ọ rọ aruọwha ta usiuwoma kẹ ahwo nọ a jẹ daezọ ẹme Ọghẹnẹ hẹ. (Mat. 24:37-39) Ileleikristi ikpe-udhusoi ọsosuọ nọ a rri fihọ ahwo gheghe nọ e riẹ obe he a ruabọhọ usiuwoma ota ghelọ ọwọsuọ ọgaga. (Iruẹru 4:13, 18-20) A be hae jọ Uwou-Eroro Na gbe Awake! gbiku Ileleikristi ọgbọna nọ e rehọ fiki ẹrọwọ nọ a fihọ Jihova fi ozodhẹ ohwo-akpọ kparobọ jẹ rehọ ajọwha ta usiuwoma.
5 Ma rẹ sai wo aruọwha nọ ma tẹ be hai se ikuigbe uzuazọ idibo Ọghẹnẹ oke anwae nọ i kru ẹrọwọ rai nọ a rẹriẹ ovao dhe iyero ebẹbẹ. (1 Iv. 19:2, 3; Mak 14:66-71) A “wo udu eva Ọghẹnẹ mai,” jẹ ta usiuwoma ababọ ozodhẹ. Ma rẹ sai ru ere re!—1 Tẹs. 2:2.