“Jọ Ẹme Rai Ọ . . . Hẹ Mere Wọhọ Uwhei Kẹse Keṣẹ”
1. Eme u dhesẹ re ma ru ‘eme mai mere wọhọ uwhei’?
1 “Jọ ẹme rai ọ vọ avọ aruoriwo, jẹ hẹ mere wọhọ uwhei kẹse kẹse, re wha riẹ epanọ ohwo o re yo kẹ ohwo.” (Kọl. 4:6) Re ma ru eme mai mere wọhọ uwhei u dhesẹ nọ ma rẹ salọ eme iwowoma, jẹ t’ẹme evaọ edhere nọ eme mai e rẹ rọ were ọnọ ọ be kezọ kẹ omai. Onana nọ ma re ru nọ ma tẹ rrọ usiuwoma u wuzou gaga.
2. Eme Jesu o ru nọ ọ sae rọ ta usiuwoma kẹ aye Sameria jọ?
2 Oriruo Jesu: Nọ Jesu o je serihọ kẹle ozae jọ, ọ rehọ uvẹ yena lele aye obọ Sameria jọ nọ ọ nyaze ti vo ame ta ẹme. Unuẹse buobu evaọ etoke ẹmeọta na, aye na ọ ta eme jọ nọ i dhesẹ egrẹ nọ ọ rrọ udevie ahwo Ju avọ Sameria nọ u kri otọ no. Ọ tẹ jẹ ta inọ ọ rọwo nọ uyẹ Jekọp ahwo Sameria a no ze, dede nọ ahwo Ju a be ta kekeke inọ ahwo Sameria yọ erara evaọ ẹkwotọ na. Ukpenọ Jesu ọ rehọ eme nọ ọ ta na ro lele iei sikẹ, ọ kpọ ẹmeọta na rri eware nọ i si aye na uru. O wha riẹ ze nọ ọ sae rọ ta usiuwoma kẹ aye na nọ o wha erere se aye na gbe ezae ẹwho na.—Jọn 4:7-15, 39.
3. Ẹvẹ ma sai ro lele oriruo Jesu nọ ma tẹ rrọ usiuwoma ota?
3 Nọ ma tẹ be ta usiuwoma, u fo re ma hae kareghẹhọ ẹjiroro nọ ma bi ro ru onana—re ma “ta usiuwoma” orọ emamọ eware. (Rom 10:15) U fo re ma rehọ eware ọbọga nọ i re si ahwo uru ro no Ebaibol na ze ro lele ai tẹme, orọnikọ ma re ru ai roro nọ ma be wọso eware nọ a rọwo ho. Nọ ohwo ọ tẹ make ta ẹme ọthọthọ jọ, ma rẹ nwane za họ iẹe unu ẹsiẹsiẹe na ha. Kọ oware jọ o rrọ ẹme nọ ọ ta na nọ ma sae rọwokugbe hayo ro jiri ei? Ma sai si iroro ohwo kpohọ oware nọ oria ikere jọ o ta ẹkwoma onọ utiona: “Kọ who roro nọ oware nọ a jọ etenẹ ta na o sae lọhọ?”
4. Eme ma re ru otẹrọnọ ohwo nọ ma be ta usiuwoma kẹ o bi zue eme họ k’omai?
4 Kọ ẹvẹ o rẹ jọ otẹrọnọ ohwo nọ ma be ta usiuwoma kẹ o bi zue eme họ k’omai hayo ma ruẹ inọ ọ fake gwọlọ si ikẹ gheghe? Ma re gbe dhesẹ ẹzi udu dhedhẹ avọ ẹmeunu mai nọ ọ rẹ jọ wowolẹ. (2 Tim. 2:24, 25) Otẹrọnọ ohwo na o gbe wo isiuru kpahe ovuẹ Uvie na ha, u re woma re ma rọ areghẹ nya siẹe ba.—Mat. 7:6; 10:11-14.
5. Ẹvẹ oniọvo-ọmọtẹ jọ o ro wo emamọ iyẹrẹ fikinọ ọ rọ unu kpotọ kpahe ẹme?
5 Emamọ Iyẹrẹ: Nọ oniọvo-ọmọtẹ jọ ọ jẹ gwọlọ ta usiuwoma kẹ aye jọ nọ a gbẹ rrọ okegbe ọvona, aye na o te do ku ei avọ evedha, be lae eka. Oniọvo-ọmọtẹ mai na ọ tẹ rọ unu kpotọ ta kẹe inọ: “Eva i du dha owhẹ hẹ. Mẹ riẹ nọ o te dha owhẹ eva vẹre he. U woma, kodẹ!” Nọ eka ivẹ e vrẹ no, aye na ọ tẹ ziọ uwou oniọvo-ọmọtẹ mai na, o te wou unu fiki uruemu nọ o dhesẹ na, jẹ ta nọ ọ gwọlọ gaviezọ kẹ oware nọ oniọvo na ọ gwọlọ ta kẹe vẹre na. Evaọ ẹsibuobu, ẹme ọlọlọhọ nọ a rẹ kpahe o rẹ wha emamọ iyẹrẹ ze!—Itẹ 15:1; 25:15.
6. Fikieme u ro wuzou re ma ta eme nọ e rẹ mere nọ ma tẹ be ta usiuwoma?
6 Daoma hae ta eme nọ e rẹ mere nọ whọ tẹ be ta usiuwoma. O tẹ make rọnọ ohwo nọ ma bi lele t’ẹme ọ gwọlọ gaviezọ họ, ẹsejọhọ ọ te gaviezọ oke ofa nọ Isẹri Jihova a te weze bru ei.