Edidi Evawere Uviuwou
1 Uviuwou na họ ugogo ehri nọ u ru ahwo-akpọ via, yọ uviuwou na iwhre, ikpewho, ibretọ, gbe erẹwho kpobi i no ze. Nẹnẹ na, uviuwou na o rrọ otọ otunyẹ vi epaọ anwẹdẹ kpobi. Ikpomahọ egaga e riẹ nọ i bi kpokpo omofọwẹ uviuwou na. (1 Jọn 5:19) Ma yere Jihova gaga, Ọnọ o ru ọruẹrẹfihotọ uviuwou na, nọ ọ rọ k’omai ithubro nọ e rẹ sai fi obọ họ k’omai wo evawere uviuwou! Ahwo nọ a bi lele ọkpọvio riẹ a be ruẹ inọ ebẹbẹ rai i bi kpotọ, yọ a be jọ uviuwou rai wo evawere.
2 Ehri-Izi Ebaibol E rẹ Thọ Ohwo: Ebẹbẹ nọ iviuwou e be rẹriẹ ovao dhe nẹnẹ o wha riẹ ze nọ o rọ gwọlọ nọ ma rẹ ‘bọ iviuwou mai ga’ kpata kpata, je wuhrẹ amọfa epanọ a sae rọ bọ uviuwou rai ga re. (Itẹ 24:3, 27) Oware nọ o rẹ wha uvi evawere fihọ uviuwou họ, ehri-izi Ebaibol nọ a re fihọ iruo. Ithubro nana nọ e rrọ Ebaibol na e rẹ kẹ ohwo kpobi nọ ọ rrọ uviuwou na erere evaọ kabọ kabọ uzuazọ. Uviuwou nọ u fi rai họ iruo u re wo evawere gbe udhedhẹ nọ u re no obọ Ọghẹnẹ ze. (Wawo Aizaya 32:17, 18) A ruẹrẹ ehri-izi nọ e rẹ sai fi obọ họ k’omai bọ uviuwou mai ga fihọ othotha evaọ obe na Edidi Evawere Uviuwou. Uzoẹme kpobi u kuhọ avọ ẹkpẹti uwuhrẹ nọ a jọ fiẹgba họ ehri-izi nọ o gwọlọ nọ ahwo uviuwou a rẹ kareghẹhọ. Ibuobu ekpẹti nana i muhọ avọ onọ nana “Ẹvẹ izi Ebaibol nana i re ro fiobọhọ . . . ?” A jọ etẹ fodẹ eware nọ e rrọ oreva Ọghẹnẹ re ma sae riẹ eriwo riẹ kpahe oware nọ ma bi wuhrẹ na.—Aiz. 48:17.
3 M’Omaa Enẹna re Who Wo Erere: Ma omaa enẹna re who wo erere vọvọ no uwuhrẹ obe ọ Evawere Uviuwou na ze, onọ u ti muhọ evaọ oka ọ August 4, 2008. Gbaemu inọ who re kpohọ Uwuhrẹ Obe Ukoko na koka koka. Rọ oma totọ ruẹrẹ uwuhrẹ kpobi họ, se ikereakere nọ a fodẹ re whọ ruẹ epanọ i ro kiekpahe uwuhrẹ na. Roro didi kpahe uwuhrẹ na ẹkwoma oma ra nọ whọ rẹ nọ inọ, ‘Ẹvẹ mẹ sai ro fi eme nana họ iruo evaọ obọ uwou, obọ isukulu, evaọ odibọgba na, gbe oghẹrẹ nọ me bi lele inievo ukoko na yeri?’ Ruẹrẹ oma họ ziọ uwuhrẹ na re whọ kuyo nọ o rẹ ta udu họ amọfa awọ.—Rom 1:12.
4 Iviuwou nọ e nya lele ewuhrẹ obe nana a ti wo ọbọga abọ-ẹzi gbe okugbe, yọ onana u ti fi obọ họ kẹ ae mugba kẹ ọwọsuọ Setan. (1 Tim. 4:7, 8; 1 Pita 5:8, 9) Ma yere Jihova, Ọnọ ọ to uviuwou na họ jẹ kẹ omai ithubro nọ ma rẹ nya lele evaọ uviuwou na!