Gwọlọ Enọ I Te Via
1. Ẹvẹ ma re ro dhesẹ ovuhumuo kẹ uvẹ-ọghọ usiuwoma ota nọ ma wo na?
1 Jesu ọ rehọ uvẹ kpobi rọ ta usiuwoma kẹ iwhrori evaọ etoke odibọgba riẹ. (Aiz. 61:1, 2) Wọhọ unuẹworo gbe enyukọ Kristi, ma wo uvẹ-ọghọ nẹnẹ nọ ma rẹ rọ rehọ aro kele iei ẹkwoma oma nọ ma re ro totọ gwọlọ enọ i te via evaọ ẹkwotọ mai ẹsikpobi.—Mat. 10:11; 2 Kọr. 5:20.
2. Ẹvẹ Pọl o ro nwene lele uyero, kọ eme u no rie ze?
2 Nwene Lele Uyero Na: Pọl ukọ na o wo uruemu nọ ọ jẹ hae rọ kaki kpohọ uwou-egagọ ahwo Ju nyae ta usiuwoma kẹ ahwo Ju gbe enọ i kurẹriẹ ruọ egagọ Ju. (Iruẹru 14:1) Evaọ Filipai, Pọl avọ Saelas a nyae gwọlọ ahwo nọ a rẹ ta usiuwoma kẹ ‘evaọ oria nọ a roro nọ ahwo a rẹ jọ lẹ.’ A nyaku utu eyae jọ nọ a ta usiuwoma kẹ, yọ omọvo rai jọ nọ a re se Lidia, ọ jẹ uzẹme na rehọ vẹrẹ.—Iruẹru 16:12-15.
3. U te no usiuwoma nuwou ruọ uwou na no, eria efa vẹ ma jẹ sae ta usiuwoma?
3 U te no usiuwoma nuwou ruọ uwou nọ whọ rẹ nya no, kọ whọ sae jọ egareji, eria erozaha, eria nọ a jẹ rehọ ahwo iruo, iyẹrẹ nọ i re zurie gaga, oria eki-ọthuọ nọ e rrọ ẹkwotọ ra ta usiuwoma? Ẹsejọhọ whọ sae rehọ ẹkwoma ileta hayo ifonu rọ ta usiuwoma kẹ ahwo nọ a be rria ighẹ hayo iwou nọ i wo igeti nọ a rẹ kẹ ahwo uvẹ rueva ha. Ẹro nọ who re muhotọ gbe uyero ẹkwotọ ra nọ who re nwene lele o te lẹliẹ owhẹ wo iruo buobu evaọ iruo Ọnowo na.—1 Kọr. 15:58.
4. Eme ọfa ma rẹ sai ru otẹrọnọ ẹkwotọ ukoko mai ọ rẹ kakao?
4 Iwhowho-uvie buobu a ru odibọgba rai kẹre no ẹkwoma ẹkwa kpohọ ukoko ofa evaọ orẹwho rai hayo orẹwho ofa. Amọfa a wuhrẹ ẹvẹrẹ ọkpokpọ no re a sae ta usiuwoma kẹ ahwo evẹrẹ efa.
5. Ẹvẹ ma re rri oke nana nọ ma rrọ na, kọ eme ọ rẹ jọ ọtamuo mai?
5 Mai kpobi ma re woi họ iroro inọ “akpọ na họ udhu na.” (Mat. 9:37; 13:38) Nọ ekuhọ uyero akpọ omuomu nana o kẹle gaga no na, o gba omai omomọvo họ re ma roro kpahe ọvuọ uyero, onaa, ẹgba, gbe uvẹ kpobi nọ ma sai ro ru odibọgba mai kẹre. Jihova ọ k’omai imuẹro inọ, ma tẹ rọ isiuru Uvie na karo, ọ te ghale uvi omodawọ mai nọ ma bi ro ru odibọgba mai kẹre na.—Mat. 6:33.