Kọ Okugbe Akpọ-Soso O te Lọhọ?

KỌ UDHEDHẸ manikọ okpẹtu akpọ na ọ rẹriẹ ovao dhe? O wọhọ nọ onọ ohwo ọ ta kpobi eva usu ivẹ na, ọ rẹ sae ruẹ oware kru dhobọ.

Isu akpọ jọ a be robọ sudu ta nọ udhedhẹ akpọ-soso o te sae lọhọ—ẹsejọhọ fiki ozọ nọ u bi mu ai kpahe oware nọ u re noi ze nọ a gbẹ sai le udhedhẹ tobọ họ. Rekọ ibuobu a be ruawa kpahe enọ wọhọ: Erẹwho vẹ i wo ekwakwa-ẹmo nọ e rẹ sai kpe ahwo gbidi gbidi ẹsiẹvo? Kọ a ti yiwi si obọ no ai ẹdẹjọ? Kọ eme ọ te via nọ a te si obọ no ai?

Ikuigbe i dhesẹ nọ oma-uhrowo gbe omagbẹre e rrọ ọzadhe kẹ ewotobọ udhedhẹ kri no, yọ ẹsibuobu egagọ i bi fou-erae họ ozighi viukpenọ a re fi obọ họ ku ei họ. Ọniyẹrẹ jọ nọ a re se James A. Haught o kere nọ: “Oware kpobi nọ o rẹ hẹriẹ ahwo o rẹ sae wha omukpahọ ze, yọ egagọ họ oware jọ nọ o be mai fi ohẹriẹ họ udevie ahwo kpaobọ.” Ọ ta re nọ: “Dede nọ wariẹ akpọ-soso họ ahwo a rọwo nọ egagọ i re ru ahwo ‘woma,’ o rrọ vevẹ inọ egagọ i bi ru ahwo jọ ru eware iyoma nọ a rẹ ruẹ unu gbiku rai hi.” Okere-ebe jọ nọ a re se Steven Weinberg o wo oghẹrẹ eriwo ọvona. O kere nọ: “Oware nọ o rẹ sae wọ emamọ ahwo ru eyoma họ egagọ.”

Kọ ẹruore jọ ọ riẹ inọ akpọ na o ti wo okugbe ẹdẹjọ? Ee! Rekọ wọhọ epanọ ma te ruẹ na, okugbe akpọ ọ te sai no obọ ahwo-akpọ hayo egagọ ahwo-akpọ ze he.

[Ẹme nọ a fi ẹgba họ nọ ọ rrọ ẹwẹ-obe avọ 3]

Kọ akpọ na ọ wọhọ ebọmbo nọ ọ kẹle ẹsa no?