Ahwo nọ A Zizie kẹ Emuọriọ—Amono Ọghẹnẹ O re Zizie?

Nọ Jesu o siwi ọzae nọ awọ riẹ i fu na no, ọ gbẹ jọ uwou ohwo Farisi na. Jesu o te muẹrohọ nọ ahwo nọ a zizie na a be salọ eria ilogbo nọ a rẹ keria kẹ emuọriọ na. Kẹsena ọ tẹ rọ uvẹ nana wuhrẹ ai kpahe omaurokpotọ.

Jesu ọ ta nọ: “Ohwo jọ o te zizie owhẹ kpohọ ehaa orọo, whọ nyae keria oria nọ o mai kpehru hu. Ẹsejọhọ a zizie ohwo jọ nọ ọ rro vi owhẹ. Kẹsena ọnọ o zizie owhẹ avọ ohwo yena ọ vẹ te nyaze te ta kẹ owhẹ nọ, ‘Kpama re ọzae nana ọ keria etẹe.’ Whọ vẹ te kpama avọ omovuọ nyae keria oria nọ o mai kpotọ.”—Luk 14:8, 9.

Jesu ọ ta haro nọ: “Nọ a te zizie owhẹ, nyae keria oria nọ o mai kpotọ, re okenọ ọnọ o zizie owhẹ ọ jẹ nyaze, ọ vẹ ta kẹ owhẹ nọ, ‘Ogbẹnyusu, kpama kpohọ obehru.’ Who ve ti wo ọghọ evaọ iraro erara efa kpobi nọ a gbe zizie owhai.” Onana yọ ẹme ọghọ nọ ohwo o re mu họ omariẹ ọvo ho. Jesu o ru ẹme na vẹ inọ: “Keme ohwo kpobi nọ ọ kpare oma riẹ kpehru a re ti hrẹ riẹ kpotọ, yọ ohwo kpobi nọ o ru oma riẹ kpotọ a rẹ te kpare iẹe kpehru.” (Luk 14:10, 11) Ẹhẹ, Jesu o bi wuhrẹ enọ e be gaviezọ kẹe na nọ a daoma wo omaurokpotọ.

Kẹsena Jesu ọ tẹ fodẹ oware jọ nọ ohwo Farisi nọ o zizie i rie na o re wuhrẹ no ze, koyehọ epanọ ọ sai ro ru ọghọ nọ o re wo ọjẹrehọ Ọghẹnẹ. Ọ ta nọ: “Who te bi zizie ahwo kẹ ẹkeriotọ emuọriọ, who du zizie egbẹnyusu ra hayo inievo ra hayo imoni ra hayo edafe he. O gbẹ rrọ ere he, a sai zizie owhẹ ẹdẹjọ re, o vẹ te jọ edhere nọ a rọ hwa zihe kẹ owhẹ. Rekọ nọ who te bi se ehaa, zizie iyogbere, enọ e ko, emo, gbe enọ i tuaro; who ti wo evawere keme a wo oware ovo nọ a te rọ hwa zihe kẹ owhẹ hẹ.”—Luk 14:12-14.

Ohwo o te bi zizie ahwo kẹ emuọriọ, egbẹnyusu, imoni, gbe egbẹrioma riẹ ọ rẹ gwọlọ zizie, yọ orọnikọ Jesu ọ be ta nọ onana o thọ họ. Rekọ ẹme nọ ọ be ta na họ, nọ ohwo o te zizie iyogbere, enọ e ko, emo, gbe enọ i tuaro kẹ emuọriọ, o re wo eghale buobu. Jesu o ru ẹme na vẹ kẹ ọnọ o zizie i rie na nọ: “A rẹ te hwosa kẹ owhẹ evaọ ẹkparomatha ikiẹrẹe na.” Omọfa jọ nọ a zizie kẹ emuọriọ na ọ rọwokugbe ẹme Jesu na, ọ ta nọ: “Eva e were ọnọ ọ te re emu evaọ Uvie Ọghẹnẹ.” (Luk 14:15) Ohwo na ọ riẹ nọ onana yọ uvẹ-ọghọ ulogbo. Rekọ, orọnikọ ohwo kpobi o rri rie ere he. Ọtadhesẹ nọ Jesu ọ kẹ o dhesẹ onana via.

Ọ ta nọ: “Ọzae jọ o se ehaa emuọriọ ologbo, o te zizie ahwo buobu. . . . O te vi ọrigbo riẹ re ọ nyae ta kẹ enọ o zizie na nọ, ‘Wha nyaze, keme a ruẹrẹ eware kpobi họ no.’ Rekọ aikpobi a te mu inoma họ egu. Ọrọ ọsosuọ ọ ta kẹe nọ, ‘Mẹ dẹ udhu yọ o gwọlọ nọ mẹ rẹ nyai rri rie; ivie, mẹ te sae nyaze he.’ Ọfa ọ ta nọ, ‘Mẹ dẹ iruẹ ikpe yọ mẹ be nyai rri epanọ e rrọ; ivie, mẹ te sae nyaze he.’ Ọfa ọ tẹ jẹ ta nọ, ‘Mẹ nwane rọo obọ, fikiere mẹ te sae nyaze he.’”—Luk 14:16-20.

Inoma gheghe ahwo na a bi gu na. Nọ ohwo ọ tẹ gwọlọ dẹ otọ hayo iruẹ, ọ rẹ nabi rri rai ziezi taure ọ tẹ te hwosa fihọ ae, fikiere o gwọlọ nọ ahwo nana a rẹ nwani zihe nyai rri eware nọ a dẹ na ha. Yọ orọnikọ ọzae avọ esa na ọ be ruẹrẹ oma kpahe kẹ orọo ho. Ọ rọo no, fikiere u fo nọ oyena o rẹ whaha iẹe obonọ a zizie i rie kpohọ na ha. Nọ olori na o yo inoma nọ ahwo na a gu na, eva e tẹ dhae gaga, ọ tẹ ta kẹ ọrigbo riẹ nọ:

“Nya vẹrẹ vẹrẹ kpohọ iyẹrẹ gbe oko-ore okpẹwho na re who se iyogbere gbe enọ e ko gbe enọ i tuaro gbe emo ze.” Nọ ọrigbo na o zizie ahwo nana kpobi no, uwou na o vọ ghele he. Kẹsena olori na ọ tẹ vuẹ ọrigbo na nọ: “Nya kpobọ idhere na gbe oko-ore na, whọ vẹ gba ahwo nọ whọ ruẹ họ re a nyaze re uwou mẹ o sae vọ. Keme mẹ be ta kẹ owhai nọ, ohwo ọvo evaọ usu ahwo yena nọ a zizie na o ti dhunu te emu mẹ hẹ.”—Luk 14:21-24.

Ọtadhesẹ nana nọ Jesu ọ rọ ta ẹme na o dhesẹ oghẹrẹ nọ Jihova Ọghẹnẹ ọ be rọ rehọ ẹkwoma Jesu Kristi zizie ahwo sa-sa rọkẹ Uvie odhiwu. Ahwo Ju, maero kọ isu egagọ na họ ahwo ọsosuọ nọ a zizie. Ibuobu rai a siọ uzizie nana evaọ etoke iruo odibọgba Jesu. Rekọ orọnikọ ae ọvo a zizie he. Ẹme Jesu na o dhesẹ vevẹ nọ evaọ obaro a te wariẹ zizie ẹko ahwo ọfa. Ahwo nana họ ahwo Ju nọ e rrọ iruori gbe enọ i kurẹriẹ ziọ egagọ ahwo Ju. Kẹsena a ve ti zizie ẹko ahwo avọ esa nọ e te jọ ahwo urere, enọ ahwo Ju a rri nọ a fioka ha eva aro Ọghẹnẹ.—Iruẹru Ikọ 10:28-48.

Ẹhẹ, ẹme nọ Jesu ọ be ta na ọ ginẹ rọwokugbe ẹme nọ ohwo jọ evaọ usu enọ a gbẹ be re emu na ọ ta inọ: “Eva e were ọnọ ọ te re emu evaọ Uvie Ọghẹnẹ.”