Ọghẹnẹ O Jie Izi Kpahe Ẹfuọ no Oke Lelehie Taure Egba-Eriariẹ A tẹ te Riẹ Kpahe Ae
Oware wọhọ ikpe idu esa gbe egba isoi (3,500) nọ i kpemu, taure emọ Izrẹl a tẹ te nwane ruọ Ẹkwotọ Eyaa na, Ọghẹnẹ ọ kẹ rai izi nọ e rẹ thọ ae no ‘ikpeyao’ sa-sa nọ ahwo a jẹ mọ evaọ obọ Ijipti. (Iziewariẹ 7:15) Edhere jọ nọ Ọghẹnẹ ọ rọ thọ ae họ, ọ kẹ rai izi kpahe ẹfuọ jẹ vuẹ ae oware nọ a re ru re a sae whaha ikpehre eyao. Joma ta kpahe iriruo jọ:
Ọghẹnẹ ọ jọ izi nọ ọ kẹ orẹwho na ta nọ a rẹ họ jẹ fọrọ iwu rai.—Iruo-Izerẹ 15:4-27.
Ọghẹnẹ ọ vuẹ rai nọ a re ne fihọ oria kpobi hi, inọ: “Wha re wo oria nọ u siomano evaọ otafe evuẹ na, kọ etẹe wha rẹ hai kpohọ. Wha re wo ure nọ a rẹ rọ tọ otọ evaọ usu ekwakwa rai. Nọ wha te ne evaọ obọ otafe, wha rẹ rehọ iẹe tọ ọgọdọ fihọ otọ wha ve nwo isọ na ruru.”—Iziewariẹ 23:12, 13.
Nọ a tẹ ruẹ nọ ohwo jọ o wo ẹyao nọ o re vo, a re fi ohwo na họ oria riẹ sa evaọ etoke jọ. Nọ ẹyao na o te kpo no, ohwo na ọ rẹ fọrọ iwu riẹ jẹ họ, a vẹ tẹ te rehọ iẹe wọhọ ohwo nọ ọ “fo” taure o te ti kuomagbe ahwo.—Iruo-Izerẹ 14:8, 9.
Ohwo kpobi nọ ọ rọ obọ te arao hayo ohwo nọ o whu no, ọ rẹ jọ oria riẹ sa omoke jọ.—Iruo-Izerẹ 5:2, 3; Ikelakele 19:16.
Ọghẹnẹ ọ kẹ emọ Izrẹl izi kpahe ẹfuọ gbe oghẹrẹ nọ a rẹ rọ whaha eyao sa-sa no oke lelehie taure edọkita gbe egba-eriariẹ a te ti vuhu onana mu.
Evaọ oke yena, erẹwho efa a riẹ kpahe ẹfuọ họ, a je ru eware gbegbe. Joma ta kpahe iriruo jọ:
A rẹ whẹ ezuzu fihọ eria kpobi evaọ iyẹrẹ. Emu avọ ame ogbegbe, avọ eware efa nọ e fo ho e jẹ hae wha eyao sa-sa se ahwo jẹ lẹliẹ emọ whu ku ai.
Edọkita oke anwae a riẹ oware ovo kpahe emera nọ e rẹ wha eyao ho. Eware nọ ahwo Ijipti a jẹ hai ro siwi eyao họ, azẹ ighogho, isọ ọvra nọ a se re okpitolo, edhokpa nọ i whu no, evẹ, gbe ibrẹdi nọ i mu itutu no. Yọ eware nana e jẹ hae tubẹ wha eyao efa se ai. A jẹ hae rọ isọ ahwo-akpọ gbe erọ erao gwọlọ siwi eyao re.
Ahwo Ijipti a jẹ hae mọ oghẹrẹ eyao sa-sa fiki Ethẹ Naele nọ ame riẹ o gbeku no gbe ekame riẹ nọ e jẹ hai su ame ogbegbe nana fihọ idhu rai. Epọvo na re, emaha Ijipti buobu a je whu fiki eva-ikuo gbe eyao itieye na efa nọ emu ogbegbe ọ rẹ wha ze.
Rekọ o jọ ere kẹ emọ Izrẹl he keme a je koko izi nọ Ọghẹnẹ o fihọ kẹ ae kpahe ẹfuọ.