Ẹmẹkpẹti Jọ nọ A rẹ jọ Danlodu Emu Ẹme Ọghẹnẹ

Enẹna Isẹri Jihova a be mai wo iwuhrẹ Ẹme Ọghẹnẹ evaọ ekọmputa hayo ifonu vi epaọ anwẹdẹ kpobi. Rekọ evaọ abọ sa-sa akpọ na, inievo mai a wo ugho nọ a be sai ro kpohọ Itanẹte he. Evaọ eria efa jọ, ikpẹ e rẹ jariẹ tere he, whọ tẹ be jọ Itanẹte danlodu oware o rẹ kpẹlẹ wumuo ho, yọ eria jọ dede Itanẹte e riẹ vievie he.

Rekọ enẹna, inievo-emezae gbe emetẹ mai buobu a be sae danlodu ebe gbe ividio fihọ ifonu hayo etablẹte rai dede nọ a wo Itanẹte he! Ẹvẹ a be sai ro ru onana?

Ukoko na u ru okwakwa osese jọ nọ a re se JW Box nọ a rẹ rọ kẹ ikoko nọ e rrọ eria nọ Itanẹte e jọ woma tere he. U wo oware jọ nọ u re ru iruo wọhọ okwakwa Itanẹte nọ a dẹ mi ekọmpene jọ gbe software nọ Ẹko-Iruo Ekọmputa nọ ọ rrọ Ebẹtẹle o ru, jegbe ebe nọ a re fihọ ekọmputa hayo ifonu gbe ividio sa-sa nọ e rrọ jw.org. Ẹmẹkpẹti nana ọvuọvo ọ ghare te oware wọhọ ₦28,000.00 gbọ.

Nọ inievo-emezae gbe emetẹ mai a te te obọ Ọgwa Uvie no, a vẹ rọ etablẹte hayo ifonu rai rọ kọnẹte fihọ okwakwa nana nọ a re se JW Box na, a vẹ danlodu ebe gbe ividio sa-sa ababọ Itanẹte nọ a rẹ kọnẹte kpohọ. Makọ enọ i wo ifonu nọ e who no hayo nọ e ghare tere he a be sae kọnẹte. Kọ otẹrọnọ Itanẹte e rrọ oria nọ ukoko jọ o rrọ họ, ẹvẹ eware ekpokpọ e sae rọ ruọ JW Box na? Noke toke, uwou ogha u re vi USB se ikoko, onọ a fi eware ekpokpọ nọ e rrọ jw.org họ eva no, kẹsena a vẹ jọ obọ ukoko na fi eware nọ e rrọ eva USB na fihọ eva JW Box na.

Kọ JW Box na u bi gine fiobọhọ kẹ inievo mai? Ee. Wọhọ oriruo, ọsọmọ jọ nọ a re se Nathan Adruandra nọ ọ be rria obọ Democratic Republic of Congo ọ ta nọ: “Unuẹse buobu mẹ jẹ daoma re mẹ danlodu edrama O Jihova, Whẹ Me Fievahọ gbe ọrọ Kareghẹhọ Aye Lọt na. Rekọ mẹ jẹ sae danlodu riẹ hẹ, o tẹ tubẹ bẹ omẹ no. Rekọ enẹna mẹ be sae danlodu ividio nana fihọ ifonu mẹ lọlọhọ, yọ i bi fiobọhọ kẹ omẹ gaga nọ mẹ be sai ro wuhrẹ emọ mẹ ziezi.”

Oniọvo jọ nọ o re fiobọhọ ruẹrẹ JW Box họ kẹ ikoko evaọ Nigeria ọ ta nọ: “Inievo na a rri JW Box na wọhọ okẹ oghaghae nọ u no obọ Jihova ze. Eva e be were ae gaga enẹna inọ a be sae danlodu ebe gbe ividio nọ e rrọ Ẹkpẹti Ekwakwa Ewuhrẹ na.”

Ma be ta ẹme na, a vi JW Box nọ i bu vi odu ọvo gbe egba ihrẹ (1,700) se inievo mai nọ e rrọ Africa, Oceania, gbe South America no, yọ ma bi ru epanọ ma re ro vi se ikoko efa buobu. Ẹvẹ ma be sai ro wo ugho ru onana? Ma be sai ru ei ẹkwoma unevaze nọ a bi ru rọkẹ iruo akpọ-soso na, yọ evaọ ẹsibuobu, ẹkwoma donate.jw.org. a bi ro ru onana. Ma yere owhai gaga rọkẹ eva rai kpobi nọ wha be rọ tha iruo nana uke.