“Eware Iyoma nọ Me Duwu Abọ Họ gbe Uyoyou Ugho U Si Uye Se Omẹ”

UZUAZỌ MẸ EVAỌ OKE NỌ U KPEMU

A yẹ omẹ evaọ Tiranë, okpẹwho-esuo Albania. Ahwo uviuwou mai a jọ iyogbe. Ọsẹ mẹ o je duwu abọ họ eware iyoma evo ho re ọ ruẹsi fe. O je ru iruo gaga re ọ sae rẹrote omai. Ghele na, akpọ ọ jẹ bẹ omai. Nọ mẹ jọ ọmaha, o jẹ kẹ omẹ uye gaga inọ iyogbe koikoi ma rrọ. Ẹsibuobu, awọ gheghe mẹ jẹ hae nya keme me wo eviẹ hẹ. Yọ mẹ jẹ hae jọ eveva ẹsejọ.

Nọ me mu uji họ etho yọ me ri te oware ovo ho. Me je roro nọ onana yọ edhere jọ nọ ma sae rọ ruẹ emu re evaọ uviuwou mai. Ẹdẹ jọ iporisi i te mu omẹ. Fiki ekpehre uruemu yena nọ me wo na, ọsẹ mẹ o te fi omẹ họ isukulu nọ a re fi emọ nọ i re yoẹme he họ. Me mu isukulu na họ evaọ ukpe 1988 nọ mẹ jọ ikpe ikpegbene. Ikpe ivẹ me kpohọ isukulu na, yọ iruo ewẹda a wuhrẹ omẹ. Nọ me nwrotọ no isukulu na no, mẹ tẹ jọ udu mẹ ta nọ me re gbe tho uji hi, inọ mẹ rẹ gwọlọ iruo nọ mẹ rẹ rọ rẹrote omamẹ. Rekọ mẹ jẹ ruẹ iruo ho. Oke yena whọ rẹ kake ruẹ iruo evaọ Albania ha keme ebẹbẹ buobu e jọ egọmeti orẹwho mai na. Nọ me rri enẹ rri enẹ, mẹ gbẹ riẹ onọ me re ru hu, me te dhugbe ku usu gbe egbẹnyusu anwae mẹ. Ma tẹ jẹ wariẹ mu uji họ etho. Ẹdẹ jọ a te mu omẹ avọ egbẹnyusu mẹ. A te fi omai họ uwou-odi ikpe esa.

Nọ me no uwou-odi ze, mẹ tẹ jẹ ruabọhọ uji-utho na. Eware e jọ gaga evaọ Albania oke yena, yọ a jẹ họre kuoma. Oke yena nọ orẹwho na o rọ jọ zighi zighi na, me duwu abọ họ eware iyoma buobu nọ ugho u je no ze ziezi. Ẹdẹ jọ mẹ avọ ẹgba mẹ ma kpohọ uji-utho avọ igbeke nọ ma wha lele oma. Kẹsena a te mu imava jọ evaọ usu mai. Mẹ tẹ dhẹ no orẹwho na keme mẹ riẹ nọ obọ u te te omẹ, a ti fi omẹ họ uwou-odi ikpe buobu. Oke yena yọ me wo aye no. Odẹ aye mẹ Julinda, yọ o yẹ ọmọzae kẹ omẹ no.

Mẹ avọ aye gbe ọmọ mẹ ma tẹ dhẹ kpobọ England re ma jọ obei mu akpọ họ. Mẹ gwọlọ nọ me re gbe tho uji hi. Rekọ fiki ekpehre uruemu nọ o reria obọ no, me te je duomahọ eware nọ i fo ho. Me te mu imu egaga họ ẹzẹ, yọ mẹ jọ eki imu egaga na je wo ugho ziezi.

Ẹvẹ aye mẹ o rri imu egaga nọ mẹ jẹ zẹ na? Jọ ọye ọvo ọ rọ unu riẹ vuẹ owhai. Ọ ta nọ: “Albania mẹ rria no emaha ze, yọ ma yogbe gaga. Mẹ jẹ hai roro iroro epanọ me ti ro wo ugho re akpọ ọ siọ omẹ ba ẹbẹ. Mẹ ta nọ me ti ru oware kpobi nọ mẹ sai ro fe. Fikiere nọ mẹ ruẹ nọ Artan ọzae mẹ o bi gu ọrue, wha ahwo re, tho uji, jẹ zẹ imu egaga, mẹ ruẹ oware ovo nọ o jariẹ thọ họ. Me je fiobọhọ kẹe keme ugho u bi noi ze.”

Evaọ ukpe 2002, oware jọ o via idudhe nọ o raha ekọ ku omai abọ. Ẹdẹ jọ nọ mẹ jẹ wọ imu egaga buobu nyae zẹ, a te kru omẹ. Kọ ere a ro je fi omẹ họ uwou-odi.

EPANỌ EBAIBOL NA O RO NWENE UZUAZỌ MẸ

Isẹri Jihova a mu uwou mẹ họ ẹnyaze no taure a te ti fi omẹ họ uwou-odi evaọ 2002. Ukpe 2000 Isẹri Jihova a ro mu aye mẹ Julinda Ebaibol họ ewuhrẹ. Mẹ jẹ gaviezọ kẹ ae he keme me roro nọ Ebaibol na o re fiobọhọ kẹ ohwo ho. Rekọ uwuhrẹ na o jẹ were aye mẹ gaga. Ọ ta nọ: “Ọsẹgboni mẹ a je kpohọ ichọche, yọ mẹ rọ Ebaibol na zaharo ho. Eme riẹ e rẹ were omẹ oma gaga. Mẹ gwọlọ riẹ oware nọ Ebaibol ọ ta. Fikiere nọ Isẹri Jihova a ta nọ a re wuhrẹ Ebaibol kugbe omẹ, eva e were omẹ gaga. Eware nọ a je wuhrẹ omẹ i vẹ kẹ omẹ ziezi. E lẹliẹ omẹ siobọno ikpehre eware jọ nọ me je ru. Rekọ epanọ ma re ro fe o gbẹ jọ omẹ oja gaga, bẹsenọ a ro mu ọzae mẹ. Nọ a mu ọzae mẹ no, mẹ tẹ ruẹ nọ oghẹrẹ nọ ma bi ro le ugho na u kiehọ họ. Epanọ Ebaibol o dhesẹ ugho na, ere o ginẹ rrọ. Epanọ ma kọ ugho te na, ma wo evawere ghele he. Fikiere mẹ tẹ gbaemu nọ me re ru oware kpobi nọ Ọghẹnẹ ọ ta.”

Ukpe 2004, a te siobọno omẹ. U kri hi, mẹ tẹ jẹ gwọlọ epanọ mẹ rẹ rọ wariẹ mu imu egaga họ ẹzẹ. Rekọ okọ yena u gbe kiehọ aye mẹ oma ha. Ẹme jọ nọ ọ ta u duobọte omẹ gaga. Ọ ta nọ: “Mẹ gbẹ gwọlọ igho ra ha. Oghẹrẹ nọ a be hae rọ rehọ owhẹ siọ omẹ avọ emọ mai na ba na o gbẹ were omẹ kakaka ha.” Me roro nọ ọ sae ta ẹme otiọye vievie he, rekọ uzẹme ọ ta na. Mẹ rria uwou-odi ikpe buobu no. Evaọ oke yena kpobi na, mẹ riẹ obonọ aye gbe emọ mẹ a jọ họ. Yọ uye o bẹ omẹ gaga no fiki eware iyoma nọ me duwu abọ họ fiki ugho. Fikiere mẹ tẹ jọ udu mẹ ta nọ me re nwene. Mẹ tẹ fa usu no egbẹnyusu anwae mẹ kpobi.

Ẹdẹ jọ nọ me lele aye mẹ gbe emezae ivẹ mẹ kpohọ ewuhrẹ Isẹri Jihova, oware nọ mẹ ruẹ u duobọte omẹ gaga. Mẹ ruẹ nọ Isẹri Jihova yọ ahwo nọ a be riẹ yerikugbe ziezi, yọ a dede omẹ rehọ re. Uwhremu na mẹ tẹ rọwo nọ a wuhrẹ Ebaibol kugbe omẹ.

Mẹ jọ Ebaibol wuhrẹ nọ “uyoyou ugho yọ ehri oghẹrẹ eware iyoma kpobi, yọ fiki uyoyou nana nọ a bi kie lele, otujọ a . . . rọ eware edada buobu duwu omarai soso no.” (1 Timoti 6:9, 10) Eware nọ e via kẹ omẹ no i dhesẹ nọ ẹme Ebaibol nana ọ gba gaga. O da omẹ gaga inọ eware nọ me duwu abọ họ evaọ oke nọ u kpemu u si uye se omẹ avọ uviuwou mẹ gaga. (Ahwo Galesha 6:7) Nọ mẹ te ruẹ nọ Jihova avọ Ọmọ riẹ Jesu Kristi a you omai gaga, mẹ tẹ daoma re me siobọno ikpehre eware nọ me je ru. Mẹ tẹ be daoma kẹnoma kẹ eware nọ e rẹ wha ẹbẹbẹ se amọfa. Yọ onana u ru nọ mẹ be rọ jọ kugbe ahwo uviuwou mẹ ziezi.

IRERE NỌ ME WO NO

Ohrẹ Ebaibol jọ nọ u fiobọhọ kẹ omẹ gaga no họ: “Jọ edhere uzuazọ rai o kare uyoyou ugho, jọ onọ wha wo o da owhai ẹro.” (Ahwo Hibru 13:5) Enẹna mẹ gbẹ rrọ awawa ha, udu mẹ u gbe bi brukpe omẹ hẹ. Oghẹrẹ nọ eva e be rọ were omẹ enẹna, eva e re were omẹ te ere ẹdẹvo ho. Mẹ avọ aye mẹ ma be riẹ yeri ziezi enẹna, yọ eva e be were ohwo kpobi evaọ uviuwou na.

Vẹre, me je roro nọ ma te wo ugho ziezi, ẹsiẹe eva e te were omai. Rekọ eware iyoma nọ me duwu abọ họ gbe uyoyou ugho u si uye se omẹ. Ma fe he rekọ ma wo oware nọ o mai wuzou evaọ uzuazọ, oye họ usu okpekpe nọ ma wo kugbe Jihova Ọghẹnẹ. Mai kpobi evaọ uviuwou na ma be gọ Jihova, yọ evawere nọ onana o be wha ze, a rẹ ruẹ unu gbiku riẹ hẹ.