ENỌ IZOGE NA
Ẹvẹ Mẹ Sai ro Lele Ọsẹgboni Mẹ Ta Ẹme Kpahe Izi nọ A Fihọ?
“Nọ mẹ jọ ikpe ikpegbisoi me je ru lele izi nọ ọsẹgboni mẹ a fihọ kẹ omẹ, rekọ obọnana nọ mẹ kpako te ikpe ikpegbizii no na, me roro nọ a re si izi jọ no.”—Sylvia.
Kọ epanọ Sylvia ọ ta na, ere o rrọ owhẹ oma re? O tẹ rrọ ere, uzoẹme nana u ti fiobọhọ kẹ owhẹ riẹ oghẹrẹ nọ whọ sai ro lele ọsẹgboni ra ta kpahe onana.
Oware nọ u fo nọ whọ rẹ riẹ
Taure who te ti lele ọsẹgboni ra ta kpahe izi nọ a fihọ, roro kpahe onana:
Izi e gbẹ rrọ akpọ na ha, ozighi ọ rẹ jọ oria kpobi. Dai roro kpahe edhere nọ imoto buobu e be dhẹ. Eme ọ rẹ via otẹrọnọ egọmeti o fi izi nọ e rẹ kpọ ahwo họ họ? Wọhọ epanọ izi itiena e rẹ whaha asidẹnte na, ere izi nọ a fihọ evaọ uwou e rẹ lẹliẹ eware riẹ nya.
Izi ọsẹgboni ra i re dhesẹ nọ a gwọlọ ewoma ra. Nọ ọsẹgboni ra a gbe fi izi evuevo họ kẹ owhẹ hẹ, oyena o sai dhesẹ nọ oware kpobi nọ o via kẹ owhẹ kẹhẹ, ovuovo u te rai hi. Oghẹrẹ ọsẹgboni vẹ o re ru oware utioye?
KỌ WHỌ RIẸ? U wo izi nọ esẹgbini a bi ru lele re! Whọ tẹ vro onana, se Emuhọ 2:24; Iziewariẹ 6:6, 7; Ahwo Ẹfisọs 6:4; gbe 1 Timoti 5:8.
Ghele na, kọ otẹrọnọ who gbe bi roro nọ izi ọsẹgboni ra e nwani keke hrọ?
Oware nọ whọ rẹ sai ru
Taure who te lele ai ta kpahe onana, rorote ziezi. Kọ whọ be hai ru lele izi ọsẹgboni ra anwẹdẹ? Otẹrọnọ who bi ru ere he, kiyọ who re lele ai ta kpahe izi na obọnana vievie he. Ukpoye, se uzoẹme na, “Ẹvẹ Ọsẹgboni Mẹ A Sai ro Fievahọ Omẹ?”
Otẹrọnọ whọ be hai ru lele izi ọsẹgboni ra, ruẹrẹ ẹme nọ whọ te ta kpahotọ. Who te kere eware nọ who ti lele ai ta fihotọ, u ti fiobọhọ kẹ owhẹ riẹ sọ o ginẹ gwọlọ nọ wha rẹ ta kpahe ae. U te no ere no, vuẹ ọsẹgboni ra re a fi oke gbe oria họ nọ wha sae jọ romatotọ ta ẹme na. Nọ whẹ avọ ọsẹgboni ra wha tẹ keria kẹ ẹme na no, u fo nọ whọ rẹ kareghẹhọ eware nana:
Wo adhẹẹ. Ebaibol na ọ ta nọ: “Ẹme ọgaga ọ rẹ kpare ofu.” (Itẹ 15:1) Fikiere hae kareghẹhọ onana: Whọ tẹ be kpare unu wha kẹ ọsẹgboni ra hayo ta kẹ ae nọ izi rai i keke hrọ, ẹme na ọ te riẹ nya ha.
“Epanọ me wo adhẹẹ kẹ ọsẹgboni mẹ te, ere a re bru ọghọ họ omẹ oma te. Nọ ma tẹ be ta ẹme avọ adhẹẹ kẹ ohwohwo, ẹsiẹe o rẹ mae lọhọ re ma rọwo fihọ oware ovo.”—Bianca, ikpe 19.
Gaviezọ kẹ ae. Ebaibol na ọ ta nọ whọ rẹ jọ ohwo nọ ọ rẹ “kake gaviezọ, ọnọ ọ rẹ rọ okpakpa ta ẹme he.” (Jemis 1:19) Kareghẹhọ nọ who bi lele ọsẹgboni ra ta ẹme, onọ u dhesẹ nọ whọ tẹ ta omojọ whọ vẹ jẹ gaviezọ kẹ ae.
“Nọ ma be kpako na, ma sai roro nọ ma riẹ vi esẹgbini mai, rekọ oyena yọ ọrue koikoi. O gwọlọ nọ ma rẹ gaviezọ kẹ ae je ru lele ehrẹ rai.”—Devan, ikpe 20.
Daoma riẹ oghẹrẹ nọ a rri ẹme na. U re fiobọhọ nọ whọ tẹ riẹ oghẹrẹ nọ ọsẹgboni ra a rri ẹme nọ ọ rrọ otọ na. Ru lele ohrẹ Ebaibol nọ o ta nọ “wha gwọlọ ewoma obọrai ọvo ho, rekọ ewoma amọfa re,” koyehọ ewoma ọsẹgboni ra.—Ahwo Filipai 2:4.
Ovẹ evaọ usu ivẹ na o rẹ sae wha emamọ iyẹrẹ ze?
“Mẹ jẹ hai rri ọsẹgboni mẹ wọhọ ahwo nọ a rọsuọ omẹ viukpọ ahwo nọ ma gbẹ rrọ utu. Rekọ obọnana me vuhumu no inọ a bi wuhrẹ epanọ a rẹ rọ jọ emamọ ọsẹgboni wọhọ epanọ me bi wuhrẹ epanọ mẹ rẹ rọ jọ emamọ ohwo na. Fiki uyoyou nọ a wo kẹ omẹ a bi ro ru oware kpobi nọ a bi ru na.”—Joshua, ikpe 21.
Fodẹ oware nọ who roro nọ o rẹ sai ku ẹbẹbẹ na họ. Dae rehọ iẹe nọ whọ gwọlọ kpohọ epati rekọ ọsẹgboni ra a gwọlọ nọ whọ nya ha fikinọ o te rehọ auwa soso re who te ti te oria na. Daoma riẹ oware nọ a be rọ gwọlọ whaha owhẹ na. Kọ fikinọ epati na e were rai hi manikọ fikinọ oria na u thabọ hrọ?
Kọ a te rọwo nọ whọ nya otẹrọnọ whọ vuẹ rai nọ whẹ avọ ogbẹnyusu ra jọ wha te gbẹ nya?
Otẹrọnọ epati na họ ẹbẹbẹ na, kọ udu rai u ti te otọ nọ whọ tẹ vuẹ ae oghẹrẹ ahwo nọ a te jọ epati na gbe ohwo nọ ọ te rẹrote eware nọ a te jọ epati na ru?
Rọ adhẹẹ kẹ ọsẹgboni ra nọ whọ tẹ be ta ẹme, re whọ jẹ romatotọ gaviezọ kẹ ae. Rọ ẹmeunu gbe uruemu ra dhesẹ nọ whọ be “rọ ọghọ kẹ ọsẹ ra avọ oni ra.” (Ahwo Ẹfisọs 6:2, 3) Who te ru enẹ, kọ a ti si izi jọ no kẹ owhẹ? A sai ru ere. Yọ ẹsejọhọ a ti ru ere he. Oghẹrẹ kpobi kẹhẹ . . .
Rọwo fihọ oware kpobi nọ a ta. Onana u wuzou gaga, keme o sai ru ọsẹgboni ra si izi jọ no kẹ owhẹ evaọ obaro. A gbẹ rọwo fihọ oware nọ whọ gwọlọ họ, who te bi lele ai si ikẹ, u re ru ei bẹbẹ kẹ owhẹ oke ofa nọ whọ tẹ gwọlọ lele ai ta ẹme. Rekọ whọ tẹ rọwo fihọ ẹme rai, o sai ru nọ a re ro si izi jọ no kẹ owhẹ.