2 Wha Hai Ru Eware Kugbe

OWARE NỌ U DHESẸ

Nọ ọzae-avọ-aye a te bi ru eware kugbe, a rẹ wọhọ imava nọ e be dhẹ arupre nọ a re ru iruo kugbe re a sai te obonọ a be nya. Nọ ẹbẹbẹ ọ tẹ make rrọ otọ, a rẹ gwọlọ epanọ a re ro kuobọgbe ku ẹbẹbẹ na họ.

EHRI-UZI EBAIBOL: “A gbẹ rrọ uwo ivẹ hẹ rekọ uwo ovo.”​—Matiu 19:6.

“Orọo yọ oware nọ omọvo jọ ọvo ọ rẹ jọ ru eware he. O gwọlọ nọ ọzae-avọ-aye a re ru eware kugbe re orọo na o sae jọ ziezi.”​—Christopher.

OWARE NỌ U RO WUZOU

Nọ ẹme ọ tẹ rrọ otọ, ọzae-avọ-aye nọ a re ru eware kugbe he a rẹ kpahe eme egaga kẹ ohwohwo viukpenọ a rẹ dhogbo epanọ a re ro ku ẹme na họ. Ẹme nọ o te oware ovo ho, o ve zihe ruọ okpẹme.

“Ọzae-avọ-aye a gbe bi ru eware kugbe he, orọo rai o sae jọ ziezi hi. Ogbẹrọnọ mẹ avọ ọzae mẹ ma bi ru eware kugbe he, ma hẹ sae ta nọ mẹ avọ iẹe ọzae-avọ-aye he, ma hae te jọ wọhọ imava nọ e be rria uwou kugbe gheghe nọ i bi yeri ọvuọ akpọ riẹ.”​—Alexandra.

OWARE NỌ WHỌ RẸ SAI RU

KIẸ OMARA RIWI

• Kọ mẹ be hai rri nọ ugho nọ me wo yọ ọmẹ ọvo?

• Kọ mẹ rẹ gwọlọ nọ mẹ tẹ be reakpọ kuoma, aye hayo ọzae mẹ o du jariẹ hẹ?

• Kọ mẹ rẹ gwọlọ siomano imoni ọzae hayo aye mẹ dede nọ o re se ae họ oma gaga?

REHỌ ENỌ NANA LELE IEI TA ẸME

• Eware jọ vẹ ma be hai ginẹ riẹ ru kugbe ziezi?

• Kọ evẹ u fo nọ ma rẹ gbẹ jọ daoma?

• Re ma sai ru eware kugbe ziezi, eme ma re ru?

EWARE JỌ NỌ I RE FIOBỌHỌ

• Wha jọ wọhọ imava nọ i dikihẹ ọvuọ abọ riẹ be fa etẹnisi hi. Ukpoye wha roro kpahe epanọ wha sai ro ru eware kugbe re whai imava wha sae jọ abọvo.

• Ukpenọ whọ rẹ hai roro kpahe epanọ u re ro woma kẹ owhẹ, hai roro kpahe epanọ u re ro woma kẹ owhai imava.

“Whọ dhogbo epanọ a rẹ rọ riẹ ohwo nọ o ru thọ gbe ohwo nọ ọ riẹ ru hu. Ukpoye, dhogbo epanọ udhedhẹ gbe okugbe e rẹ rọ jọ orọo ra, keme eye họ eware nọ e mai wuzou.”​—Ethan.

EHRI-UZI EBAIBOL: “Wha gwọlọ ewoma obọrai ọvo ho, rekọ ewoma amọfa re.”​—Ahwo Filipai 2:3, 4.